Read Wano WAYU 14 Bible Online

WAYU 14 - Wano bible

WAYU 14

¹Yo'nege kage nagarik, wonage me, it aap ineebe apit 144,000 nogo Ala andomba endage inom, at ogoba endage inom, inalitak lombok inenggaawak paga liiru mbanak Ala andomba nogo inom puut Tiyon nogo paga mi'ndak wonogwe nenegen nagiigirak.

²Nagiige nagarik, niyoraakut oone wo-wo ari, o ngguurubu ari, eeke nogo pogom mbogut paga nen luu'ngget nggwok nggitat oone eekwi nogo pogom, oone nggwok ambi ari naruk konenggirak.

³Konengge nagarik, at wone lengganogo yorage minggim menggerak eebe nogo inom, it aakumi nen iigulik mendek ineebe 4 nogo inom, it mbogut paga wonogwe inoweewi inom, tiyarogon iigak, it ineebe 144,000 nogo nen inabu'me wanggeko logonet, ndawi ngget mendek wakwi iigirak. Ndi, ndawi wakwi iigirak nogo ti, it aakumi ugun nen mamumbunuk tiyaniyak abu meek o. Ata, at Ala nen, ”It o nggween paga time logorak lek o,” yinuk, aap 144,000 inagap ndarogo piyareegerak nogo nen mban tiyaniyak perak op me, tiyanggwi iigirak o.

⁴It aap ti, kumi wogonakulik me, kumi inom mondok labungga'lek aret menggaarak. Yi mendek ndi mendek aa'nduk mendek Ala ake pogo mengga kwak, aakumi ando iigak, it nogo mban Ala inom, at andomba inom, inake leenak inom nugu logowak nduk, inonggo mbanogo inagap ndareegerak me, Ala ndomba nogo mban inom nugu menggaarak.

⁵It nogo pilit wone ambi abu yogolik me, maluk ambi inoba lengganak lek aret iigirak o.

⁶Ti iige nagarik, Ala ayonggo melaikat ambi mbogut oolo taati wuga agan nage logonet, ”Kit aakumi kinanebunu alitak lombok inom, kinoone alitak inom, kinagabolo alitak inom, yi aakumi ndi aakumi nggween paga monggotak abok aret wone lek ageelik, wone obeelom mondok menggerak wone yokkirage yi konenggo logonip o,”

⁷ari nagaarik, ”Mbogut inom, nggween inom, niyo nggwok yenggenak inom, niyo eneeri wungge menggerak inom, at Ala nen mban wakkagagerak me, yogondak Ala nen kinawone amburu mbanogo owak loongginaburak eyom abu korok panggo yegerak me, kinagabiti nen at Ala mban ayuk wuko logonet, at abu'me tebe yinuk, endage tiyappogo logonip o,” yinuk, oone nggwok paga agan nage kagarak.

⁸Yorage mbaki, ore ambi wage logonet, ”It aakumi o nggwok Mbaben eeko menggaarak nogo ti, kwe mbabilu ya wukak pogom me, amburu nenok kumili kumbunuk ugun-ugun eerit nogo mengga kwak, it kumi ugun wurinabit nugwi, iniki nengge kenok ugun eerit nugwi, eeko logonet, Nit eekwi yi, it yi aakumi ndi aakumi inanebunu lombok abok aret ndak-ndak eeko logowak o, yinuk, mamuninako menggaarak me, inawi inom, ineebe inom, abu pup eerogo piigi o. Pup eerogo piigi o,” yinuk, ari naruk konenggirak.

⁹It Ala ayonggo nappiige menggerak melaikat mbere nogo wone ti, yorogo mbaka, alik ambi wage nagaarik, oone nggwok paga ari logonet, ”It aakumi nen nggeewo nogo inom, at ogut wakkagak kuguwak ogobakkigirik nogo inom, inalut eeko logonet, it inapuri yelok logowak nduk, ineenggi paga ilik, inenggaawak paga a, nggeewo endage liiru mbanak wonage kenok,

¹⁰anggur amburu niyo inom toolak lek, at mban toolak nonggo logonet ale ambik kogo mengga kwak, at Ala nen it aakumi ti, inabuwa mbaka'lek anini mondok alik negen inoba piige logominggirik, kani omoonu'me nappiige mbariminggi, it Ala ake leenak obeelom menggaarak melaikat inom, at Ala andomba inom, inigen iigak, Kani omoonuk eyak o. Yugum yugu andi o, yinuk, yagan yobak-nggolak wako logogun o,” yinuk, ari naruk konenggirak.

