Read Waray Samarenyo Meaning Based Genesis 27 Bible Online

Genesis 27 - Waray Samarenyo Meaning Based bible

Genesis 27

¹Lagas ngan buta na hi Isaac. Ginpasugoan niya hi Esau nga suhag niya nga anak, ngan nagsiring ha iya, “Anak!” “Oo tatay, aadi ako,” binmaton hiya.

²Nagsiring hi Isaac, “Nakita ka nga lagas na ako ngan bangin diri na maiha mapatay na ako.

³Kuhaa an imo pana, pakadto ha kaumhan, ngan panganop para ha akon.

⁴Igluto ako han marasa nga pagkaon nga akon ayon ngan igdurot ha akon. Katapos ko pagkaon, ighahatag ko ha imo an akon kataposan nga bendisyon san-o ako mamatay.”

⁵Samtang nagyayakan hi Isaac kan Esau, nagpipinamati hi Rebecca. Sanglit han paggawas ni Esau hin pagpanganop,

⁶ginsiring niya hi Jacob, “Hinbatian ko pala hi imo tatay nga nagsiring kan Esau,

⁷‘Dad-i ako han imo pinanmanwaan ngan lutoa ini para ha akon. Katapos ko kaon, ighahatag ko ha imo an akon bendisyon ha atubangan han GINOO san-o ako mamatay.’

⁸Yana anak ko,” nagpadayon hi Rebecca, “pamati ha akon, ngan buhata an akon igtutugon ha imo.

⁹Pakadto han panon ngan pilia in duha nga magtambok nga nati nga mga kanding, basi makagluto ako han sura nga ayon gud ni imo tatay.

¹⁰Dadad-on mo ini ngadto ha iya, ngan ighahatag niya ha imo an iya bendisyon nga diri pa hiya mapatay.”

¹¹Kundi nagsiring hi Jacob kan iya nanay, “Maaram ka man nga barahiboon nga tawo hi Esau, kundi mahamis an akon panit.

¹²Bangin hikapon ako han akon tatay ngan hisabtan niya nga ginlilimbongan ko hiya; bangin lugod higabaan ako ngan diri kabendisyonan.”

¹³Binmaton hi iya nanay, “Mahingadi unta ha akon an gaba kontra ha imo, anak ko. Sugta la an akon iginsiring ha imo ngan kadtoa ngan kuhaa para ha akon an mga kanding.”

¹⁴Sanglit ginkuha niya an mga kanding, ngan gindara ini ngadto kan iya nanay. Ginluto ni iya nanay an marasa nga pagkaon nga ayon gud ni iya tatay.

¹⁵Niyan kinuha ni Rebecca an gimamaupayi nga panapton ni Esau, nga ginhimos niya didto han balay, ngan iginsul-ot ini kan Jacob.

¹⁶Ginputos niya an mga butkon ni Jacob han mga anit han kanding ngan an waray barahibo nga bahin han iya liog.

¹⁷Iginhatag niya kan Jacob an marasa nga pagkaon upod an tinapay nga iya ginhimo.

¹⁸Niyan kinmadto hi Jacob kan iya tatay ngan nagsiring, “Tatay!” “Oo,” binmaton hi Isaac. “Hin-o ka ba nga akon anak?”

¹⁹Binmaton hi Jacob, “Hi Esau ako nga suhag mo nga anak. Ginbuhat ko an iginsiring mo ha akon. Lingkod ngan kaon kan akon pinanmanwaan nga akon dara ha imo, basi makagbendisyon ka ha akon.”

²⁰Nagsiring hi Isaac, “Gin-unan-o mo hin madagmit nga pakadakop, anak ko?” Binmaton hi Jacob, “Ginbuligan ako han GINOO nga imo Dyos.”

²¹Nagsiring hi Isaac kan Jacob, “Duruduok daw ngadi basi makahikap ako ha imo. Tinuod ba nga hi Esau ka?”

²²Dinmuok hi Jacob ngadto kan iya tatay nga hinmikap ha iya ngan nagsiring, “Sugad han tingog ni Jacob an imo tingog, kundi sugad han mga butkon ni Esau an imo mga butkon.”

²³Waray hiya kumilala kan Jacob, kay barahiboon an iya mga butkon sugad ha kan Esau. Han mahatag na unta hiya han iya bendisyon kan Jacob,

²⁴pinmakiana anay hiya, “Tinuod ba nga hi Esau ka?” “Amo ako,” binmaton hiya.

²⁵Nagsiring hi Isaac, “Dad-i ako han imo ginluto nga pinanmanwaan. Katapos ko kaon, ighahatag ko ha imo an akon bendisyon.” Gindara ini ni Jacob ngadto ha iya, ngan gindad-an liwat hiya hin bino nga irimnon.

²⁶Katapos nagsiring ha iya hi iya tatay, “Duruduok ngadi ngan hadki ako, anak.”

