Read Wano 1 YAYA 4 Bible Online

1 YAYA 4 - Wano bible

1 YAYA 4

¹Noreewi o. Kit an niniki kunik me, wone ambi inom yokkira o. ”Aberiniki nen yo'nirage kenok, yokkira wogo o,” yogwe iinok, inoone abet mba'nuk ugun woorak mage o. It pilit wone mamungga nogo yi awi ndi awi abok aret yoranet nugwi me, ”It Ala nen abet aret nappiya wagaarak ilik?” yinuk, inabut mbambunuk inoone konenggo logonip o.

²”Yetut Keritut abet aret nggween paga wambi wage nagagirik, aap aret nda'nagagerak,” yinuk, paganggwi iinok, ”Aap ti, Ala nen abet aret nappiya wagagerak Aberiniki inikime logonet, yogwe iigo,” yinuk, inoone konenggo logorak op kwe,

³it aap ti, wone togop paganggwi lek iinok perak, ”Aap ti, Ala nen nappiya woroolik iniki, mba'nuk aret wagaarak,” mbarumunggup o. ”O age yobok togon Pilit Keritut wage logominggirik, ndogop agan nage logogin o,” yinuk, koneneegutak nogo, ”Muk wagaarak yi aret iigo,” yinuk, mbarumunggup o.

⁴Napuri kit Ala apuri aret o. Ndi, kit Ala apuri aret me, at omaawi ambik Aberiniki wokkiragagerak kinikime wonage nogo paga nen, at it aap nggween paga mendek inoone pilit agan nugwi inikime wonage nogo, omaawi lek me, it aap ti tebenogo piyareegutak.

⁵It aap ti, nggween paga mendek aret me, nggween paga eeko menggaarak wone mban agan nugwi iinok, it aap nggween paga mendek eeriyak iniki kunik menggaarak nogo nen mban inaruk konenggo menggaarak.

⁶Ndi, nit perak, Ala apuri mbogut paga mendek aret me, ninoone yogwe niinok, it Ala apuri nogo nen mban inaruk konenggo menggaarak. Ndi, Ala apuri lek kenok perak, nit ninoone yogwe nogo konenggulik aret o. Nit ninoone konengga'lek ti paga, ”Aberiniki nen yorage kenok yogwe ilik, iniki koombunuk pilit yogwe a?” yinuk, nineenu ogo monggoorak.

⁷Noreewi o. Kit an niniki kunik me, wone yi ambi inom yokkira o. Aakumi niniki kunik aganako logowok nduk, Ala nen aret eeppinanege menggerak me, niniki-kiniki kunik eeko logowok o. Ninoreewi ninom niniki kunik mbakwi niinok, ”Ti Ala nen aret ndaganabeegerak me, inogoba Ala ineenu aret iigo,” yinuk, yogo logogun.

⁸Ndi, at Ala nen yi aap ndi aap abok aret inabuwa mbake logonet, iniki kunik lombok aganake kagak kwe, nit ninoreewi niniki kunik aganakwi lek niinok perak, ”It yi Ala ineenggo'lek aret iigo o,” yinuk, mbako logogun o.

⁹Nit nineenik logowok nduk, at Ala nen aput ambolom nggween paga nappi wagagerak ti paga, Ala abet aret ninabuwa mbake logonet, iniki kunik ee'ninake menggerak yelok kogo ogoorik o.

¹⁰Ninoreewi niniki kunik aganaburak nogo ti, ngge kokwak mbakop? Lek o. Nit nen Ala niniki kunik eerulik kwe, Ala ninabuwa nen iniki kunik ee'ninake nagagirik, at aput nen ninomaluk lek eerogo pege logonet, Ala iniki yanggombunuk, ninom lambumbinanuwak nduk, at aput aret nappi wagagerak nogo kwak, ninoreewi ninom niniki kunik aganako logowok o.

¹¹Noreewi niniki kunik me wa! At Ala nen togop aret ninabuwa mbake logonet, iniki kunik ee'ninabeegerak me, nit ndak-ndak ninoreewi ninom niniki kunik aganako logowok o.

¹²Nit yi aakumi ndi aakumi abok aret Ala eebe ninigen kaga'lek aret wonogwe kwe, ninoeewi inabuwa mba'nuk, niniki kunik aganakwi niinok perak, Ala ninom kunik logonet, at aakumi ando eebi mbake, ando inikilom mbake, eekeelik abok aret inabuwa mbake menggerak nogo kwak, nit togop aret aakumi abok aret inabuwa mbako logowok nduk, ee'ninake menggerak.

¹³At Ala nen Aberiniki wo'niragagerak ti paga at nen nit ninom kunik wonage, ndi, nit nen at ninom kunik wonogwe nogo nineenu aret o.

¹⁴Ndi, ninogoba nen yi aakumi ndi aakumi abok aret inagap ndaruwak nduk, at aput nappi wagagerak nogo ninigen kogo nogogurik, paganogo yokkirogo monggoorak.

¹⁵Kit nen, ”Yetut ti, Ala aput aret o,” yinuk, paganggwi kiinok. At Ala nen kit iniki kunik wonage, ndi, kit nen at kiniki kunik wonogwe, eeko logomunggup o.

¹⁶At Ala ninabuwa mbake nagagirik, iniki kunik ee'ninabeegerak nogo, liippunuk, nineenu ogo nogogurik, abet aret mbako ogoorik o. At nen nit yi aakumi ndi aakumi abok ninabuwa mbake logonet, iniki kunik ee'ninake menggerak me, kit kinoreewi kinom kiniki kunik mbakwi kiinok, Ala nen kit kinom kunik wonage, ndi, kit nen Ala kinom kunik wonogwe, eeko logomunggup o.

¹⁷O peebi age yobok ninowak loonninaburak eyom paga nit nen mbako logonet, ”At Yetut eeke nagagerak nogo kwak, nit o nggween paga logonet, ndak-ndak eeko nogogurak o,” mba'nuk, ninagabiti mbaka'lek niniki teeluk logowok nduk, at Ala nen ambi eebi mbake, ndi, ambi abuwa mbake, eekeelik abok aret ninabuwa mbake menggerak nogo pogom, nit yogondak ndak-ndak yi aakumi ndi aakumi abok inabuwa mbako logonet, niniki kunik aganako logowok o.

¹⁸Aap ambi nen oreewi inabuwa mba'nuk iniki kunik aganake kenok, oreewi nen at inagabiti ombarugun lek o. At aap nogo nen abet aret inabuwa mbake me, inagabiti mbakwi nogo lek aret age menggerak kwe, ninagabiti mbakwi kenok ti perak, ”Noreeluk maluk eeppigirak me onggo noorigin kaamun ilik,” yinuk, ninagabiti mbakwi me, ninom niniki kunik lek negen aret mbako monggoorak.

¹⁹Aa'nduk at Ala nen nit ninabuwa mba'nuk, iniki kunik ee'ninabeegerak me, yogondak nit togon togop aret aakumi inabuwa mba'nuk, niniki kunik aganako logowok o.

²⁰Aap ambi at awot enegen kage logonet kwe, iniki kunik mbakeelik kenok, at Ala enegen kaga'lek me nonggop togon iniki kunik ombariyak mbakop? Meek me, awot eebi ombake logonet, ”An Ala niniki kunik aret o,” ari kenok, aap ti pilit pugungge aret o.

²¹At Ala nen ari logonet, ”Kit an kiniki kunik nombakwi kenok, kinoreewi kunduk inabuwa mbako logonet, kiniki kunik aganako logonip o,” yinuk, wone lengganogo yo'niragagerak me, yokkiragi o, noreewi.