Read Wano WAYU 18 Bible Online

WAYU 18 - Wano bible

WAYU 18

¹Ti yo'nege mbaki, melaikat alik ambi, oone omaawi paga yorage logowak nduk unde eeppegerak nogo, at abinak ndelenak-welenak ee'nuk nggween paga eya eerit wambi wage kagarak.

²Wambi wage nagaarik, oone nggwok ari logonet, ”O koota nggwok Mbaben nogo mondok lek eerogo pigi o. Lek eerogo pigi o,” ari nagaarik, ”It koota Mbaben menggaarak nogo ti, kwe yawukak pogom me, kwe nogo nen iniki nengge kenok, Wu'nabi woraanip o, ari kenok, yi aap ndi aap inanebunu lombok abok aret, anggur amburu nenok, kumili-kumili agan nugu mengga kwak, ugun-ugun wukko'net nogwe, yi aap ndi aap inowe inendagembogut o nggween paga menggaarak abok aret kwe nogo wukkola unggwogwe, ndi, kwe nogo ti, wukkologo logonet, it aakumi yi awi ndi awi toko unde menggaarak nogo, onggo wogoragaatak paga ineenggi warak eekkologwe, eekwi iinok, o Mbaben nogo pup eerogo pegerak me, yogondak yi kugi ndi kugi inom, it kambeegwaarak inogoma inom, yi towe ndi towe nen aakumi kanggaatak nunggwi iinok, inogole yogo menggaarak inom, abok aret inawi eekkolaga o,” yinuk, oone nggwok paga ari naruk konenggirak.

⁴Konengge nagarik, mbogut paga nen oone alik ambi ari logonet, ”Kit an napuri kenok, it o koota Mbaben maluk eeko menggaarak nogo obaga lu'luk eerit mbogut ndak-ndak ari lagangge kenok, at Ala mondok aberak wonage me, kinom eerit nogwe kiinok, it maluk onggo inoba piige logonet, kinom kinooke kero, o time mbo punuk, kole mbaganggo logonip o.

⁶It Mbaben mendek nen kit aakumi eeppinagago nogogwaarak nogo, yogondak kit nen it onggo ndak-ndak eeppiigwi, ndi, kit maluk eerit nogo nogogutak nogo, it Mbaben mendek nen onggo ne ambit paga maluk kinoba pinagago nogogwaarak kwe, yogondak kit nen onggo ne mbere paga maluk inoba piigwi, ndi, it kinom ogoorak wonogo logonet, inanini yi toolak kwak ne ambit kinoba kilirogo pinagago nogogwaarak kwe, yogondak onggo kit kinanini inoba piigo logonet, ne mbere paga kilirogo piigwi, eeko logonip o.

⁷Eeppiigo logonet, it Mbaben mendek nogo ti kwe yawukak nogo pogom me, iniki mbake logonet, An kwe togwe wonage nen niniki wakkolage logonet, le yikit lak kwe, aap pe'neya wogo menggaarak ineebe ambik wonogwe me, an kwe nggwok aret kagi, mba'nuk, niniki ale'nggen ambik mbake agarik o, yinuk, iniki wogoppake logonet, paalo aago mban wonage nogo obaane'me ale'nggen lek age logominggirik, andi yagan yobak-nggolak wake logowak nduk, aaninggin mondok oba kwippogo logonip o.

⁸At eerit nage menggerak awone amburu mbanogo owak loonigin ninogoba Ala nogo ti, omaawi ambik me, at wogoppatit nage onggo ne ambit liingge aaninggin oba age logonet, mbi abu age, andi nen aagalogwe kambit nogwe iinok, iniki wakkologo logonet, le ari kagak, eebe waganogo kani kumbugwi, eekwi iyaamunggun o,” yinuk, yo'nege kagarak.

⁹Yo'nege kage nagarik, ”It aap inendagembogut yi awi ndi awi menggaarak nogo nen, kwe nogo pekka wogo nagaatik, inom aberogon logonet, wukkolagak mban eeko nogogwaarak nogo nen, kwe nogo kani andi nen kwa ari inaruk konembunuk, Nit togon togop ee'ninake kero, ninagabiti o, yinuk, tayarogon taati mi'ndak logonet, Kit o koota nggwok abe Mbaben monggotak yi, ao. Nit ninomaawi ambik nineenggi warak me, obeelom mban logowok o, mbakwi kiigak, ne ambit iluk 1 jam teppinaganuk, wonagaarak kwe, maluk eeko nogotak onggo aaninggin mondok kinoba kwi'nagaarak me, ao, yinuk, o koota kwe yawukak nogo pogom aret me, kani nengge ka'luk inigen nakkogo logomenggaarik, iniki wakkologo logonet, aleenggu maako logogun o,” yinuk, yo'nege kagarak.

