Read Wano WAYU 21 Bible Online

WAYU 21 - Wano bible

WAYU 21

¹Ti eeke kage nagarik, mbogut-nggween aa'nduk wakkagagerak nogo inom, yi nggwok yenggenak nogo inom, lek age kagak, obaane'me mbogut-nggween ngget ogobakkigirik nogo ari wage kagarak.

²Kage nagarik, kwe ambi ogonggelo kolaakit nduk, amindik-amendek li'luk eekko'nok wage minggi kwak, o koota abu obeelom Yerutalem ngget ogobakkigirik nogo, Ala wonage me mbogut paga nen wambi wage kagarak.

³Kage nagarik, wone lengganogo yorage minggim time nen oone nggwok ambi ari logonet, ”Ala nen at apuri inenggela'me awi wurik negen logowak nduk, eebe wambi wage ti kaanip o. At eebe at apuri inom logonet, it nen, Kat ninogoba Ala aret o, yinuk, yogwi, ndi, at nen, Kit an napuri aret o, yinuk, yorage, eeko logogun o.

⁴Mbogut-nggween aa'nduk ogobakkigirik nogo paga logonet, iniki aaninggin kogo nogogwaarak nogo lek agagerak me, ngget ogobakkigirik nogo paga inogoba Ala inom logonet, inale amburu mbanogo piyamenggerak me, kanggwi, le yogwe, iniki wakkologwe, andi kogwe, eeko logogun abu lek o,” yinuk, ari naruk konenggirak.

⁵Ari naruk konembunuk, wonage me, at wone lengganogo yorage minggim i ndoonak paga kwi'ndak wonage nogo nen an yo'nege logonet, ”Liirogon karuk konengge logot o. An nen yi mendek ndi mendek abok aret ngget ogobakkigirogo pege yi, abet aret a'me nggelok yigin me, liiru mbanu o.”

⁶Yo'nege nagaarik, ambinom yo'nege logonet, ”O maan aa'nduk togon wonagagirak alom Alpa inom, ndi, irip paga mondok logorak Omega inom, ti an aret me, yokkigirak nogo ti, muk eeke me nduk yokkigi o. Ndi, it aakumi nen niyo abu eeginake kenok, an nen niyo ineenik aganake menggerak eneerime nen onggo lek we aret toologo wogoraagin o.

⁷It an noone mbo pega'lek inogogumbuk logonet, liirogon mugurok nogwe iinok, ineyate wogorogo mengga kwak, eeginaburak karuk konenggendak nogo eeginake logominggirik, an nen inogoba Ala aret age, ndi, it nen an napuri aret ogwe, eeko logogun kwe,

⁸it Ala wone mugurok noorak inagabiti mbaka inom, abet mbariyak ineebi mbaka inom, maluk peyak wurik kagak ugun eerit naga inom, aakumi inooka inom, kumi ugun wurinaka inom, magagirak iyagalo inom, kuguwak amili kungga inom, pilit pugungga inom, it abok aret kani omoonuk wunuk mban ari minggim nogome mbo nappiyaagin o. Aa'nduk ineenik logonuk, kambumenggaarak kwe, kani omoonu'me nappiyoorak nogo ti, peebi ne ambi kanggwi nogo kokwak aret o,” yinuk, yo'nege kagarak.

⁹Yo'nege mbaki, melaikat ineebe 7 nogo nen aakumi andi aganaburak kugi 7 togolowa'na toolak porogo wonagaarak nogo ambi nen nowagam wage nagaarik. ”Ala andomba akwe kolegerak kolaga nogo, kenegen kaanok nduk, mok o,”

¹⁰yo'nege nagaarik, Aberiniki ninikime lik ari mbaki, o neebe wo'neren puut nggorek tiyarogon nogo paga pani lagangge nagaarik, o koota abu obeelom Yerutalem ngget ogobakkigirik Ala eebe eya ndelenak-welenak eeke minggi kwak togop aret Ala wonage me mbogut paga nen wambi wage, ”Ti ket o,” yinuk, yo'negerak. Yo'nege mbaki, yugum onggo nggwok wukagi pogom endage yatipit nogo mendek pindan-pindan eeke minggi kwak, o koota ngget ogobakkigirik nogo togop aret pindan-pindan eeke kagarak.

¹²Ndi, o wa'nagat wurik ti, mondok iya tiyarogon wurik me, tu pak mbanak 12, ndi, tu pak mbanak unde nogo ti, it melaikat ineebe 12 mban wonogne iigirak. Ndi, tungga eebe paga aakumi Iterali inanebunu 12 nogo inendage liiru mbanak wonage kagarak.

