Read Wano WAYU 5 Bible Online

WAYU 5 - Wano bible

WAYU 5

¹Ti eekwi iige nagarik, ti'nuk, ambi kage logonet, mbuku ambi nggorek peenok-peenok liiru mbanak me, ”Piiniyak lek o,” yinuk, ambi perengge, keele maake, mbi perengge, keele maake, eerit keele 7 paga maarak at wone lengganogo yorage minggim i ndoonak paga kwi'ndak wonage nogo eenggi abe'nggan porogo wonage kagarak.

²Kage nagarik, melaikat alilaakwi ambi nen oone nggwok ari logonet, ”Mbuku mbanak pirik-perek eerak yi, keele piinogo pekkoorak unde eeppereegerak aap ta o?” Ari mbaki,

³an nen mbake logonet, mbogut paga inom, nggween paga inom, nggween abu'na inom, aakumi ambik aret wonogwe me, ambi keele piinogo wondekka woroorak unde eeppereegerak me woraagin mbakirak kwe,

⁴piinogo wondekka waga'lek aret mbaki, ”Nit aap abok maluk eeko monggoorak me, nit piiniyak unde eeppinanulik aret kagi o,” yinuk, niniki wakkolage logonet, le yagarak.

⁵Awo aret le ari wonage me, mbogut paga wonogwe inoweewi ambi nen an yo'nege logonet, ”Le ari mage o. Eyo ambi agarip lagangge minggi kwak, anebunu Yekura nen Ndawut ombooluk nggeewo singa pogom nda'nagagerak nogo, eegin tiyak yereegerak me, at nen mbuku pirik-perek eerogo keele 7 maarak nogo, piinogo wondekka wage kaamunggun o,” ari mbaki,

⁶it inoweewi 24 nogo inom, aakumi nen iigulik mendek ineebe 4 nogo inom, wone lengganogo yorage minggim taati wonogwe iigak, ndomba ambi eebe warak negen kwe, inenggela'me mi'ndak wonage kagarak. Ala andomba nogo ti eyak aruk alom me 7, ndi, enegen 7 wonage kagarak. Enegen 7 nogo ti, aakumi inogoma kwak Ala ake eeko menggaarak yi awi ndi awi nappiige menggerak ineebe 7 nogo aret o. Ti'nuk, Ala andomba nogo nen wage nagaarik, wone lengganogo yorage minggim i ndoonak paga kwi'ndak mbuku eenggi abe'nggan porogo wonage nogo wagangge kagarak.

⁸Wagangge mbaki, it aakumi nen iigulik mendek ineebe 4 nogo inom, mbogut paga wonogwe inoweewi ineebe 24 nogo inom, Ala andomba nogo abu'me tebe yinuk, ndawi ngget mendek wako logonet, ”Yi aakumi ndi aakumi inanebunu alitak lombok inom, inoone alitak lombok inom, inagabolo alitak lombok inom, abok aret wonogwe kwe, inenggela'me nen ambitak nggiginogo Ala apuri aruwak nduk, kat kooko mbareegwa, kamiya paga inonggo mbaneegindak ti paga mbuku pirik-perek aago keele 7 maarak nogo kat nen waganogo piiniyak op aret o. It kat kamiya paga inonggo mbaneegindak nogo, kogoba Ala abu'me piinok, Ala unde logonet, eeko logowak nduk leenogo mippiyareegindak me, it aap nggwok logonet, aakumi nggween paga ogu time inarum logogun o,” yinuk, yogwi naruk konenggirak. Ndi, it inoweewi ineebe 24 nogo nen i nenaarak nggitat nogo inom, togolowak mbuti emas paga ogobakkigirak me, kemenyan amburu toolak nogo inom, inalitak lombok porogo logonet, yogwi iigirak. Kemenyan amburu t(...)

¹¹Ti eekwi iige nagarik, wone lengganogo yorage minggim i ndoonak nogo inom, it aakumi nen iigulik mendek ineebe nogo inom, it mbogut paga wonogwe inoweewi nogo inom, oolo wonogwe iigak, it melaikat ineebe mondok ambik ineenggi lingginiyak meek lombok wanggerak wonogwe nogo nen,

¹²”Ala andomba wareegwaarak nogo ti, yi aakumi ndi aakumi abok at abu'me tebe yi unggwogwe, yi mendek ndi mendek abok aret at wogogwi, Yi wone ndi wone abok kat mban keenu aret o, yinuk, yogwi, Kat kalik mondok komaawi aret o, yinuk, ayuk wukwi, endage tiyappugwi, inale'nggen ombakwi, eeko logorak op aret o,” yinuk,

¹³it mbogut paga wonogwe inom, nggween paga wonogwe inom, nggween abu'na wonogwe inom, yi yenggenak inikime nugwi inom, Ala nen ogobakkigireegerak yi mendek ndi mendek yi aakumi ndi aakumi abok aret inoone nggwok paga ndawi wako logonet, ”Nit abok aret, at wone lengganogo yo'nirage minggim kwi'ndak wonage nogo inom, Ala andomba nogo inom, kimbirak kinale'nggen o, yinuk, inabu'me tebe yinuk, inalut eekwi, inendage tiyappiigwi, eeko logonet, inoone mondok-mondok konenggo logogun o,” yinuk, yogwe iigak,

¹⁴it aakumi nen iigulik mendek ineebe 4 nogo nen, ”Abet aret yaga o,” yinuk, ”Amin,” mban yogwe, ndi, it inoweewi 24 nogo nen Ala andomba nogo abu'me tebe yinuk, alut eekwi, eekwi iigirak o.