Read Wano WAYU 17 Bible Online

WAYU 17 - Wano bible

WAYU 17

¹Ti yogwi iige nagarik, it melaikat ineebe 7 Ala anini toolak porogo wonagaarak nogo, ambi an nowagam wage nagaarik, yo'nege logonet, ”O koota Mbaben niyo kunit wage minggim nogobak-kogobak paga o wurik nogo ti, kwe yawukak lombok pogom me, yi aap ndi aap inendagembogut nen wuri wogwe, ndi, yi aakumi ndi aakumi nggween paga menggaarak abok aret amburu nenok kumili-kumili negen agan nogo mengga kwak, kwe nogo pekka ungguwak nduk, nili-kili yogwe, eekwi me, at Ala nen kwe nogo maluk onggo oba kwippege kaanok nduk, omok o,” yinuk, yo'negerak.

³Yo'nege mbaki, Aberiniki nen ninikime lik ari mbaki, melaikat nen wo'neren karume aakumi lek me time pani nagaarak wonage me, nggeewo nggwok anini warak ambi eeruwak maa'ngga kunik, ndi, anobak 7, ndi, aruk alom me eyak 10 wonage me, kwe ambi amborowak paga kwi'ndak wonage kagarak. Ala miyuk-meya eerogo pogo logonet, yogo menggaarak abok aret nggeewo eebe nogo paga liiru mbanak kuurik lek aago wonage kagarak.

⁴Ndi, kwe nogo ambogoyum maa'ngga kunik laambu lombok yirik, ndi, mbuti emas inom, yugum etenggen abe inom, kundali inom, nogo paga ogobakkigirik abok aret oba li'luk eekko'nok, at maluk eerit nage menggerak abok aret togolowak mbuti emas ogobakkigirik nogo paga niyo toolak kwak eenggime porogo logonet, ”Wu'nabi woraanip o,” yinuk, ari kagarak.

⁵”Yi aap ndi aap eeko menggaarak kagak, kumi paga mban iniki luunik logonet, nggeewo negen kumi ugun-ugun wurinabit nugu menggaarak inagalo o koota nggwok Mbaben an aret o,” yinuk, enggaawak paga endage liiru mbanak wonagaarak. Ndi, endage mbanak wonagaarak nogo ti, eegu laarogo negen mbanak me, aakumi liippuurak meek aret wonagaarak.

⁶It abet mbareegwaarak Ala apuri inom, Yetut eeke nagagerak wone mbo pega'lek mondok mugurok nogo menggaarak ineebe inom, kwe nogo nen inooppiinok, inamiya anggur amburu negen nenok, kumili negen kunggerak kage nagarik, wi mbakirak.

⁷Wi ari mbaki, at melaikat wo'neren nagaarak nogo nen, an yo'nege logonet, ”Kat nonggop nduk wi ari agandik? At kwe nogo inom, at nggeewo nggwok anini warak anobak 7, ndi, eyak 10 nogo nen kwe nogo wonok nage kagandak nogo inom, imbirak eeko menggaarak inawone alom paganogo yokkiri o.

⁸Nggeewo nggwok anini warak kagandak nogo ti, aa'nduk wonagagerak kwe, lek age nagagirik, ti'nuk, mbuun ambena nen lagi woraakit nduk, eeke me, Ala nen enggaawak lek eerogo pege kaamunggun o. Ndi, it mbogut-nggween wakkaga'lek kagak mondok-mondok ineenik aganaburak inendage mbuku paga liiru mbanulik, o nggween paga awo kangga'lek ineenik wonogwe nogo nen, nggeewo nggwok aa'nduk wonagagerak kwe, lek age nagagirik, ti'nuk, kin ari wage inigen kogo logomenggaarik, it kunduk, wi mbarugun o.

⁹It aap iniki warak nen wone yokkirigin yi nogo liippogo logowak o, yinuk, yoraanok nduk yokkigi o. Anobak 7 nogo ti, puut 7 aret me, kwe ti paga kwi'ndak wonage kagandak.

¹⁰Ndi, puut 7 kwe kwi'ndak wonage kagandak nogo ti, aap inendagembogut ineebe 7 aret me, ineebe 5 nogo ti muk inendage lek ogogwaarak kwe, ambi nogo ti, awo mi'ndak wonage, ndi, ambi perak, peebi mi'narigin o. Mi'nage logominggirik, ne ambit logonuk, endage lek aret arigin o.

¹¹Ndi, nggeewo nggwok anini warak aa'nduk wonagagerak kwe, lek agagerak nogo ti, it aap inendagembogut ineebe 7 nogo lek ogwe iinok, inobaane'me it nogo mendek ambi mi'nage mbariminggi, Ala nen enggaawak mondok lek eerogo pege kaamunggun o.

¹²Ndi, eyak 10 kagandak nogo ti, it aap inendagembogut ineebe 10 aret kwe, aakumi inarum logowak nduk, awo unde eeppiiga'lek me, at Ibilit nen aakumi inanebunu alitik-alitak nggeewo nogo inom, we luulu inarum wonogwe iigak, 1 jam aruwak nduk, unde eeppiige kaamunggun o.

¹³Unde eeppiige mbariminggi, inendagembogut ineebe 10 nogo nen iniki ambit eeppunuk, nggeewo nogo yogo logonet, Kat kendage mban tiyak yuwak nduk, ninawuri ninom yeenggwaagiruwok o, yinuk,

¹⁴Ala andomba tebenogo puwok nduk, inom wim nggagambunuk namburit namenggaarak kwe, Ala andomba nogo ti, aakumi inoweewi inarum menggerak inogoba inom, yi aap ndi aap inendage warak inowe endagembogut inom, at alik aret me, apuri miirinake nagagirik, yonggo piyareegerak inom liirogon eerit nogwe nogo, inom wunggo logonet, nggeewo awuri inom tebenogo piinok, mappiige kaamunggun o,” yinuk, yo'nege kagarak.

¹⁵Yo'nege kage nagarik, ambinom yo'nege logonet, ”Niyo kunit wage minggim nogobak-kogobak paga kwe yawukak kwi'ndak wonage kagandak nogo ti, yi aakumi ndi aakumi inanebunu lombok inom, inagabolo alitak inom, inoone alitak inom, ineebe ti aret iigendak o.

¹⁶At Ala nen, An yereegirak nogo a'me nggelok yuwak o, yinuk, aap inendagembogut ineebe 10 nogo iniki ambit eeppunuk, awuri inom nen nggeewo nogo yeenggwaarogo logonet, Ala kooneegerak nogo mban eerit nogo logowak nduk, inikime mambiige mbariminggi, it aap inendagembogut ineebe 10 nogo nggeewo inom yogo logonet, Kwe yawukak yi abu nineebi o, yinuk, amindik-amendek li'luk eerak nogo nggoorogo mbo pogo logonet, we agap mbelenak kagak warogo punuk, enggaanggum ando nunggwi, ndi, ando kani kumbugwi, eekwi kaamunggun o.

¹⁸Ndi, kwe kagandak nogo ti, o koota nggwok nogo pogom aret me, yi aap ndi aap inendagembogut nggween paga menggaarak nogo abok aret at kwe yawukak nogo abu'me logonet, oone konenggo agaarik o,” yinuk, yo'nege kagarak.