Read Waray Samarenyo Meaning Based Genesis 26 Bible Online

Genesis 26 - Waray Samarenyo Meaning Based bible

Genesis 26

¹May-ada lain nga gutom didto han tuna labot han nahiuna dida han panahon ni Abraham. Kinmadto hi Isaac kan Abimelec nga hadi han mga Filisteohanon, didto ha Gerar.

²Pinmakita kan Isaac an GINOO ngan nagsiring, “Ayaw pagkadto ha Ehipto; pabilin dinhe hini nga tuna nga ginpaukyan ko ha imo.

³Pag-ukoy la anay dinhe, ngan maupod ako ha imo ngan pagpapakaupayon ko ikaw. Ighahatag ko ha imo ngan han imo mga tulin ini ngatanan nga katunaan. Pagtutumanon ko an saad nga akon ginhimo kan Abraham nga imo amay.

⁴Tatagan ko ikaw hin mga tulin nga sugad ka damo han mga bitoon ha langit, ngan ighahatag ko ha ira ini ngatanan nga katunaan. Hahangyoon ako han ngatanan nga kanasoran hin pagpakaupay ha ira sugad han akon pagpakaupay han imo mga tulin.

⁵Pagpapakaupayon ko ikaw kay ginsugot ako ni Abraham, ngan gintuman niya an ngatanan nakon nga mga balaod ngan mga sugo.”

⁶Sanglit nag-ukoy hi Isaac didto ha Gerar.

⁷Han pagpakiana han mga tawo didto hiunong han iya asawa, nagsiring hiya nga bugto la hiya niya. Waray hiya magsumat nga iya asawa hiya, kay nahadlok hiya nga bangin pagpatayon hiya han mga tawo didto hin pag-agaw kan Rebecca nga mahusay hin duro.

⁸Han maiha na didto hi Isaac, tinmangbo hi hadi Abimelec ha iya bintana ngan hinkit-an hi Isaac ngan hi Rebecca nga nagkakarinyo.

⁹Ginpasugoan ni Abimelec hi Isaac ngan ginsiring, “Asawa mo ngay-an hiya! Kay ano nga nagsiring ka man nga bugto mo la hiya?” Binmaton hiya, “Naghunahuna ako nga bangin ako pagpatayon kon magsiring ako nga asawa ko hiya.”

¹⁰Nagsiring hi Abimelec, “Ano ini nga imo ginbuhat ha amon? Bangin sayonan la in usa han akon mga sakop hin pakigdirig han imo asawa, ngan ikaw ngahaw an pagbabasolon tungod han amon sala.”

¹¹Ginpahimatngonan ni Abimelec an ngatanan nga mga tawo: “Pagpapatayon an bisan hin-o nga maglabot hini nga tawo o han iya asawa.”

¹²Nagpugas hi Isaac didto hito nga tuna, ngan hito nga tuig nag-ani hiya hin 100 ka pilo han iya iginpugas, kay ginpakaupay hiya han GINOO.

¹³Nagpadayon hiya hin pagkamainauswagon ngan nahimo hiya nga manggaranon hin duro nga tawo.

¹⁴Tungod nga nagdamo an iya panon hin mga karnero ug mga baka, ngan damo an iya mga surugoon, naawa ha iya an mga Filisteohanon.

¹⁵Sanglit gintak-opan nira an ngatanan nga mga atabay nga gin-ukab han mga surugoon ni Abraham nga amay niya, han buhi pa hi Abraham.

¹⁶Niyan nagsiring hi Abimelec kan Isaac, “Gawas na kamo han amon nasod. Labi ka na hin gamhanan kay ha amon.”

¹⁷Sanglit linmakat hi Isaac, ngan nagkampo hiya didto ha Kahamub-an han Gerar, diin didto la anay hiya pag-ukoy.

¹⁸Gin-ukab na liwat niya an mga atabay nga gin-ukab han panahon ni Abraham ngan gintak-opan han mga Filisteohanon han kamatay ni Abraham. Ginngaranan ni Isaac an mga atabay hin amo ngahaw nga mga ngaran nga iginngaran hini han iya amay.

