Read Waray Samarenyo Meaning Based Genesis 21 Bible Online

Genesis 21 - Waray Samarenyo Meaning Based bible

Genesis 21

¹Ginbendisyonan han GINOO hi Sara sumala han iya iginsaad,

²ngan nagburod hiya ngan nag-anak hin lalake bisan kon lagas na hi Abraham. Natawo an bata dida han panahon nga igintalaan han Dyos.

³Ginngaranan hiya ni Abraham nga Isaac.

⁴Han walo na ka adlaw an iya edad, gintori hiya ni Abraham sumala han iginsugo han Dyos.

⁵Ang panuigon ni Abraham 100 na an han katawo ni Isaac.

⁶Nagsiring hi Sara, “Gindad-an ako han Dyos hin kalipay ngan pagtawa.[45] Maduyog ha akon hin pagtawa an ngatanan nga makakabati hiunong hini.”

⁷Ngan nagpadayon hiya, “Hin-o in magsisiring kan Abraham nga magpapasuso pa hi Sara hin kabataan? Kundi nag-anak kami hin usa nga lalake dida han lagas na hiya.”

⁸Tinmubo an bata, ngan dida han adlaw han kalutas niya, naghatag hi Abraham hin dako nga panagtawo.

⁹Usa ka adlaw, nag-uuyag[46] hi Ismael nga anak nira Abraham ug Agar nga Ehiptohanon, ngan hi Isaac nga anak ni Sara.[47]

¹⁰Hinkit-an hira ni Sara ngan ginsiring niya hi Abraham, “Paiwasa ini nga oripon nga babaye ngan an iya anak. Kinahanglan an anak hini nga oripon nga babaye diri umangbit hin bisan ano nga bahin han imo manggad nga pagsusundon ni Isaac nga akon anak.”

¹¹Nakapaguol ini hin duro kan Abraham, kay anak man liwat niya hi Ismael.

¹²Kundi nagsiring an Dyos kan Abraham, “Ayaw kabaraka hiunong han bata ngan kan Agar nga imo oripon. Buhata an isiring ha imo ni Sara, kay pinaagi ini kan Isaac nga magkakamay-ada ka han mga tulin nga akon iginsaad.

¹³Tatagan ko liwat hin damo nga mga anak hi Ismael, an anak han oripon nga babaye, basi mahimo hira nga usa nga nasod, kay anak mo liwat hiya.”

¹⁴Timprano pa han pagkaaga gintagan ni Abraham hi Agar hin pagkaon ngan hin supot nga anit nga puno hin tubig. Iginpababa niya an bata kan Agar ngan ginpalakat hiya. Linmakat hi Agar ngan nagsinudoysudoy didto ha kamingawan han Berseba.

¹⁵Han kaubos na han tubig, ginbayaan niya an bata ha sirong hin usa nga tanaman

¹⁶ngan linmingkod hiya didto hin mga 90 ka metros an kahirayo tikang han bata. Nagsiring hiya ha iya ngahaw, “Diri ako mailob hin pagkita nga mapatay an akon anak.” Samtang nalingkod hiya didto, nagtinangis an bata.[48]

¹⁷Hinbatian han Dyos nga nagtitinangis an bata, ngan tikang ha langit nagyakan kan Agar an anghel han Dyos, “Ano an imo nagugul-an, Agar? Ayaw kahadlok. Hinbatian han Dyos nga nagtatangis an bata.

¹⁸Buhat, kadtoa, purota hiya, ngan pag-liawa hiya. Hihimoon ko in usa nga dako nga nasod tikang han iya mga tulin.”

¹⁹Niyan ginpakita han Dyos kan Agar in usa nga atabay. Kinmadto hiya ngan ginpuno hin tubig an supot nga anit ngan ginpainom an bata.

²⁰Kaupod an Dyos han bata samtang nagtutubo hiya; nag-ukoy hiya didto ha kamingawan han Paran ngan nahimo hiya nga batid nga parapanganop.

²¹Nakaagi an iroy niya hin Ehiptohanon nga asawa para ha iya.

²²Hito nga panahon, inmupod hi Abimelec kan Picol nga kapitan han iya kasondalohan, ngan nagsiring kan Abraham, “Kaupod nimo an Dyos ha ngatanan nga imo binubuhat.

²³Sanglit pagsumpa dinhe ha atubangan han Dyos nga diri ka maglilingo ha akon, han akon mga anak, o han akon mga tulin. Nagin maunongon ako ha imo, sanglit pagsaad nga magmamaunongon ka liwat ha akon ngan hini nga nasod nga imo gin-uokyan.”

²⁴Nagsiring hi Abraham, “Nagsaad ako.”

²⁵Nagsumbong hi Abraham kan Abimelec hiunong hin usa nga atabay nga gin-agaw han mga surugoon ni Abimelec.

²⁶Nagsiring hi Abimelec, “Diri ako maaram kon hin-o an nagbuhat hini. Waray mo man ako pagsumati hiunong hini, ngan syahan pa ini nga akon pakabati hini.”

²⁷Niyan gintagan ni Abraham hi Abimelec hin mga karnero, ngan mga baka, ngan naghimo hira nga duha hin ginsabotan.

²⁸Ginlain ni Abraham in pito nga mga nati nga karnero tikang han iya panon,

²⁹ngan pinmakiana ha iya hi Abimelec, “Kay ano nga ginbuhat mo ito?”

³⁰Binmaton hi Abraham, “Karawta ini nga pito nga mga nati nga karnero. Pinaagi hini, kinakarawat mo nga amo ako an nag-ukab hini nga atabay.”

³¹Sanglit gintawag an dapit nga Berseba[49] kay didto pagsumpa hira nga duha.

³²Katapos nira maghimo hini nga ginsabotan didto ha Berseba, binmalik hira Abimelec ug Picol ngadto ha Filistia.

³³Niyan nagtanom hi Abraham hin kahoy nga tamarindo didto ha Berseba ngan nagsingba hiya han GINOO nga Waray Kataposan nga Dyos.

³⁴Nag-ukoy hi Abraham didto ha Filistia sulod hin maiha nga panahon.