Read Waray Samarenyo Meaning Based Genesis 39 Bible Online

Genesis 39 - Waray Samarenyo Meaning Based bible

Genesis 39

¹Niyan gindara hi Jose han mga Ismaelita ngadto ha Ehipto ngan iginbaligya hiya kan Potifar nga usa han mga opisyal han hadi, nga amo an kapitan han mga gwardya han palasyo.

²Nakada kan Jose an GINOO ngan ginhimo hiya nga mainuswagon. Nag-ukoy hiya didto han balay han iya agaron nga Ehiptohanon,

³nga nakakita nga nakada kan Jose an GINOO nga naghimo ha iya nga mainuswagon ha ngatanan nga iya ginbuhat.

⁴Nalipay ha iya hi Potifar ngan ginhimo hiya nga iya kalugaringon nga tinaporan. Sanglit ginbutang hiya nga tinaporan han iya kalugaringon nga panimalay ngan han ngatanan nga iya mga hiagi ug manggad.

⁵Tikang hito nga panahon, tungod kan Jose, ginpakaupay han GINOO an panimalay han Ehiptohanon ngan an ngatanan niya nga mga butang nga nakada han iya balay ngan didto han iya kaumhan.

⁶Igintubyan ni Potifar an ngatanan nga iya gintatag-iya ngadto han pagmangno ni Jose ngan waray na hiya manginlabot hin bisan ano gawas la han iya pagkaon. Maupay an tindog han lawas ni Jose ngan gwapo hiya.

⁷Waray pag-iha nagtikang hin kaipa kan Jose an asawa han iya agaron ngan ginhangyo hi Jose nga makighilawas ha iya.

⁸Dinmiri hi Jose ngan nagsiring ha iya, “Tan-awa daw, diri nanginginlabot an akon agaron hin bisan ano dinhe ha balay kay aanhi man ako. Iginbutang ako niya nga tinaporan han ngatanan nga iya mga hiagi ug manggad.

⁹May-ada ako sugad kadako nga gahom han iya gahom dinhe hini nga balay, ngan waray niya igdiri ha akon an bisan ano labot la ha imo. Sanglit uunanhon ko hin pakagbuhat hin sugad kamalaw-ay nga butang ngan pakasala kontra han Dyos?”

¹⁰Bisan kon ginhangyo niya hi Jose adlaw-adlaw, waray gud umalagad hi Jose hin pakighilawas ha iya.

¹¹Kundi usa ka adlaw, han pagsulod ni Jose han balay hin pagtuman han iya buruhaton, waray gud didto bisan usa han mga surugoon han balay.

¹²Kinaptan niya hi Jose ha iya hilawig nga bado ngan ginsiring, “Tana, dirig ha akon.” Kundi kinmalagiw hi Jose ngan dinmalagan ha gawas nga binayaan an iya hilawig nga bado dida han kamot han babaye.

¹³Han paghikit-i han babaye nga binayaan ni Jose an iya hilawig nga bado ngan dinmalagan ha gawas han balay,

¹⁴gintawag niya an iya mga surugoon ngan ginsiring hira, “Tan-awa daw ini! Gintatamay kita hini nga Hebreohanon nga gindara han akon bana nganhi ha balay. Sinmulod hiya han akon kwarto ngan nagsari hin paglugos ha akon, kundi ginmoliat ako hin dako sugad han akon mahimo.

¹⁵Han pakabati la niya han akon paggoliat, binayaan niya an iya hilawig nga bado dinhe ha akon ngan dinmalagan hiya ha gawas.”

¹⁶Ginhimos niya an hilawig nga bado ni Jose tubtob han pag-uli han agaron ni Jose.

¹⁷Niyan ginsumatan niya an agaron han amo manta nga sumat: “Sinmulod han akon kwarto ngan ginpasipad-an ako hito nga oripon nga Hebreohanon nga imo gindara nganhi.

¹⁸Kundi han paggoliat ko dinmalagan hiya ha gawas, nga binayaan niya an iya hilawig nga bado dinhe ha akon.”

¹⁹Napungot hin duro an agaron ni Jose

²⁰ngan iginpadakop hiya ngan iginsulod ha prisohan han mga binilanggo han hadi, ngan didto nagpabilin hiya.

²¹Kundi nakada kan Jose an GINOO ngan ginbendisyonan hiya, sanglit nalipay ha iya an gwardya han prisohan.

²²Iginbutang niya hi Jose nga tinaporan han ngatanan nga mga priso ngan ginhimo hiya nga may kaakohan han ngatanan nga ginbubuhat didto han prisohan.

²³Waray na manginlabot an gwardya han prisohan han bisan ano nga ginbubuhat ni Jose, kay nakada man kan Jose an GINOO, ngan ginhimo hiya nga mainuswagon dida han ngatanan nga iya ginbuhat.