Read Wano 1 YAYA 1 Bible Online

1 YAYA 1 - Wano bible

1 YAYA 1

¹At Wone maan aa'nduk wonagagerak aakumi ineenik eeginake menggerak nogo oone ninaruk konenggwi, eebe ninigen kogwe, eereegurak kwe, ti mban lek o. Ata, eebe lombok inom nineenggi pigaganeegurak o.

²Ndi, eebe nineenggi pigaganeegurak nogo aret kin age mbareegi, ninigen kogo nogogurik, at nineenik ee'ninake menggerak ninogoba imbirak wonagagerak eebe nineenu aruwak nduk, kin eeppinaneegerak nogo, ”Yi aret o,” yinuk, paganogo yokkirogo ogoorik o.

³Nit ninogoba Ala aput Yetut Keritut imbirak ninom niniki kunik wonogwe me, kit ninom niniki ambit kunik logowok nduk, ninigen kogwe, ninaruk konenggwi, eereegurak nogo aret yokkirogo ogoorik o.

⁴Ndi, paganogo yokkirogwe yi nogo abok aret, nit niniki ale'nggen mondok nggwok aruwak nduk, liiru yi mbanggirogo ogoorik o.

⁵At Wone nogo nen yo'nirage logonet, ”At Ala o eya kwak menggerak me, at inikime o apit aago kwak wonage abu lek o,” yinuk, yo'niragagerak nogo, ninaruk konembunuk, yokkirogo ogoorik o.

⁶Nit o apit paga nugu logonet, ”An Ala nimbirak kunik wonage o,” yogwe niinok, Ala ari menggerak wone ndak-ndak eeka'lek logonet yogwe me, pilit aret pugunggwi o.

⁷Ndi, at Ala o eya paga wonage nogo pogom, nit o eya paga nogwe niinok perak, at aput Yetut amiya paga ninomaluk abok aret koo'ninake, ndi, nit ninoreewi ninom niniki kunik aret logowok nduk ee'ninake, eeke logogin o.

⁸Nit maluk eeko logonet kwe, ”Nit maluk eekulik o,” yogwe niinok, pilit aret ninambokan laganggologwe me, Ala ari menggerak wone nogo ninikime wonage abu lek aret o.

⁹Ndi, ninomaluk abet aret paganggwi niinok perak, at Ala yegetak mbeyok arilik, a'me liirogon mban eeke menggerak me, ninomaluk lek eerogo pege logonet, ninikime koo'ninake logogin o.

¹⁰”Nit maluk abu eekulik aret o,” yogwe niinok, at Ala pilit pugungge menggerak negen eeppugwi me, at oone nit ninikime wonage abu lek aret o.