Read Waray Samarenyo Meaning Based Genesis 13 Bible Online

Genesis 13 - Waray Samarenyo Meaning Based bible

Genesis 13

¹Tikang ha Ehipto, nagtipaamihanan hi Abram, ngadto han timogan nga bahin han Canaan, upod an iya asawa ngan an ngatanan nga iya mga hiagi, ngan inmupod ha iya hi Lot.

²Riko hin duro hi Abram hin mga karnero, mga kanding, ngan mga baka, sugad man hin salapi ug bulawan.

³Niyan binmaya hiya didto ngan nagbalhin hiya tikang ha usa nga kampo ngadto ha lain nga kampo tipakadto ha Betel. Inmabot hiya han dapit nga nabubutnga han Betel ug Hai, nga ginkampohan niya hadto anay

⁴ngan gintindogan niya hin usa nga altar. Didto nagsingba hiya han GINOO.

⁵May-ada liwat hi Lot mga karnero, mga kanding, ngan mga baka, ngan may-ada liwat niya kalugaringon nga panimalay ngan mga surugoon.

⁶Sanglit diri na igo an tuna nga panabsaban para ha ira nga duha kay damo hin duro an ira kamanampan.

⁷Nag-aruaraway na an mga tawo nga nagmamangno han kamanampan ni Abram kontra han mga tawo nga nagmamangno han kamanampan ni Lot. (Hito nga panahon nag-uokoy pa dida han tuna an mga Canaanhon ngan an mga Periseohanon.)

⁸Niyan nagsiring hi Abram kan Lot, “Mag-uropod la kita ngan diri angay mag-aruaraway an imo mga tawo kontra han akon mga tawo.

⁹Sanglit pagbulag kita. Pagpili han tuna nga imo naruruyagan. Pakadto ikaw hin usa nga dapit, ngan mapakadto ako hin lain nga dapit.”

¹⁰Sanglit sinmiplat hi Lot ngan hinkit-an niya nga damo an tubig han bug-os nga Kahamub-an han Jordan, tubtob gud ngadto ha Zoar, nga sugad han Tanaman han GINOO,[32] o sugad han tuna han Ehipto. (Waray pa hini nga panahon pagbungkaga han GINOO an mga syudad han Sodoma ug Gomora.)

¹¹Sanglit ginpili ni Lot para ha iya ngahaw an bug-os nga Kahamub-an han Jordan ngan binmalhin hiya tipakadto ha sinirangan. Amo ito an paagi han ira pagkabulag.

¹²Nagpabilin hi Abram didto ha tuna han Canaan, ngan nag-ukoy hi Lot didto han mga syudad ha kahamub-an ngan nagkampo hiya ha hirani han Sodoma,

¹³kanay mga tawo magraot ngan dagko nga mga magpakasasala kontra han GINOO.

¹⁴Han pagbaya na ni Lot, nagsiring an GINOO ngadto Abram, “Tikang han imo hinmumutangan tan-aw hin maupay ngadto han ngatanan nga dapit.

¹⁵Ighahatag ko ha imo ngan han imo mga tulin an ngatanan nga tuna nga matatan-aw han imo mga mata, ngan pagtatag-iyahon ini niyo ha kadayonan.

¹⁶Tatagan ko ikaw hin damo hin duro nga mga tulin nga waray tawo nga makakaihap ha ira ngatanan; masusugad ini hin pag-ihap han tagsa nga tapotapo han tuna.

¹⁷Yana, kadto na ngan tan-awa an bug-os nga tuna, kay ighahatag ko ini ngatanan ha imo.”

¹⁸Sanglit ginbalhin ni Abram an iya kampo ngan nag-ukoy hiya ha hirani han baraan nga kakahoyan han Mamre didto ha Hebron, ngan didto nagtindog hiya hin usa nga altar ngadto han GINOO.