¹¹”It aakumi ineenggi paga ilik, inenggaawak paga a, nggeewo endage liiru mbanak logonet, nggeewo inom, at ogut wakkagak ogobakkigirik nogo inom, inalut eeko logomenggaarak nogo, kani omoonu'me logonet, liingge inom, oonikiya inom, ka'luk nogo nggaruk yaga'lek mondok-mondok inoba wungge kagak, tat yonggongga'lek mondok-mondok yagan wako logogun o,” yinuk, ari naruk konenggirak.

¹²Ari naruk konengge mbaki, at oone yo'nege nogo nen, ”It iniki Yetut oba panggombunuk, Ala nen, Yogop ee'nu ndogop ee'nu, yereegerak wone liirogon mugurok nogo menggaarak Ala apuri nogo nen, Nit togop ee'ninaburak ninagabiti o, yinuk, andi-pandi inoba piigwi iigak kwe, inogogumbuk logonet, waganggo logowak o,” yinuk, yo'nege kagarak.

¹³Ti yo'nege kage nagarik, ti'nuk mbogut paga nen wone ambinom yo'nege logonet, ”Yogondak en it aap ninowe endagembogut inom kunik logonet kanggwi nogo, iniki ale'nggen aret mbako logowak o, yinuk, liiru mbanu o,” yo'nege mbaki, liiru mbangge me Aberiniki nen, ”Abet aret o. It ta'liila eeginake kagak yabu eerit nugu logomenggaarak nogo kanggwi iinok, at Ala nen kobak eerogo pigin lek o. Onggo ndak-ndak wogorage kenok, iniki ale'nggen mbako logonet, tat yonggonggologo logogun o,” yinuk, ari naruk konenggirak.

¹⁴Wone ari nogo naruk konengge nagarik, aap pogom ambi nggare-nggare mendaarak makoota mbuti emas mendek anobak paga yirik, ndi, paloowi ena yomonak erak ambik eenggime porogo logonet, ndugwi abinak lan ari nogo paga kwi'ndak wonage nenegen kagarak.

¹⁵Kage nagarik, ti'nuk, melaikat alik ambi Ala awi wurik me nen wundi wage nagaarik, oone nggwok paga nen at ndugwi paga kwi'ndak wonage nogo yoge logonet, ”Iri'ngga awi yarak nogo anggen abu kole agaarak me, mbet-mbet nggween paga ogu time mbani wambu o,” yinuk

¹⁶yoge mbaki, at ndugwi paga wonage nogo nen paloowi erak ambik nogo paga yi awi ndi awi o nggween paga time iri'ngga anggen abu kole agaarak nogo, abok aret mbani wangge kagarak.

¹⁷Ti'nuk, mbogut paga Ala awi wurik nogome nen melaikat ambi paloowi erak ambik eenggime wonok wundi wage kagarak.

¹⁸Ndi, melaikat alik ambi Ala aanggo warogo kani kungge menggerak unde nogo kungge minggim nogome nen wundi wage nagaarik, at melaikat obaloowi aa'nduk eenggime wundi wagaarak nogo, yoge logonet, ”O nggween paga ogu time anggur anggen yugu nogo, abu kole agaarak me, mbanogo yonggoli nak o,” yinuk,

¹⁹yoge mbaki, at melaikat nogo nen anggur anggen nogo mbanikit nduk obaloowi nggween paga wuppi wage nagaarik, anggur anggen nogo abok aret mbanogo punuk, Ala anini nen aambiranuwak nduk, aambirangge minggim nogome mambege kagarak.

²⁰Mambege mbaki, anggur anggen amburu aambirangge minggim yagat endekem nogome nen aambirangge logonet, aakumi inamiya niyo wurik negen yenggenit lagangge logonet, aloguk ambik wam kunda anobak ndak-ndak age nagaarik, niyo wurik pogom oonebu agan irip o nda 1600 stadia ti, 300 kilometer ndak-ndak negen ari nage kagarak.