¹³O wa'nagat wurik oonegen lagi wage minggim timur pa'nggwe tu pak kenagan mbanak, ndi, oonegen kilu yi nage minggim barat pa'nggwe tu pak kenagan mbanak, ndi, o ame kwi'nari nage minggim selatan pa'nggwe tu pak kenagan mbanak, ndi, o omarip paga kwi'nari wambi wage minggim utara pa'nggwe nogo ti, tu pak kenegan mbanak mban wonage kagarak.

¹⁴O wa'nagat wurik ogowa pugu yugum 12 wonage nogo paga at Ala andomba awuri nappiigak mendek ineebe 12 inendage mbanak wonage kagarak.

¹⁵Ndi, at wone yo'negerak nogo nen o inom, tu pak mbanak nogo inom, o wa'nagat wurik inom, wakkaakit nduk, meter mbuti emas paga ogobakkigirik eenggime wonage kagarak.

¹⁶Nenegen neegak, at nogo nen o koota nogo meter paga wakkage logonet, irip agi-ogu inom, aru-ogwe inom, o eyak kirim inom, ti meter ambit 12,000 stadia nogo paga wakkagak wurik kagarak.

¹⁷At melaikat nogo nen o koota wurik wakkage nagaarik, ti'nuk, o wa'nagat wakkage mbaki, at meter wakkagagerak nogo ti, nit aakumi wakkogo monggoorak 144 hasta paga wakkagak wurik aret kagarak.

¹⁸O wa'nagat nogo ti, yugum yatipit nogo paga wurik, ndi, o koota nogo perak, mbuti emas kikak naka'lek wukagi abu kin lombok pogom nogo paga wurik kagarak.

¹⁹O koota nogo, yi yugum ndi yugum abe kigirikwe kenok mban obaga lu'luk eerak ogowa pugu kagarak. Yugum tabak woneemaluk abena ndoonak ti, yugum yatipit. Ndi, yugum yatipit obaga lu eerak nogo ti, yugum nilan, ndi, yugum nilan obaga pugu nogo ti, yugum mira, ndi, yugum mira obaga pugu nogo ti, yugum tamarut,

²⁰ndi, yugum tamarut obaga pugu nogo ti, yugum unam, ndi, yugum unam obaga pugu nogo ti, yugum taririt, ndi, yugum taririt obaga pugu nogo ti, yugum era'na tembaka, ndi, yugum era'na tembaka obaga pugu nogo ti, yugum mberit, ndi, yugum mberit obaga pugu nogo ti, yugum kiritolit, ndi, yugum kiritolit obaga pugu nogo ti, yugum keritopat, ndi, yugum keritopat obaga pugu nogo ti, yugum latuwari, ndi, yugum latuwari obaga pugu irip paga nogo ti, yugum kerubun, yugum etenggen abe kigirikwe paga mban tap mban-mban aago wurik kagarak.

²¹Tunggu eebe 12 nogo ti, yugum kundali negen ambit tabak paga eebe alitik-alitak ogobakkigirik kagarak. Ndi, o koota oolo tu yarak ti, mbuti emas kikak naka'lek wukagi abu kin lombok pogom ndoonak kagarak kwe,

²²at omaawi ambik menggerak ninogoba Ala inom, at aput ndomba nogo inom, Ala awi wurik negen ineebe inenggela'me inom aret wonogwe me, it aakumi Ala ninom wonage mbaruwak nduk, awi wurik nogo lek aret kagarak.

²³At Ala abu tiyanak eebe eya ndelenak-welenak eeke nogo paga o koota ti eya eeke, ndi, ndi wuninik pogom ti, Ala andomba nen aret eya eeke, eekwi me, it aakumi nen, ”Oonegen inom, tut inom, eya aruwak lak ao,” yinuk, yaka'lek aret iigirak.

²⁴Yi aakumi ndi aakumi inanebunu lombok abok aret o eya ti paga nugwi, ndi, yi aap ndi aap inendage-mbogut nggween paga menggaarak abok aret o eya ti paga logowak nduk, inamindik-inamendek mbelenggo'nuk unggwi nogwe, eekwi iigirak o.

²⁵O koota time o kiip age, o wege, eeka'lek mondok-mondok liingge mban wonage me, tu mondok-mondok paarak aret wonage kagarak.

²⁶Yi aakumi ndi aakumi inanebunu lombok abok aret, ”Wi,” yinuk, inamindik-inamendek mbelenggo'nok, o koota time logowok nduk, unggwi nogwe, Ala endage tiyappugwi, eekwi iigirak.

²⁷Ndi, it iniki mili lenggenggologwe, maluk peyak wurik kagak ugun eerit nugwi, pilit pugunggwi, eeko menggaarak nogo kenok perak, unggwi nogwe iyoolik o. Ata, it aakumi ineenik mondok-mondok aganaburak inendage mbuku paga liiru mbanak ndomba porogo wonage kenok mban unggwi nogwe iigirak o.