Read Waray Samarenyo Meaning Based Genesis 11 Bible Online

Genesis 11 - Waray Samarenyo Meaning Based bible

Genesis 11

¹Ha syahan may-ada usa la nga pinulongan an mga tawo ha bug-os nga kalibutan ngan waray kalainan an mga pulong nga ira ginagamit.

²Samtang nagtitipakadto hira ha sinirangan, nahingadto hira ha kapatagan didto ha Babilonia ngan didto hira pag-ukoy.

³Naggipasiringsiring hira, “Tana, paghimo kita hin mga baldosa ngan banggaha ta hin maupay basi magmatig-a ini hin duro.” Sanglit nagkamay-ada hira mga baldosa nga igtirindog ngan alkitran hin pagturugkop han mga baldosa.

⁴Nagsiring hira, “Yana pagtindog kita hin usa nga syudad nga may-ada lantawan nga maabot ha langit, basi makaangkon kita hin ngaran para ha aton kalugaringon ngan diri kita magsarang ha bug-os nga tuna.”

⁵Niyan linmusad an GINOO hin pagkita han syudad ngan han lantawan nga gintindog hito nga mga tawo,

⁶ngan nagsiring hiya, “Yana usa la nga katawhan ini hira ngatanan ngan nagyayakan hira hin usa la nga pinulongan; tinikangan pa la ini han ira nahuhunahunaan hin pagbuhat. Diri maiha mahihimo nira an bisan ano nga ira karuyag!

⁷Lusad kita ngan guponga ta an ira pinulongan basi diri hira magkasarabot.”

⁸Sanglit ginpasarang han GINOO hira ngatanan ha bug-os nga tuna ngan ginpaukoy nira an pagtindog han syudad.

⁹Gintawag nga Babilon[30] an syudad, kay didto gingupong han GINOO an pinulongan han ngatanan nga mga tawo, ngan ginpasarang hira ha bug-os nga tuna.

¹⁰Amo ini an mga tulin ni Sem. Duha ka tuig katapos han lunop, han 100 na an panuigon ni Sem, nagkamay-ada hiya anak nga lalake nga hi Arfacsad.

¹¹Katapos hito nabuhi pa hiya hin 500 ka tuig ngan nagkamay-ada iba nga mga anak.

¹²Han 35 na an panuigon ni Arfacsad, nagkamay-ada hiya anak nga lalake nga hi Sela;

¹³katapos hito nabuhi pa hiya hin 403 ka tuig ngan nagkamay-ada iba nga mga anak.

¹⁴Han 30 na an panuigon ni Sela, nagkamay-ada hiya anak nga lalake nga hi Eber;

¹⁵katapos hito nabuhi pa hiya hin 403 ka tuig ngan nagkamay-ada iba nga mga anak.

¹⁶Han 34 na an panuigon ni Eber, nagkamay-ada hiya anak nga lalake nga hi Peleg;

¹⁷katapos hito nabuhi pa hiya hin 430 ka tuig ngan nagkamay-ada iba nga mga anak.

¹⁸Han 30 na an panuigon ni Peleg, nagkamay-ada hiya anak nga lalake nga hi Reu;

¹⁹katapos hito nabuhi pa hiya hin 209 ka tuig, ngan nagkamay-ada iba nga mga anak.

²⁰Han 32 na an panuigon ni Reu, nagkamay-ada hiya anak nga lalake nga hi Serug;

²¹katapos hito nabuhi pa hiya hin 207 ka tuig ngan nagkamay-ada iba nga mga anak.

²²Han 30 na an panuigon ni Serug, nagkamay-ada hiya anak nga lalake nga hi Nahor;

²³katapos hito nabuhi pa hiya hin 200 ka tuig ngan nagkamay-ada iba nga mga anak.

²⁴Han 29 na an panuigon ni Nahor, nagkamay-ada hiya anak nga lalake nga hi Tera;

²⁵katapos hito nabuhi pa hiya hin 119 ka tuig ngan nagkamay-ada iba nga mga anak.

²⁶Han 70 na an panuigon ni Tera, nagin amay hiya nira Abram, Nahor, ug Haran.

²⁷Amo ini an mga tulin ni Tera nga amay nira Abram, Nahor, ug Haran. Hi Haran amo an amay ni Lot,

²⁸ngan namatay hi Haran didto han iya natawhan nga bungto han Ur didto ha Babilonia samtang buhi pa an amay niya.

²⁹Nangasawa hi Abram kan Sarai, ngan nangasawa hi Nahor kan Milca nga babaye nga anak ni Haran nga amay liwat ni Isca.

³⁰Waray mag-anak hi Sarai.

³¹Gindara ni Tera hi Abram nga iya anak nga lalake, hi Lot nga iya apo, nga amo an anak nga lalake ni Haran, ngan hi Sarai nga iya umagad nga babaye, nga asawa ni Abram. Binayaan nira an syudad han Ur didto ha Babilonia ngan napakadto hira ha tuna han Canaan. Inmabot hira tubtob ha Haran ngan nag-ukoy hira didto.

³²Didto namatay hi Tera ha panuigon nga 205.