Read Waray Samarenyo Meaning Based Genesis 16 Bible Online

Genesis 16 - Waray Samarenyo Meaning Based bible

Genesis 16

¹Waray mag-anak hi Sarai nga asawa ni Abram. Kundi may-ada hi Sarai usa nga Ehiptohanon nga oripon nga babaye nga ginngaranan nga Agar,

²sanglit nagsiring hiya kan Abram, “Waray ako tugoti han GINOO hin pag-anak. Kay ano nga diri ka makighilawas han akon oripon nga babaye? Manggad nala mag-anak hiya para ha akon.” Inmuyon hi Abram han iginsiring ni Sarai.

³Sanglit iginhatag ni Sarai hi Agar ngadto kan Abram basi magin iya aruasawa. (Nahinabo ini katapos ni Abram mag-ukoy didto ha Canaan sulod hin 10 ka tuig.)

⁴Nakighilawas hi Abram kan Agar ngan nagburod hiya. Han pakasabot niya nga burod na hiya, nagmapinahitas-on hiya ngan gintamay niya hi Sarai.

⁵Niyan nagsiring hi Sarai kan Abram, “Sayop ini nimo nga gintatamay ako ni Agar.[34] Iginhatag ko hiya ha imo, ngan tikang hiya mahibaro nga burod na hiya, gintamay na ako niya. Paghukman unta kita han GINOO kon hin-o ha aton an matadong, ikaw ba o ako.”

⁶Binmaton hi Abram, “Oripon mo hiya ngan ikaw an magburuot ha iya. Buhata ha iya an bisan ano nga imo karuyag.” Niyan nagmaisog hin duro hi Sarai kan Agar sanglit linmayas hiya.

⁷Gintapo hi Agar han anghel han GINOO didto hin usa nga burabod ha kamingawan dida han dalan tipakadto ha Sur,

⁸ngan ginsiring hiya, “Agar nga oripon ni Sarai, tikang ka diin ngan tipakain ka?” Binmaton hiya, “Napalagiw ako tikang han akon agaron nga babaye.”

⁹Nagsiring an anghel, “Balik ngadto ha iya ngan paoripon ha iya.”

¹⁰Niyan nagsiring pa hiya, “Tatagan ko ikaw hin damo hin duro nga mga tulin nga waray tawo nga makakaihap ha ira.

¹¹Mag-aanak ka hin usa nga lalake ngan pagngangaranan mo hiya nga Ismael[35] kay hinbatian han GINOO an imo mga pagharoy.

¹²Kundi masusugad hin ihalas nga asno an imo anak; makontra hiya han tagsatagsa ngan kokontrahon man hiya han tagsatagsa. Mag-uokoy hiya nga hirayo han ngatanan niya nga kauropdan.”

¹³Nagpakiana hi Agar ha iya la ngahaw, “Hinkit-an ko ba hin tinuod an Dyos ngan nabuhi pa ako hin pagsumat hiunong hini?”[36] Sanglit gintawag niya an GINOO nga naghimangraw ha iya, “Usa ka Dyos nga Nakita.”

¹⁴Sanglit ginngaranan han mga tawo an atabay ha butnga han Cades ngan han Bered nga “An Atabay han Buhi nga Nakita ha Akon.”

¹⁵Nag-anak hi Agar hin usa nga lalaki ngan ginngaranan hiya ni Abram nga Ismael.

¹⁶An panuigon ni Abram hito nga panahon 86 na.