Read Waray Samarenyo Meaning Based Genesis 35 Bible Online

Genesis 35 - Waray Samarenyo Meaning Based bible

Genesis 35

¹Nagsiring an Dyos kan Jacob, “Pakadto dayon ha Betel, ngan didto pag-ukoy. Pagtindog didto hin usa nga altar para ha akon nga Dyos nga pinmakita ha imo han napalagiw ka tikang kan Esau nga imo bugto.”

²Sanglit nagsiring hi Jacob ha iya panimalay ngan ha ngatanan nga kaupod niya, “Bayai an langyaw nga kadiyosan nga aada ha iyo; paglinis kamo ha iyo ngahaw ngan pagsul-ot kamo hin maglinis nga mga panapton.

³Mabaya kita dinhe ngan makadto kita ha Betel diin magtitindog ako hin usa nga altar para han Dyos nga binmulig ha akon ha panahon han akon kakurian, ngan nagin kaupod ko ha ngatanan nga dapit nga akon kinakadtoan.”

⁴Sanglit iginhatag nira kan Jacob an ngatanan nga langyaw nga kadiyosan nga nakada ha ira, ngan an mga ariyos liwat nga ira isinusul-ot. Iginlubong ini ni Jacob ha sirong han kahoy nga tuog nga hirani han Sequem.

⁵Han pagkalakat na nira Jacob ngan han iya mga anak nga kalalaken-an, inalpan hin dako nga kahadlok an mga tawo han higrani nga mga bungto, ngan waray hira maglanat ha ira.

⁶Inmabot hi Jacob upod an ngatanan niya nga mga tawo ngadto ha Luz nga kinikilala na yana nga Betel, didto ha tuna han Canaan.

⁷Nagtindog hiya didto hin usa nga altar, ngan ginngaranan an dapit nga para han Dyos han Betel, kay didto pinmakita ha iya an Dyos han napalagiw hiya tikang han iya bugto.

⁸Namatay hi Debora nga yaya ni Rebecca, ngan iginlubong hiya ha sirong han kahoy nga tuog ha timogan nga dapit han Betel. Sanglit ginngaranan an dapit nga “Tuog hin Pagtangis.”

⁹Han pagbalik ni Jacob tikang ha Mesopotamia, pinmakita na liwat ha iya an Dyos, ngan ginbendisyonan hiya.

¹⁰Nagsiring ha iya an Dyos, “Jacob an imo ngaran, kundi tikang yana Israel na ngaran nimo.” Sanglit ginngaranan hiya han Dyos nga Israel.

¹¹Ngan nagsiring ha iya an Dyos, “Amo ako an Dyos nga Labi Kamakagarahum. Magdadamo an imo mga anak. Magtitikang ha imo in kanasoran ngan magigin ginikanan ka hin kahadian.

¹²Ighahatag ko ha imo an tuna nga iginhatag ko kan Abraham ngan kan Isaac, ngan ighahatag ko liwat ini ngadto han imo mga tulin nga masunod ha imo.”

¹³Niyan binayaan hiya han Dyos.

¹⁴Didto ha dapit diin nakighimangraw ha iya an Dyos, gintindog ni Jacob in usa nga bato nga hinumdoman, ngan iginhalad ini niya pinaagi hin pag-ipis hin bino ngan hin lana hin olibo ha bawbaw hini.

¹⁵Ginngaranan niya nga Betel ini nga dapit.

¹⁶Binmaya han Betel hi Jacob ngan an iya panimalay, ngan han hirayo pa hira tikang ha Efrata, inmabot an panahon han pag-anak ni Raquel, ngan ginkurian hiya.

¹⁷Dida han ginkukurian na gud hiya, nagsiring ha iya an partira, “Ayaw kahadlok, Raquel, kay lalake na liwat ini nga imo anak.”

¹⁸Kundi tikamaratay na hiya ginngaranan niya nga Benoni[90] an iya anak, kundi ginngaranan hiya nga Benjamin[91] han iya amay.

¹⁹Han kamatay ni Raquel, iginlubong hiya ha ligid han dalan tipakadto ha Efrata nga kinikilala na yana nga Betlehem.

²⁰Nagtindog hi Jacob hin usa nga bato nga hinumdoman didto, ngan ngada yana nga adlaw nahimo ini nga tigaman han linubngan kan Raquel.

²¹Nagpadayon hi Jacob ngan nagkampo hiya didto han luyo nga dapit han lantawan han Eder.

²²Samtang nag-uokoy hi Jacob didto hito nga tuna, nakighilawas hi Ruben kan Bilha nga usa han mga aruasawa han iya amay. Hinbaroan ini ni Jacob ngan duro gud an iya kapungot.[92] May-ada dose nga mga anak nga kalalaken-an hi Jacob.

²³An mga anak ni Lea amo hira Ruben (an suhag nga lalake ni Jacob), Simeon, Levi, Juda, Isacar, ug Zabulon.

²⁴An mga anak ni Raquel amo hira Jose ug Benjamin.

²⁵An mga anak ni Bilha nga oripon ni Raquel amo hira Dan ug Neftali.

²⁶An mga anak ni Zilpa nga oripon ni Lea amo hira Gad ug Aser. Didto ha Mesopotamia katawo ini nga mga anak nga kalalaken-an.

²⁷Kinmadto hi Jacob han iya amay nga hi Isaac didto ha Mamre nga hirani han Hebron, diin nag-ukoy hira Abraham ug Isaac.

²⁸Nakaabot hi Isaac hin panuigon nga 180,

²⁹ngan namatay hiya nga lagas na kaupay, ngan iginlubong hiya nira Esau ug Jacob nga iya mga anak.