Read Wano 2 PETERUT 2 Bible Online

2 PETERUT 2 - Wano bible

2 PETERUT 2

¹Maan aa'nduk it aap wone pilit pugunogo yorogo menggaarak mendek nogo nen Ala apuri inenggela'me unggwi wogo nogogwaarik, pilit pugunogo yorogo nogogwaarak nogo ndak-ndak, peebi it aap ti mendek nogo, kit maluk eerogo pinagawok nduk kinenggela'me unggwi woraagun o. Ndi, unggwi wogo logomenggaarik, aakumi ambik iniki nomoninabuwok nduk, yi wone ndi wone eebe lek mendek kagak, pilit pugunogo kinikime manabit wogo logonet, ”Kinowe Yetut amiya paga ninonggo mbaneegerak yogwe nogo ti, nit nineenggo'lek o,” yinuk, agan wogo logomenggaarak paga, abera'lek me, Ala nen lek eerogo piyaagin o.

²Aakumi ambik nen it aap ti nogo iniki nen nengge mugurok nugwi iigo logomenggaarik, ”Nit togon ninom aret eerit nogo logowok o,” yinuk, inom eerit nogo logonet, kit Ala ari menggerak wone wappunuk eerit nogwe nogo, ”Yi nano wone agan nugu agaarik o?” yinuk, miyuk-meya eerogo pinagago logogun.

³Meek eerogo pinagago logonet, ambi kolaawak nduk, kinambokan laganggo logonet, inoone ugun pilit pugunogo yokkirogwe iyaamunggup o. Togop yokkirogo logomenggaarak kwe, it eekwi nogo paga at inowak loombunuk maluk inoba piyoorak maan koonogo pereegerak Ala nogo ti, we ugun maanggo yugu logonet nogo lomok arik wonage lek o. Ata, ineebe inooriyak nduk abu li'luk eerak aret wonage o.

⁴It melaikat nogo mendek nen maluk eeko mbareegwa, Ala inabuwa nen teppiyareegak mbakop? Lek o. ”Peebi kinowak leenogo pinagagin o,” yinuk, kani omoonu'me mbuun ambeena kiiniki paga logowak nduk mbutigeele maarogo wuppiyareegerak wonogwe nogo lek a?

⁵Ndi, it aakumi maan aa'nduk o nggween paga yime logonet, maluk eeko mbareegwa, at Ala inabuwa nen teppiyareegerak mbakop? Lek o. Mayu nappi wagagerak nogo paga niyo yenggenit lagangge logonet, it aakumi maluk eekwi nogo tigitogon inooke kagak, ”Kit maluk eeriyak mage o,” yinuk, Ala wone yorage nagagerak aap Nu nogo akwe-apuri inom ineebe 8 mban inagap ndareegerak nogo lek a?

⁶Ndi, at Ala nen, ”It aakumi o Torom-Nggomoora mendek kunduk maluk mban eekwi yi, neebi o,” yinuk, kani wurabit wage logonet, pup eerogo piyareegerak nogo ti, it aap peebi maluk eekwi iinok, ”Togop aret ninoorigin kagi,” mbako logowak nduk, eereegerak nogo lek?

⁷Ndi, at aap Lot iniki obeelom aret wonagagerak kwe, it aakumi ti, inenggela'me logonet, Ala wone taganogo punuk, iniki nen nengge kenok ugun-ugun eerit nogwe nogo enegen iige, inoone ugun agan nogwe nogo aruk konengge, eeke logonet, ”Yi eekwi yi, ao,” yinuk, iniki mondok wakko'net unggwage Ala nen kage nagagirik, it aakumi pup eerogo piige logonet, at aap obeelom aret me, agap ndareegerak nogo lek a?

⁹Ala nen togop aret eeginabit wundi wagagerak me, nit at apuri aaninggin mendek ninoba age kenok, ninagap ndake, ndi, it maluk eeko menggaarak nogo peebi age yobok paga inowak loonogo punuk, maluk inoba piige, eeriyak kooneegerak nogo, iniki aberak aret menggerak o.

¹⁰It togop eeppiyoorak kooneegerak nogo ti, mbuuluk negen. Ndi, it aakumi nen, ”Nit maluk eekkolaawok o,” yinuk, iniki nen nengge kenok, ugun eerit nogwe, Ala nen wone lengganogo yorage nogo taganogo punuk, at eebe miyuk-meya eerogo pugwi, eekwi nogo perak, aaninggin mondok ndonggok togon inoba piige kaagun. It mbogut paga yonggo nugu menggaarak melaikat nogo nen, inomaawi ambik inayuk warak me, ”Aap Ala wone kagak pilit pugunogo yorogo menggaarak nogo ti, it mondok maluk eekwi me, kat ninogoba mondok inooke logot o,” yinuk, inoone omaawi paga Ala yoriyak op kwe, inagabiti warak me, yanggorogon yogo menggaarak. Ndi, it aap pilit wone yaga nen perak, ”Ninagabiti o,” yinuk, inaganak waka'lek iniki wogoppako logonet, kugi inom, melaikat inom, abok aret ugun miyuk-meya eerogo piinet nogo menggaarak.