²⁷Samtang nadaop hi Jacob hin pagharok ha iya, nakabaho hi Isaac han panapton ni Jacob sanglit ginbendisyonan hiya ni Isaac. Nagsiring hiya, “Sugad hin alimyon hin usa nga uma nga ginpakaupay han GINOO an mahamot nga baho han akon anak.

²⁸Tagan ka unta han Dyos hin tun-og tikang ha langit ngan himoon nga maglangbo an imo kaumhan! Tagan ka unta niya hin damo gud nga mga pagkaon ug bino!

²⁹Magin imo unta mga surugoon an kanasoran, ngan yumukbo unta ha imo atubangan an mga tawo. Maghadi ka unta han ngatanan mo nga kauropdan, ngan yumukbo unta ha imo atubangan an mga tulin han imo nanay. Mahigabaan unta adton mga magpapanhimaraot ha imo, ngan maghingaupay unta adton mga magpapakaupay ha imo.”

³⁰Nahuman an pagbendisyon ni Isaac kan Jacob, ngan han paghilakat gud la ni Jacob, inmabot man hi Esau nga iya bugto tikang han panganop.

³¹Nagluto liwat hiya hin marasa nga pagkaon ngan gindara ini ngadto kan iya tatay. Nagsiring hiya, “Tatay, alayon hin paglingkod ngan kaon han karne nga akon pinanmanwaan, basi makagbendisyon ka ha akon.”

³²“Hin-o ka ba?” pinmakiana hi Isaac. “Hi Esau ako nga imo suhag nga anak,” binmaton hiya.

³³Nangurog hin duro an bug-os nga lawas ni Isaac ngan pinmakianan hiya, “Hin-o man ngay-an adto nga nag-ihaw hin hayop ngan nagdurot hini ha akon? Kinaon ko yana pa gudla han waray ka pa aabot. Iginhatag ko na ha iya an akon kataposan nga bendisyon, sanglit iya na adto ha kadayonan.”

³⁴Han pakabati hini ni Esau, ginmuliat hiya hin pagtangis ngan nagsiring, “Tatay, tagi man liwat ako han imo bendisyon!”

³⁵Binmaton hi Isaac, “Kinmanhi an imo bugto ngan ginlimbongan ako. Gin-agaw niya an imo bendisyon.”

³⁶Nagsiring hi Esau, “Ikaduha na ini nga paglimbongi niya ha akon. Diri urosahon nga Jacob[59] an iya ngaran. Ginkuha niya an akon mga katungod hin pagkasuhag nga anak, ngan yana ginkuha niya an akon bendisyon. Waray ka ba magsalin hin bendisyon para ha akon?”

³⁷Binmaton hi Isaac, “Ginhimo ko na hiya nga imo agaron, ngan ginhimo ko nga iya mga oripon an ngatanan niya nga kauropdan. Gintagan ko hiya hin pagkaon ug bino. Yana waray na gud ako mahihimo para ha imo, anak!”

³⁸Nagpadayon hi Esau hin pakimalooy han iya amay, “Uusa ba gudla an imo bendisyon, tatay? Bendisyoni gad liwat ako, tatay!” Ngan nagtangis hiya.

³⁹Niyan nagsiring ha iya hi Isaac, “Waray tun-og tikang ha langit nga para ha imo. Waray maglangbo nga kaumhan nga para ha imo.

⁴⁰Mabubuhi ka pinaagi han imo espada, Kundi magigin oripon ka han imo bugto. Kundi kon umato[60] ka, Mahigagawas ka han iya gahom.”

⁴¹Napungot hi Esau kan Jacob, kay iginhatag ni iya tatay kan Jacob an bendisyon. Nakahunahuna hiya, “Diri na maiha an panahon hin pagkamasulob-on para han akon amay; katapos hito, papatayon ko hi Jacob nga akon bugto.”

⁴²Kundi ha pakabati ni Rebecca han larang ni Esau, ginpasugoan niya hi Jacob, ngan ginsiring, “Pamati, naghuhunahuna hi Esau nga imo bugto hin pagbulos ngan pagpatay ha imo.

⁴³Yana, anak, buhata an akon igtutugon ha imo. Pakadto dayon kan Laban nga akon bugto nga lalake didto ha Haran.

⁴⁴Pagpabilin anay didto ha iya tubtob han paghagkot han kasina han imo bugto,

⁴⁵ngan paghingalimot niya han imo ginbuhat ha iya. Niyan magsusugo ako hin tawo hin pagpauli ha imo. Kay ano nga mawawara dida han amo manta nga adlaw an duha ko nga mga anak nga kalalaken-an?”

⁴⁶Nagsiring hi Rebecca kan Isaac, “Ginugul-an na ako hin duro tungod han langyaw nga kaasaw-an ni Esau. Kon mangasawa liwat hi Jacob hin usa hini nga mga kababayen-an nga Hityohanon, gabay na la ako mamatay.”