Read Wano WAYU 12 Bible Online

WAYU 12 - Wano bible

WAYU 12

¹Ti'nuk, mbogut paga time inagabiti warak eerubok mendek ambi nggwok eeke kagarak. Kage logonet, kwe ambi tut eebe paga mi'ndak wonage me, ambogoyum negen ti oonegen aret yirik, ndi, anobak paga nggare-nggare mendaarak enggela'me laaluguragan 12 nabenak wonage kagarak.

²Kwe nogo, abila wonage me, aagaluk ndariyak nduk enegen paganak andi nen yagan wake logonet, kwa ari kagarak.

³Ti'nuk, mbogut paga time inagabiti warak mendek alik ambi eeke kagarak. Kage logonet, waalo nggwok tinambe pogom agabolo maa'ngga kunik me, eebe ambit aret kwe, anobak 7, ndi, anobak nogo paga eyak 10 wonage kagarak. Anobak 7 nogo paga abok aret nggare-nggare mendaarak yirik kagarak.

⁴At waalo nogo age paga laaluguragan mbogut paga wonage nogo ando iigak, ando 1/3 nogo pelenogo nggween paga mbo wuppit wage kagarak. Kage nagarik, waalo nggwok nogo nen, ”Kwe nogo aagaluk ndake kenok, naakit o,” yinuk, owagam enaarak wonage kagak,

⁵yi aakumi ndi aakumi endekem konenggulik mendek abok aret inarum logonet, oone omaawi paga inaruk wake logowak nduk, at kwe nogo nen aagaluk aap aret ndake mbaki, wonok wone lengganogo yorage minggim at Ala owagam pi lagangge kagarak.

⁶Pi lagangge mbaki, agalo nogo, logowam Ala nen ogobakkigirogo pereegim karume aakumi lek me time kole nagaarak wonage me, Ala nen arum wonage kagak, nogo 1,260 yit nage kagarak o.

⁷Ti eeke kage nagarik, at Mikayen awuri melaikat mendek inom nen at waalo nggwok tinambe pogom nogo, awuri inom mbogut paga time wim nambukwi iigirak.

⁸Nambuko logonet, it nen waalo nggwok nogo awuri inom tebenogo piigo nagaarik, ”O mbogut paga yime logorak lek o,” yinuk,

⁹at waalo nggwok nogo awuri inom mbelenogo nggween paga mbo wuppiya wagaarak. Waalo nggwok wuppi wagaarak nogo ti, o maan nen yi aakumi ndi aakumi abok aret inambokan lagangge menggerak Ibilit, Tile nogo aret me, at awuri inom abok aret mbogut paga nen mbelenogo nggween paga wuppiya wogwe iigirak o.

¹⁰Mbelenogo wuppiya wogwe iige nagarik, oone nggwok ambi mbogut paga nen ari logonet, ”At Ala enggaanom paga ninoreewi Ala apuri ko'lu-kii'me pilit wone inoba piige menggerak nogo, muk wuppi wagaarak me, at Ala omaawi paga Tile tebenogo punuk, ninagap ndake, ndi, Kinowe endagembogut an aret o, yinuk, yi aakumi ndi aakumi abok at abu'me piinok, at leenogo mippereegerak Keritut oone nogo mban konenggwi, eeriyak eyom ari waga o.

¹¹It ninoreewi nogo nen Ala andomba amiya wundeegerak wone nogo abet mba'nuk, iniki ti paga panggombunuk logonet, Ninooriyak op aret o, yinuk, inagabiti lek logonet, Ala wone wonok yoranet nugwi paga Tile tebenogo pugwi iigirak me,

¹²kit mbogut paga monggotak yi, kiniki ale'nggen mbakwi kiigak kwe, it nggween paga wonogwe nogo inom, niyo nggwok yenggenak paga wonogwe nogo inom, it perak, at Ibilit inenggela'me wuppi wagaarak nogo nen, An ne mbereeluk logonuk, nenggaawak lek arigin kagi, mba'nuk, anini nen aakumi lale-pale eerogo piinet nage logogin me, inabuwa o,” yinuk, ari kagarak.

¹³Ndi, at waalo nggwok nogo nen, ”An nggween paga abu aret wuppani wagaarak kagi,” mbake nagaarik, kwe aagaluk wulaga ndakerak nogo, mugurok nage mbaki,

¹⁴wake kero, Ala nen towe wu a'naabit kokwak kwe nogo a'naabit warak eeppege mbaki, wuga agan, o at logowam ogobakkigirogo pereegim karume nogome nagaarak wonage me, Ala nen arum wonage kagak, 3½ tahun eeke kagarak.

¹⁵Ndi, kwe nogo nage kagak, at waalo nggwok nogo nen kwe nogo niyo nen ndonggonggolaawak nduk, niyo nggwok wu'nuk nage minggi kwak, at ambeme nen kilirogo aru nggaruk nappegerak kwe,

¹⁶at Ala nen kwe nogo abuwa mbake logonet, nggween eno pelengge mbaki, waalo nogo nen niyo kilirogo nappegerak nogo, nggween abu'na lek ari wangge kagarak.

¹⁷Ti eeke mbaki, at waalo nggwok nogo nen anini agaket ari nagaarik, ”Ala nen, Yogop ee'nu ndogop ee'nu, yereegerak wone liirogon eerit nogwe inom, Yetut nen paganogo yoragagerak wone abet mba'nuk mugurok nogwe inom, kwe nogo aagalogwe ando it aret me, ninom wim namburi naakit o,” yinuk,

¹⁸niyo nggwok yenggenak aa'nggi paga enaa'nari nagaarak wonage kagarak.