Read Wano WAYU 1 Bible Online

WAYU 1 - Wano bible

WAYU 1

¹At Ala nen yi eeriyak ndi eeriyak logonuk lek mbet-mbet eriyak wone nogo, nit Ala ayeloman nineenu eeppinanuwak nduk, Yetut Keritut yoge mbareegi, at nen paganogo yo'niragagerak wone nogo yi aret o. Ala nen Yetut Keritut yoge mbareegi, ti'nuk, Ala ayeloman an Yaya nogo neenu eeppanuwak nduk, Yetut Keritut nen melaikat ambi wuppi wagagerak.

²Ndi, melaikat wuppi wagagerak nogo nen, an yo'nege mbareegi, ti'nuk, Ala nen wone yo'nege, ndi, Yetut Keritut nen paganogo yo'nege, eeke kagagirak nogo abok aret mbininogo liiru mbaneegirak yi aret me,

³wone yi eeriyak nogo abu panggo yegerak me, it aakumi nen peebi eeriyak wone liiru mbanak yi, pekkagak mbininogo yorogwe, ndi, yorogwe iigak, inaruk konembunuk, liirogon waganggwi, eekwi iinok, Ala nen ale'nggen inoba piige logogin o.

⁴An Yaya nen kit Ala apuri o Atiya nggereya 7 paga kuwak eerit nogo monggotak nogo, keyage wappinagi o. Aa'nduk inom, yogondak inom, peebi inom, mondok itok menggerak at Ala nogo inom, ndi, aakumi inogoma kwak Ala ake eeko logowak nduk, ineebe 7 Ala wone lengganogo yorage minggim menggaarak nogo inom, ndi, eeruwak nduk nappi wagagerak Yetut Keritut nogo nen, mondok liippunuk yubuk togon eeke nagagirik, kambunuk nogo menggam nen ineenik a'nuk mi'naga'lek me, at aa'nduk mi'nage nagagirik, yogondak it aap nggween paga mendek inoweewi nagawan-nagawan abok inowe endagembogut mippereegerak at Yetut nogo inom, it abok aret iniki kunik en wokkirogwe, ndi, kiniki obeelom logobagip nduk, eeppinagagwi, eeko logogun o. At Yetut Keritut ninabuwa mbake menggerak me, amiya paga ninomaluk koorogo pinanege nagagirik,

⁶abu'me pinaninuk, at ogoba Ala unde logonet ake eeko logowok nduk, leenogo mippinaneegerak me, nit yi aakumi ndi aakumi abok aret at endage mban mondok-mondok tiyappogo logonet, abu'me tebe yinuk, oone konenggo logowok o, yinuk, amin!

⁷At ndugwi paga wage kenok, it yi aakumi ndi aakumi inanebunu lombok abok aret at wareegwaarak mendek inom inalitak lombok nen inigen kogo logomenggaarik, leenggu maako logogun me, liippogo logonip o, yinuk, abet aret yokkiragi o. Amin.

⁸Aa'nduk inom, yogondak inom, peebi inom, at mondok itok omaawi ambik menggerak ninogoba Ala nen ari logonet, ”O maan aa'nduk togon wonagagirak Alpa inom, ndi, peebi irip paga mondok logorak Omega inom, ti an aret o,” yinuk, yereegerak.

⁹Kit aaninggin-paaninggin kinoba pinagagwi iigak kwe, ”Ala abu'me pinanigin me, op aret o,” yinuk, Yetut kinom kunik kiniki nu'lek logonet waganggo monggotak nogo ti, an kinore Yaya togop ndak-ndak eeppanugwi iigak, wagangge minggirak nogo nen Ala wone yorage, ndi, Yetut Keritut nen wone ari nagagerak nogo paganogo yorage, eeke minggirak nogo paga niyo yenggenak oolo kup mbanak o endage Pa'mot pani wogogwaarak yime wonage me,

¹⁰ninowe Yetut mi'nagagerak Hari Minggu eyom nogo paga Aberiniki ninikime lik ari mbaki, nambokan nen mbuti luu'ngget negen oone nggwok ari naruk konengge neegak,

¹¹yo'nege logonet, ”Eeriyak titikkege neegak, mbuku paga liiru mbangge logominggindik, it Ala apuri o Epetut inom, Timerina inom, Peragamut inom, Tiyatiriya inom, Taririt inom, Pilarelipiya inom, Laworikiya inom, nggereya 7 wonogwe nogo abok aret pekkaawak nduk, nappunu o,” yinuk, yo'nege konenggirak o.

¹²Naruk konengge nagarik, ”Ta nen yo'nege agaarik o,” yinuk, eebe nenegen kaakit nduk, nena logurogon pekkage nagarik, ndi wununggak yuwak nduk, ineebe 7 mbuti emas paga ogobakkigirik kwi'ndak wonage kagarak o.

¹³Ndi, ndi ineebe 7 ogobakkigirik nogo inenggela'me oolo taati aakumi inetenggen pogom ambi wonage kagarak. Aap ti nogo ambogoyum nggorek nok iyok me linik yirik wonage, mbam mbuti emas mendek obate paga nggerenak wonage,

¹⁴towe yanggwi eeruwak abinak lan ari nogo pogom at eeruwak kenen tele aago wonage, enegen kani omoonuk wunuk ari pogom wonage,

¹⁵ndi, mbuti tembaga kani kunik me mambugwi iinok, eyak kwindagalan eerogo pegetak me, abinak pigan-pigan eeke minggi kwak, iyok togop aret abinak pigan-pigan eeke, niyoraakut oone wo-wo wangge minggi pogom, at oone togop aret ari,

¹⁶at eenggi abe'nggan paga laaluguragan 7 porogo wonage, mbuti togowa ngget peenok-peenok maarak ambeme titik aago wonage, ndi, oonegen ndelenak-welenak eeke nogo pogom, at etenggen togop aret wonage, eeke kagarak o.

¹⁷At eebe togop aago wonage nenegen kage nagarik, aakumi inambuluk yuppuk nggin ari nogo mengga kwak, an togop aret at abu'me nggin ari nage mbaki, at eenggi abe'nggan paga pi'nake logonet, ”An neenik nitok logonet, aa'nduk togon wonagagirak inom, peebi irip paga lombok mondok logorak inom, ti an aret me, kagabiti mbarugun o.

¹⁸An aa'nduk kambeegirak kwe, yogondak perak, neenik mondok-mondok wonage logonet, kanggwi inom, kambunuk nogo menggam inom, imbirak an mban aret unde logonet, tu paaka kunci porogo minggirak me nduk, yokkigi o.

¹⁹Togop me, yogondak eekwi inom, ndi, ti eeppunuk, peebi eeriyak nogo inom, abok aret titikkege neegak liiru mbanogo pege logot o.

²⁰Laaluguragan 7 neenggi abe'nggan paga kagandak nogo inom, ndi, ndi wununggak yuwak nduk, ineebe 7 mbuti emas paga ogobakkigirik kagandak nogo inom, ti wone nobarak negen wonage me, alom liirogon yokkiri o. Laaluguragan 7 nogo ti, it Ala apuri nggereya 7 paga kuwak eekwi inarum menggaarak melaikat nogo aret iigen o. Ndi, ndi ineebe 7 nogo ti, Ala apuri nggereya 7 paga kuwak eeko menggaarak nogo aret iigen o,” yinuk yo'nege kagarak o.