Read Waray Samarenyo Meaning Based Genesis 20 Bible Online

Genesis 20 - Waray Samarenyo Meaning Based bible

Genesis 20

¹Binmalhin hi Abraham tikang ha Mamre ngadto han timogan nga dapit han Canaan, ngan nag-ukoy hiya ha butnga han Cades ug Sur. Niyan, samtang nag-uokoy hiya didto ha Gerar,

²nagsiring hiya nga bugto la niya hi Sara nga iya asawa. Sanglit ginpakuha ni Hadi Abimelec hi Sara ngadto ha iya.

³Usa ka gab-i pinmakita an Dyos kan Abimelec dida hin usa nga inop ngan nagsiring, “Mapatay ka, kay ginkuha mo ini nga babaye; inasaw-an na hiya.”

⁴Kundi waray pa makighilawas kan Sara hi Abimelec, ngan nagsiring hiya, “Ginoo, waray ko sala! Papatayon mo ba ako ngan an akon mga tawo?

⁵Hi Abraham ngahaw an nagsiring nga bugto la niya hi Sara, ngan nagsiring hi Sara nga bugto niya hi Abraham. Ginbuhat ko ini hin murayaw nga konsensya, ngan waray ko nabuhat nga sayop.”

⁶Binmaton an Dyos dida han inop, “Oo, maaram ako nga ginbuhat mo ini hin murayaw nga konsensya, sanglit waray ko ikaw tugoti hin pakasala kontra ha akon ngan waray ko itugot nga makighilawas ka ha iya.

⁷Kundi yana, igbalik an babaye ngadto han iya bana. Usa nga manaragna an iya bana, ngan mag-aampo hiya para ha imo, basi diri ka mamatay. Kundi kon diri mo hiya igbalik, ginpapahimatngon ko ikaw nga mapatay ka, ikaw ngan an ngatanan mo nga mga tawo.”

⁸Timprano pa han pagkaaga gintawag ni Abimelec an ngatanan niya nga mga opisyal ngan ginsumatan hira kon ano an nahinabo, ngan nagkahahadlok gud hira.

⁹Niyan gintawag ni Abimelec hi Abraham ngan ginpakianhan hiya, “Ano an imo ginbuhat ha amon? Ano nga sayop an akon nabuhat ha imo nga tinagan mo kami hini nga dako nga karat-an, ako ngan an akon ginhadian, nga diri unta angay pagbuhaton mo ha akon?

¹⁰Kay ano nga imo man ini ginbuhat?”

¹¹Binmaton hi Abraham, “An akon hunahuna nga waray ha iyo dinhe nahadlok han Dyos, ngan nga pagpapatayon ako nira basi la makuha nira an akon asawa.

¹²Tinuod gud nga bugto ko hiya nga babaye. Bugto ko hiya ha amay, kundi diri ha iroy, ngan pinangasawa ko hiya.

¹³Sanglit han pagsugoa ha akon han Dyos tikang han balay han akon amay ngadto hin langyaw nga mga tuna, ginsiring ko hiya, ‘Makakapakita ka han imo kamaunongon ha akon pinaagi hin pagsumat han tagsatagsa nga imo la ako bugto.’”

¹⁴Niyan ibinalik ni Abimelec hi Sara ngadto kan Abraham ngan gintagan pa hiya ni Abimelec hin mga karnero, mga baka, ngan hin mga oripon.

¹⁵Nagsiring hiya kan Abraham, “Iini an bug-os ko nga katunaan. Pag-ukoy bisan diin an imo karuyag.”

¹⁶Nagsiring hiya kan Sara, “Tinatagan ko an imo bugto nga lalake hin usa ka yukot ka bug-os nga salapi basi hisabotan han ngatanan nga upod nimo nga waray ka sala; nga waray mo nabuhat nga sayop.”

¹⁷Tungod han nahinabo kan Sara nga asawa ni Abraham, ginbuot han Dyos nga diri gud mag-anak an bisan hin-o nga babaye didto han palasyo ni Abimelec. Sanglit nag-ampo hi Abraham para kan Abimelec ngan gin-upay hiya han Dyos. Gin-upay liwat niya an iya asawa, ngan an iya mga oripon nga kababayen-an basi mag-anak na liwat hira.