Read Waray Samarenyo Meaning Based Genesis 28 Bible Online

Genesis 28 - Waray Samarenyo Meaning Based bible

Genesis 28

¹Gintawag ni Isaac hi Jacob, ngan ginsiring, “Ayaw pangasawa hin babaye nga Canaanhon.

²Pakadto lugod ha Mesopotamia, ngadto han balay ni Betuel nga imo apoy, ngan pangasawa hin usa han kababayen-an didto, usa han babaye nga mga anak ni Laban nga imo bata.

³Pagbendisyonan unta han Dyos nga Labi Kamakagarahum an imo pag-asawa ngan tagan unta kamo hin damo nga mga anak, basi mahimo ka nga amay hin damo nga kanasoran!

⁴Pagbendisyonan ka unta niya ngan an imo mga tulin sugad han iya pagbendisyon kan Abraham, ngan makagtag-iya ka unta hini nga tuna nga imo gin-ukyan, ngan iginhatag han Dyos kan Abraham!”

⁵Ginpakadto ni Isaac ha Mesopotamia hi Jacob, ngadto kan Laban nga anak ni Betuel nga taga Aramea, ngan bugto ni Rebecca nga iroy nira Jacob ug Esau.

⁶Nahibaro hi Esau nga ginbendisyonan ni Isaac hi Jacob ngan ginpakadto hiya ha Mesopotamia hin pamiling hin asawa. Nahibaro liwat hiya nga han pagbendisyoni ni Isaac kan Jacob, gintugon hiya nga diri mangasawa hin babaye nga Canaanhon.

⁷Hinbaroan niya nga sinmugot hi Jacob kanda iya tatay ug nanay, ngan kinmadto hiya ha Mesopotamia.

⁸Sanglit nahisabtan ni Esau nga waray maruyag hi Isaac nga iya amay han kababayen-an nga Canaanhon.

⁹Sanglit kinmadto hiya kan Ismael nga anak ni Abraham, ngan pinangasawa niya an anak ni Ismael nga hi Mahalat nga bugto nga babaye ni Nebaiot.

¹⁰Binmaya hi Jacob han Berseba ngan linmakat hiya tipakadto ha Haran.

¹¹Han katunod han adlaw inmabot hiya didto hin usa nga baraan nga dapit[61] ngan nagkampo hiya didto. Hinmigda hiya hin pagkaturog nga nakakaulon hin bato.

¹²Nag-inop hiya nga hinkit-an niya in usa nga hagdan nga naabot tikang ha tuna ngadto ha langit, nga may mga anghel nga nagsisinakalusad dida hini nga hagdan.

¹³Ngan hinkit-an niya an GINOO nga natukdaw ha sapit niya.[62] Nagsiring an GINOO, “Amo ako an GINOO nga Dyos nira Abraham ug Isaac. Ighahatag ko ha imo ngan ha imo mga tulin ini nga tuna nga imo hinihigdaan.

¹⁴Magdadamo hira sugad han mga tapotapo han tuna. Pahihiluagon nira an ira katunaan ha ngatanan nga pag-ultan ngan pinaagi ha imo ngan han imo mga tulin pagpapakaupayon ko an ngatanan nga kanasoran.[63]

¹⁵Hinumdomi, maupod ako ha imo ngan mananalipod ako ha imo bisan ngain ka kadto, ngan igbabalik ko ikaw nganhi hini nga tuna. Diri ko ikaw babayaan tubtob nga matuman ko an ngatanan nga akon iginsaad ha imo.”

¹⁶Nagmata hi Jacob ngan nagsiring, “Aanhi dinhe an GINOO! Aanhi hiya dinhe hini nga dapit, ngan diri ngani ako maaram hini!”

¹⁷Nahadlok hiya ngan nagsiring, “Hin kamakaaramdok hini nga dapit! An balay gud ini han Dyos; an ganghaan gud ini ngadto ha langit.”

¹⁸Timprano pa han pagkaaga binmangon hi Jacob, kinuha niya an bato nga gin-unlan niya, ngan gintindog ini niya sugad nga usa nga hinumdoman. Niyan gin-ipisan ini niya hin lana hin olibo ha paghalad hini nga bato ngadto ha Dyos.

¹⁹Ginngaranan niya nga Betel[64] an dapit. (Kinikilala nga Luz hadto anay ini nga bungto.)

²⁰Niyan nagsumpa hi Jacob ngadto han GINOO: “Kon mag-upod ka ha akon ngan panalipdan mo ako hini nga akon paglakaton, ngan tagan mo ako hin pagkaon ngan panapton,

²¹ngan kon makabalik ako nga talwas ngadto han balay han akon amay, niyan magigin Dyos ko gud ikaw.

²²Ini nga bato nga hinumdoman nga akon gintindog, mahihimo nga usa nga dapit diin pagsisingbahon ka, ngan ighahatag ko ha imo an ikanapulo nga bahin han ngatanan nga imo ighatag ha akon.”