Read Wano WAYU 15 Bible Online

WAYU 15 - Wano bible

WAYU 15

¹Ti'nuk, peebi mbogut paga nen inagabiti warak mondok iya tam warak negen eeke kage logonet, melaikat ineebe 7 nen aakumi andi aganabuwak nduk, kugi alom 7 unde wonogwe iigirak. It melaikat 7 yi nogo nen aakumi andi aganabuwak nduk, kugi 7 nogo inoba piya woramenggaarak andi aganabit nogwe iinok, Ala anini mbake nogo lek age logominggirik, iniki yanggo yigin me, wone agan wogoorak yi nogo abok aret eeke kenok, irip paga eeppiyoorak nduk unde wonogwe iigirak.

²Iige nagarik, yilaa'nggun nggwok yenggenak negen kwe, etenggen wukagi pindan-pindan eeke me, enggela'me nen kani omoonuk wungge kagarak. Kage nagarik, nggeewo aa'nduk lagi wagaarak nogo nen, ”Kit an noone waganggwi, an nogut wakkagak ogobakkigirik nogo alut eekwi, ndi, an nendage kinenggaawak paga liiru mbanak nogo wonok nugwi, eeko logonip o,” yinuk, yoragaarak kwe, ”Nit kat koone woorak mondok lek o,” yinuk, oone taganogo mbo pogo mbaka, Ala nen tiyappiigerak nogo nen yilaa'nggun nggwok yenggenak etenggen wukagi pogom nogo aa'nggi paga mi'ndak at Ala aluu'ngget nggwok nggitat nogo pogom oone eeko logonet,

³Ala ayeloman Muta endawi inom, Ala andomba nogo endawi inom, wako logonet, ”Ninogoba Ala kat kalik komaawi ambik aret o. Kat eeke menggendak nogo ti, aakumi inagabiti warak eerubok mendek mondok iya lombok eeke menggendak o. Yi aap ndi aap inowe endagembogut kat aret o. Kat eeke menggendak nogo ti, mondok a'me nggelok obeelom mban eeke menggendak o.

⁴It taani nen kayuk wuppunuk, tiyappaga'lek logogun mbakop? Lek o. Kat kalik maluk eekeelik obeelom mban wonage me, yi aakumi ndi aakumi inanebunu lombok abok aret, At alik mondok a'me nggelok eeke menggerak nineenu me, at mban ninawone mbangge logowak o, yinuk, kowagam wogo logomenggaarik, kalut eeko logogun o,” yinuk, ndawi togop aret wakwi iigirak.

⁵Ti wakwi iige nagarik, Ala ninom wonage mbaruwak nduk, awi ooliya mbogoyum paga wurik mbogut paga wonage nogo tu paarak kage nagarik,

⁶nogome nen melaikat ineebe 7 aakumi andi-pandi eeginaburak kugi alom 7 unde wonogwe nogo wundi wogwe iigirak. It nogo inambogoyum mondok kigirikwe laambu abinak pindan-pindan aago yirik, ndi, mbam tabak mbuti emas paga ogobakkigirik inobate paga nggerenak wonogwe iigirak.

⁷Iige nagarik, it aakumi nen iigulik mendek ineebe 4 nogo ambi nen at Ala eenik mondok itok menggerak anini aakumi inoba piyaawak nduk, togolowak mbuti emas paga ogobakkigirik nogome eno korok togon toolak it melaikat ineebe 7 nogo wogorage kagarak.

⁸Wogorage kage nagarik, Ala mondok omaawi me, eebe eya ndelenak-welenak eeke enggela'me nen ka'luk wungge logonet, Ala awi wurik me mondok endak wa'nage mbaki, it melaikat ineebe 7 nogo nen kugi alom 7 nogo paga aakumi andi ogo logonet, kambit nogo logowak nduk, inoba nappiigwi nogo wubuk togon nappiiga'lek iigak, aakumi nen Ala awi wurik me time ungguurak meek aret age kagarak.