¹⁹Nag-ukab an mga surugoon ni Isaac hin usa nga atabay didto han kahamub-an ngan hin-agian nira in tubig.

²⁰Nakigsuhay an mga magmarangno hin mga karnero han Gerar kontra han mga magmarangno hin mga karnero ni Isaac, ngan nagsiring, “Amon ini tubig.” Sanglit ginngaranan ni Isaac nga Esec[57] an atabay, kay gin-away man hiya han taga-Gerar.

²¹Nag-ukab an mga surugoon ni Isaac hin lain nga atabay ngan nagkamay-ada liwat pakigsuhay hiunong hini nga atabay, sanglit ginngaranan niya ini nga Sitna, kay nasina man ha iya an mga taga-Gerar.

²²Binmalhin hiya tikang didto ngan nag-ukab hin lain na liwat nga atabay. Waray na pagsuhay-suhay hiunong hini, sanglit ginngaranan niya ini nga Rehobut, an karuyag sidngon Kagawasan. Nagsiring hiya, “Yana gintagan na kita han GINOO hin kagawasan hin pag-ukoy dinhe han tuna, ngan magmamainuswagon na kita dinhe.”

²³Linmakat hi Isaac ngan kinmadto ha Berseba.

²⁴Hito nga gab-i pinmakita ha iya an GINOO ngan nagsiring, “Amo ako an Dyos ni Abraham nga imo amay. Ayaw kahadlok kay upod ako ha imo. Pagbebendisyonan ko ikaw ngan tatagan ko ikaw hin damo nga mga tulin, tungod han akon saad kan Abraham nga akon surugoon.”

²⁵Nagtindog hi Isaac hin usa nga altar didto ngan nagsingba hiya han GINOO. Katapos nagkampo hiya didto, ngan nag-ukab an iya mga surugoon hin lain nga atabay.

²⁶Inmabot hin pakigkita kan Isaac hi Abimelec tikang ha Gerar upod hi Ahuzat nga iya magsaragdon ngan hi Ficol nga kapitan han iya kasondalohan.

²⁷Sanglit pinmakiana hi Isaac, “Kay ano nga kinmanhi kamo yana hin pakigkita ha akon, nga waray man kamo pakigsangkay ha akon hadto ngan iyo pa ngani ako ginpaiwas han iyo nasod?”

²⁸Binmaton hira, “Yana maaram na kami nga upod ha imo an GINOO, ngan naghuhunahuna kami nga kinahanglan magkamay-ada naton ginsumpaan nga ginsaaran. Karuyag namon nga magsaad ka

²⁹nga diri mo kami pagdadaoton, sugad nga waray kami magdaot ha imo. Nalooy kami ha imo ngan ginpalakat ka namon nga murayaw. Yana sayod kami nga ginpakaupay ka han GINOO.”

³⁰Nag-andam hi Isaac hin panagtawo para ha ira ngan nangaon ngan nag-irignom hira.

³¹Timprano pa han pagkaaga, nagsaad an tagsa nga tawo ngan ginparig-on ini pinaagi hin sumpa. Nagpagikan ha ira hi Isaac, ngan nagburublig hira nga mga magsarangkay na.

³²Dida hito nga adlaw inmabot an mga surugoon ni Isaac ngan ginsumatan hiya hiunong han atabay nga ira gin-ukab. Nagsiring hira, “Hin-agian namon in tubig.”

³³Ginngaranan niya nga Seba (karuyag sidngon Sumpa) an atabay. Tungod hini ginngaranan an syudad nga Berseba[58] asta ngada yana.

³⁴Han 40 na an panuigon ni Esau, nangasawa hiya hin duha nga Hititanhon nga kababayen-an: hira Judit nga anak ni Beeri, ngan hi Basemat nga anak ni Elon.

³⁵Ini nga mga asawa ni Esau nakahatag hin kaguol ug kasubo kanda Isaac ug Rebecca.