¹¹Yo'nege kage nagarik, it aap yi awi ndi awi toko unde menggaarak nogo kunduk, o koota Mbaben kwe yawukak pogom kani kumbugwi inigen kogo logomenggaarik, iniki wakkologo logonet,

¹²”Ninamendek mbuti emas inom, mbuti perak inom, yugum yeebibit inom, kundali inom, yum abe laambu lombok inom, yum omaawi mendek inom, yum laambu maa'ngga warak inom, yum abe mili-mili lombok inom, i obari abe ogobakkigirik inom, meeli-kono inom, yi mendek ndi mendek i abe paga ogobakkigirik inom, mbuti tembaga etenggen yaliingga yi'nip kunik nogo paga ogobakkigirik inom. Mbuti abe mbuti nogo paga ogobakkigirik inom, yugum moolingget paga ogobakkigirik inom,

¹³liiboongga inom, kiinde inom, obari abe kaawak nduk, iri'ngga kani kunggwi nogo mendek inom, inagabolo abe kaawak nduk, eyo mut amburu mbenanggwi inom, i yibi-nggami amburu nogo inom, anggur amburu inom, wam amburu inom, roti mbi woraka yigirik nogo inom, mbi-mbato inom, wam sapi-ndomba inom, kunda inom, nggweendo inom, aakumi ayeloman logowak nduk ineebe kunggoloorak inom, yi mendek ndi mendek anebunu pereegerak abok aret, nit kunggo monggom wonage kwe, ninamendek yi, taani nen kunggola wogo logogun o? Ai-ao.

¹⁴Kwe yi, kat yi mendek ndi mendek abe kigirikwe kenok mban, Name logowak lak ao, mbake nagandak kwe, yogondak lek agaarak me, aakumi pekkeya wogo logogun lek o.

¹⁵Ndi, it kinom o koota Mbaben menggaarak yi, ao. Inambogoyum abe kigirikwe etenggen laambu maa'ngga warak inom, etenggen mbogut mili kunik inom, yirik logonet, mbuti emas inom, yugum yeebibit inom, kundali inom, nogo paga inobaanggi-inobaangge li'luk eekko'nok keegi-wogi nogwe iinok, aakumi nen, O koota nggwok abe aret me, abok ineenggi warak aret o, yinuk, yogo menggaarak kwe, ne ambit 1 jam paga lek agaarak me, ao,” yinuk, o koota kwe yawukak nogo pogom aret me, kani andi nen kwa ari inaruk konembunuk, ”Nit togon togop ee'ninake kero, ninagabiti o,” yinuk, tayorogon taati aleenggu maakwi iigirak o. Ndi, it yiiro nggwok wonok nogo menggaarak inom, yonggolak nugu menggaarak inom, nogo logonet yiiro nogo ndegenggo menggaarak inom, ndi, onggo kolaawok nduk, yiiro wonok nugu menggaarak inom, abok aret tayorogon taati logonet,

¹⁸kwe yawukak pogom o koota Mbaben nogo kani nengge logonet, ka'luk lagangge inigen nakkogo logonet, ”Koota nggwok abe yogobi ambi wonage lek me, yi eeki o,” yinuk,

¹⁹wun inanobak paga yumbunogo wuppako logonet, ”It o koota nggwok abe menggaarak ti, ao. Aakumi inanebunu lombok abok aret inamindik-inamendek yi awi ndi awi nen yiiro paga wonok wogwe iinok, kunggologo logonet, ineenggi warak eeppiige nagagerak kwe, ne ambit 1 jam paga lek agaarak me, ao,” yinuk, inaleenggu maakwi iigirak. Inaleenggu maakwi iigak, at oone yo'nege menggerak nogo ambinom yo'nege logonet,

²⁰”Kit abet mbareegutak Ala apuri inom, obeelom wone yi awi ndi awi yoranet nugu nogogutak inom, Ala wone yorogo nogogutak nabi-nabi inom, kit mbogut paga wonogwe yi abok aret, kwe yawukak nogo pogom o Mbaben yi nen kinooreegerak nogo kinane'me Ala nen wake me, kiniki ale'nggen mbako logonip o,” yinuk, ari naruk konenggirak.

²¹Ari naruk konengge nagarik, nenegen neegak, melaikat omaawi ambik ambi nen wage nagaarik, yugum nggwok waganogo niyo nggwok yenggenak me mbo wuppege logonet, ”Yugum mbo wuppigirak yi kokwak, o Mbaben togop aret yigirik-noonom eerogo pege neenok, o ngga wurik wonagaarak negen kobak aret arigin o.

²²Kit o Mbaben monggotak yi, it aakumi inanebunu lombok abok aret iya kinombaruwak nduk, tili paganit nogo logonet, inambokan laganggwi, ndi, it abet mbareegwaarak Ala apuri nogo inom, Ala wone yorogo nogogwaarak nabi-nabi nogo inom, yi aakumi ndi aakumi nggween paga menggaarak abok aret inoorogo piinok, inamiya nunggwi, eekwi at Ala nen kiyareegerak me, mbuti luu'ngget inom, nggawiiwak luu'ngget inom, nggitat inom, oone eekwi, ndawi wakwi, eeko menggaarak nogo inom, yi aap ndi aap yi mendek ndi mendek ineenggi paalo aago eeko menggaarak inom, laago lako logonet, inale'nggen paga inoone agan nogo menggaarak inom, kwe amuli lako logonet, inale'nggen nen noone-koone yogo menggaarak inom, abok aret ambinom eerit nogo logonet, yogo logogun mondok lek o. Ndi, o koota nggwok me, ndi ambik wunuk agan nage nagaarak nogo yogondak ambit iluk ambi wunuk ari kogo logogun abu lek o,” yinuk, ari naruk konenggirak.