¹²Wam nda'nogo nagaatik, iniki lek ugun eerit nogwe iigak, aanggo unde nen pippunuk, warogo nengge minggi kwak, it aap ti, togop iniki lek me, we ugun ambi eeriyak aganake kenok mban eerit nogo logonet, wone ineenggo'lek kagak, miyuk-meya eerogo pugwi me, aakumi inaanggo unde nen wako mengga kwak, it maluk eekwi onggo at Ala nen aaninggin inoba piige logonet, togop aret inoorigin o. It iniki nengge nen nogo mugurok nogo logonet, inagabiti nen kote eeriyak mbaka'lek tena'me aret eerit noorak inikilom mbako menggaarak me, kinambokan laganiyak inikilom mbako logonet, kinom lambunna'nuk, mbi nunggwi me, inagabolo mili inawin aga'ne kunik nogo pogom, it aap ti kinenggela'me togop aret menggaarak

¹⁴Ti, eeko logonet, it inigen alik ambi paga pugwi lek o. Ata, iniki nen kumi mbabi we ugun ya wurinakak nogo mban inigen wogoren nogo logonet, ugun-ugun eeginabit nogo nagaatik, ”A. Yi abu eekirak me, ndonggoppanigi,” yinuk, yogolik. Ata, nabenak mban eerit nogo logonet, it Ala apuri aret kwe, iniki awo kole aga'lek nogo, inenggaanok nggerok yuwak nduk, nomoniren keele pugume negen piya nogo menggaarak. It yi mendek ndi mendek koloorak uugwe mbako logonet, ”Wone ngge yoraawok o,” yinuk, iniki koombunuk wone ugun agan nugwi nogo paga, Ala nen mondok maluk eerogo piyaagin o.

¹⁵It aap nogo nen tu koonak noorak kagak mbo punuk, aap Mbeyot aput Mbileyam nogo nen maluk eekwi onggo koloorak iniki luunik logonet, Ala nen yereegerak kagak, alik eerit nage nagagerak nogo ndak-ndak, it togop aret tu alik paga nomoninuk, nogo agaarik o.

¹⁶At aap Mbileyam nogo maluk eerit nage logonet, obaabut kumili negen eeke mbareegi, at eerit nage nogo teppuwak nduk, wam keledai oone lek aru'logu aret kwe, aakumi inoone negen ari logonet, mberereegerak.

¹⁷Aap ambi nen ogoba abu'me logonet, aruk konok mban eeke minggi kwak, it aap pilit pugunggo menggaarak nogo nen maluk eeriyak aganake kenok, tebenogo pugwi lek eerit noorak mban aganake me, it maluk eekwi nogo ayeloman negen aret kwe, kagak, wogoppatinuk, it aap ngget iluk maluk eeriyak, ”Nineebi o,” yinuk, mbo pereegwaarak nogo iniki nggaganggo logonet, ”We ugun eeko logorak mendek kagak, nano nduk mum-mage mban yogo ogotik?” yinuk, iniki nen nengge nogo mban mugurok nawak nduk, inikime manabit nogo menggaarak me, wone alom lek kagak, ugun yorogo menggaarak. Ndi, it aap ti, niyo eneeri poronak kwak logonet, inoone o wiya nen ameraakot wonok nage minggi kwak yogo menggaarak me, at Ala nen o apit me logowak nduk, inake ogobakkigirogo piyareegerak wonage o.

²⁰”Nit Yetut Keritut ninowe endagembogut ninagap ndaka nineenu me, nggween paga maluk eeriyak ee'ninake menggerak nogo nineebi o,” yinuk, inambo'me mbo pereegwaarak kwe, ti'nuk, aa'nduk eeko nogogwaarak nogo, inikime aberogo eerit nogwe iinok, inobaabut aa'nduk mbuuluk obeelom negen wonogogwaarak kwe, peebi irip paga nen abunuk, maluk abu nggwok aret eekkologo menggaarak me,

²¹it aakumi maluk eeko menggaarak nogo nen Ala ari menggerak wone wappunuk, eerit noorak wone nogo, ineenggo'lek logonet, maluk eerit nogo logonetak en ti, op negen kwe, Ala nen, ”Yogop ee'nu, ndogop ee'nu,” yinuk, yereegerak wone nogo, abu ineenu logonet, maluk eekwi ti perak, abu maluk lombok aret o.

²²Nit aakumi nen, ”Nggeewo nen peyak wurogo punuk, ti'nuk, melak togon nengge,” ndi, ambi, ”Wam nogo ngguu'mo amuni mbanogo wappiigaatak kwe, ti'nuk, iniyok paga yungguninuk purok me wanggini wari unggwogwe, eeko menggaarak o,” yinuk, yogo monggoorak nogo ti abet aret me, it aap nogo ti ndak-ndak aret eerit nogo menggaarak o.