Read Waray Samarenyo Meaning Based Genesis 34 Bible Online

Genesis 34 - Waray Samarenyo Meaning Based bible

Genesis 34

¹Usa ka adlaw kinmadto hi Dina nga anak nga babaye nira Jacob ug Lea hin pagbisita hin mga kababayen-an nga taga-Canaan.

²Han paghikit-i kan Dina ni Siquem nga anak ni Hamor nga Hibeohanon, nga amo an punoan hito nga tuna, gindara ngan ginlugos hiya.

³Kundi hinusayan hi Siquem kan Dina sanglit hinmigugma hiya ha iya ngan gintalinguha niya nga paghigugmaon hiya ni Dina.[89]

⁴Ginsiring niya an iya amay, “Karuyag ko asawahon ini nga babaye.”

⁵Hinbaroan ni Jacob nga ginpasipad-an an iya anak nga babaye, kundi tungod nga nakadto pa man an iya mga anak nga kalalaken-an ha kaumhan nga nagmamangno han iya mga hayop, waray la niya ginbuhat nga bisan ano tubtob han ira pagbalik.

⁶Ginmawas hi Hamor nga amay ni Siquem, hin pakighimangraw kan Jacob,

⁷samtang nga nagkakaabot man an mga anak nga kalalaken-an ni Jacob tikang han kaumhan. Han pakabati nira hiunong hini, nabido ngan napungot hira hin duro tungod nga ginbuhat ni Siquem in sugad nga butang ngan gintamay an mga tawo han Israel pinaagi hin paglugosa han babaye nga anak ni Jacob.

⁸Nagsiring hi Hamor kan Jacob, “Nahigugma hi Siquem nga akon anak han imo anak nga babaye; tugoti gad an akon anak hin pangasawa ha iya.

⁹Paghimo kita hin ginsabotan nga basi makahimo hin pangasawa an amon ngan han iyo mga tawo.

¹⁰Niyan makakag-ukoy kamo upod ha amon dinhe han amon tuna: makakag-ukoy kamo bisan diin an iyo karuyag, makakagpakabuhi kamo hin waray kaulangan, ngan makakagtag-iya kamo hin mga hiagi.”

¹¹Niyan nagsiring hi Siquem ngadto han amay ngan kabugtoan ni Dina, “Ighatag gad ha akon ini nga pabor, ngan tatagan ko kamo han bisan ano nga iyo karuyag.

¹²Sumati ako kon ano nga mga regalo an iyo karuyag ngan pangaroi ako han gimamahali nga bugay para hin pagkasal. Ighahatag ko ha iyo an bisan ano nga iyo pangaroon, kon tutugotan la ako niyo hin pangasawa kan Dina.”

¹³Tungod nga ginpasipad-an man ni Siquem hi Dina nga bugto nira, ginbaton han mga anak ni Jacob hi Siquem ngan hi Hamor nga iya amay hin malimbong nga paagi.

¹⁴Nagsiring ha ira an mga anak ni Jacob, “Diri kami makakatugot han amon bugto nga babaye nga pangasaw-on hin usa ka tawo nga diri tinori; makaarawod ito para ha amon.

¹⁵Makakatangdo la kami kon magsugad kamo ha amon, pinaagi hin pagtori han ngatanan niyo nga kalalaken-an.

¹⁶Niyan matangdo kami nga mag-aragsawa an aton mga tawo. Mag-uokoy kami tampo ha iyo ngan magigin-usa na la kita nga katawhan.

¹⁷Kundi kon diri niyo pagtumanon ini nga pagtori; dadad-on namon hi Dina ngan malakat kami.”

¹⁸Nakalipay ini nga ira mga pulong kan Hamor ngan kan Siquem nga iya anak,

¹⁹ngan waray na maglangan an batan-on nga lalake hin pagtuman han iginsiring, kay nahigugma man hiya han babaye nga anak ni Jacob. Hi Siquem amo an labi ka tinahod nga kaapi han iya panimalay.

²⁰Kinmadto hi Hamor ngan hi Siquem nga iya anak han dapit nga tirokan didto han ganghaan han bungto ngan nakighimangraw hira han ira mga igkasi taghimungto:

²¹“Makisasangkayon ini nga mga tawo; paukya ta hira upod ha aton dinhe ha aton tuna ngan tugoti ta hira hin pagpakabuhi hin waray kaulangan. Hiluag hin duro para ha ira liwat ini nga tuna. Pangasaw-a ta an ira mga anak nga kababayen-an.

²²Kundi matangdo la ini nga mga tawo hin pag-ukoy dinhe ha aton ngan karuyag nira hin pakig-usa ha aton kon aton pagtorion an ngatanan naton nga kalalaken-an sugad nga mga tinori hira.

²³Ighahatag nira ha aton an ngatanan nira nga kahayupan ngan an ngatanan nga ira mga hiagi. Sanglit uyoni ta la hira ngan makakag-ukoy hira dinhe ha aton.”

²⁴Inmuyon an ngatanan nga mga tuminungnong han syudad han kan Hamor ug Siquem iginsumat ha ira, ngan gintori an ngatanan nga kalalaken-an.

²⁵Paglabay hin tulo ka adlaw, han maundag pa an mga tinorian han kalalaken-an duha han mga anak ni Jacob, hira Simeon ug Levi nga kabugtoan ni Dina, kinmuha han ira mga espada, sinmakob hira han syudad nga waray gud katahapi hin maraot, ngan pinanmatay nira an ngatanan nga kalalaken-an,

²⁶lakip hi Hamor ngan hi Siquem nga iya anak. Niyan ginkuha nira hi Dina tikang han balay ni Siquem, ngan nagkalakat hira.

²⁷Katapos han panmatay, gintikasan an syudad han iba nga mga anak ni Jacob hin pagbulos tungod han paglugosa han ira bugto nga babaye.

²⁸Gindara nira an mga panon, an mga baka, an mga asno, ngan an ngatanan didto han syudad ngan didto han kaumhan.

²⁹Gindara nira an ngatanan nga mga manggad, ginbihag an ngatanan nga kababayen-an ngan kabataan, ngan gindara an ngatanan nga mga butang didto han kabablayan.

³⁰Nagsiring hi Jacob kanda Simeon ug Levi, “Gindad-an ako niya hin kasamokan; yana magdudumot ha akon an mga Canaanhon, an mga Periseohanon, ngan an ngatanan nga mga tawo dida han tuna. Diri damo an akon mga tawo; kon mag-urosa hira kontra ha akon ngan sulongon ako, mapupuo an aton bug-os nga panimalay.”

³¹Kundi binmaton hira, “Diri kami makakatugot nga pagsusugaron la hin usa nga maraot nga babaye an amon bugto.”