Read Waray Samarenyo Meaning Based Genesis 17 Bible Online

Genesis 17 - Waray Samarenyo Meaning Based bible

Genesis 17

¹Han 99 na an panuigon ni Abram, pinmakita ha iya an GINOO ngan nagsiring, “Amo ako an Dyos nga Labi Kamakagarahum. Pagsugta ako ngan dayuday pagbuhata an matadong.

²Maghihimo ako ha imo hin ginsaaran ngan tatagan ko ikaw hin damo nga mga tulin.”

³Hinmapa hi Abram, ngan nagsiring an Dyos,

⁴“Amo ini an ginsaaran nga akon hihimoon ha imo: nagsasaad ako nga mahihimo ka nga ginikanan hin damo nga mga nasod.

⁵Diri na Abram an imo ngaran, kundi Abraham[37] na, kay hihimoon ko ikaw nga ginikanan hin damo nga mga nasod.

⁶Tatagan ko ikaw hin damo nga mga tulin, ngan magigin hadi in pira ha ira. Magkakamay-ada ka damo hin duro nga mga tulin nga mahihimo hira nga mga nasod.

⁷“Tutumanon ko an akon saad ha imo ngan han imo mga tulin ha tidaraon nga mga katulinan, sugad nga usa nga waray kataposan nga ginsaaran. Magigin Dyos ako nimo ngan an Dyos han imo mga tulin.

⁸Ighahatag ko ha imo ngan han imo mga tulin ini nga tuna diin usa ka nga lumalangyaw yana. Pagtatag-iyahon ha kadayonan han imo mga tulin an bug-os nga tuna han Canaan, ngan magigin Dyos ako nira.”

⁹Nagsiring an Dyos kan Abraham, “Kinahanglan umabuyon ka liwat hin pagtuman han aton ginsaaran, ikaw ngan an imo mga tulin ha tidaraon nga mga katulinan.

¹⁰Kinahanglan umabuyon ka ngan an imo mga tulin hin pagtori han tagsa nga lalake dida ha iyo.

¹¹Tikang yana kinahanglan pagtorion mo an tagsa nga bata nga lalake kon walo na ka adlaw an iya edad, lakip an mga oripon nga natawo ha iyo mga balay ngan an mga oripon nga ginpalit niyo tikang hin mga lumalangyaw. Magpapakita ini nga may-ada naton ginsaaran.

¹³Kinahanglan pagtorion an kada usa, ngan mahihimo ini nga lawasnon nga tigaman hin pagpakita nga waray kataposan an aton ginsaaran.

¹⁴Diri na pag-iisipon nga sakop han akon mga tawo an bisan hin-o nga lalake nga diri pagtorion, kay waray hiya magtuman han aton ginsaaran.”

¹⁵Nagsiring an Dyos kan Abraham, “Ayaw na pagtawgon nga Sarai an imo asawa; tikang yana Sara na an iya ngaran.

¹⁶Pagbebendisyonan ko hiya, ngan tatagan ko ikaw hin usa nga anak nga lalake pinaagi ha iya. Pagbebendisyonan ko hiya, ngan mahihimo hiya nga iroy hin mga nasod, ngan magkakamay-ada kahadian dida han iya mga tulin.”

¹⁷Hinmapa hi Abraham, kundi nahipatawa hiya han pakahunahuna niya, “Makakaanak pa ba in usa nga lalake nga 100 na an iya panuigon? Mag-aanak pa ba hi Sara nga 90 na?”

¹⁸Ginpakianhan niya an Dyos, “Kay ano nga diri na la hi Ismael an himoon nga sumurunod ha akon?”

¹⁹Kundi nagsiring an Dyos, “Diri. Mag-aanak hi Sara nga imo asawa hin usa nga lalake ngan pagngangaranan mo hiya nga Isaac.[38] Pagtutumanon ko ha kadayonan dida ha iya ngan han iya mga tulin an akon ginsaaran. Usa ini nga waray kataposan nga ginsaaran.

²⁰Hinbatian ko an imo hangyo hiunong kan Ismael, sanglit pagbebendisyonan ko hiya ngan tatagan ko hiya hin damo nga mga anak ngan damo nga mga tulin. Magigin amay hiya hin dose nga mga punoan, ngan hihimoon ko nga usa nga dako nga nasod an iya mga tulin.

²¹Kundi pagtutumanon ko an akon ginsaaran dida kan Isaac nga imo anak nga lalake, nga ig-aanak ni Sara ha sugad hini nga panahon han sunod nga tuig.”

²²Han kahuman paghimangraw han Dyos kan Abraham, iya binayaan hiya.

²³Hito ngahaw nga adlaw, ginsugot ni Abraham an Dyos ngan gintori niya hi Ismael nga iya anak ngan an ngatanan nga iba pa nga kalalaken-an didto han iya balay, pati an mga oripon nga natawo didto han iya balay ngan adton iya mga pinalit.

²⁴An panuigon ni Abraham 99 na han pagtoria ha iya,

²⁵ngan 13 na an panuigon ni Ismael nga iya anak.

²⁶Gintori hira nga duha hito manta nga adlaw,

²⁷upod an ngatanan nga mga oripon ni Abraham.