Read Waray Samarenyo Meaning Based Genesis 4 Bible Online

Genesis 4 - Waray Samarenyo Meaning Based bible

Genesis 4

¹Niyan nakighilawas hi Adan kan Eva nga iya asawa. Nagburod hi Eva ngan nag-anak hin lalake ngan nagsiring, “Tungod han bulig han GINOO nagkamay-ada ako anak nga lalake.” Sanglit iya ginngaranan hiya nga Cain.[18]

²Ngan nag-anak liwat hi Eva hin lain nga lalake, hi Abel. Nahimo hi Abel nga usa nga magmarangno hin mga karnero, kundi parauma hi Cain.

³Usa ka adlaw nagdara hi Cain hin mga abot han iya inani ngan iya iginhalad ini ngadto han GINOO.

⁴Niyan nagdara hi Abel han suhag nga nati nga karnero nga igin-anak hin usa han iya mga karnero, gin-ihaw ini, ngan iginhatag an gimamay-upayi nga mga bahin hini. Nalipay an GINOO kan Abel ngan han iya halad,

⁵kundi iginsikway niya hi Cain ngan an iya halad. Napungot hin duro hi Cain ngan nagkuriot hiya hin kasina.

⁶Niyan nagsiring an GINOO kan Cain, “Kay ano nga nasisina ka? Kay ano nga nagkukuriot ka?

⁷Kon maupay an imo ginbuhat, mahiyomhiyom ka unta;[19] kundi tungod nga maraot an imo ginbuhat, nagama ha imo an sala ngan karuyag na hikaptan ka niya, sanglit kinahanglan nga madaog ini nimo.”

⁸Niyan nagsiring hi Cain kan Abel nga iya bugto, “Tana, pakadto kita didto ha kaumhan.”[20] Han nakadto na hira han kaumhan, dinasmagan ni Cain an iya bugto ngan ginpatay niya.

⁹Pinmakiana kan Cain an GINOO, “Hain na hi Abel nga imo bugto?” Binmaton hiya, “Ambot. Ako ba an magmarangno han akon bugto?”

¹⁰Niyan nagsiring an GINOO, “Kay ano nga ginbuhat mo ini nga makangingirhat nga butang? Nagoliat ngadi ha akon tikang ha tuna an dugo han imo bugto sugad hin goliat hin pagbulos.

¹¹Yana gagabaan ka ngan diri ka na makakag-uma han tuna nga hinumban han dugo han imo bugto ngan an tuna daw binmuka han iya baba basi makausop han dugo han imo bugto nga imo ginpatay.

¹²Kon mag-uma ka, diri mahatag hin bisan ano nga abot an tuna; maglilinayawlayaw ka nga waray himangkaagan ug urokyan ha bawbaw han tuna.”

¹³Ngan ginsiring ni Cain an GINOO, “Makuri ko ini maantos nga kastigo.

¹⁴Ginpapaiwas mo ako tikang han tuna ngan tikang ha imo atubangan. Maglilinayawlayaw ako nga waray urokyan ha bawbaw han tuna, ngan pagpapatayon ako han bisan hin-o nga makaagi ha akon.”

¹⁵Kundi binmaton an GINOO, “Diri ini mahinanabo. Kon may-ada magpatay ha imo, pagbabaydan liwat ini hin pito nga kinabuhi.” Sanglit ginbutangan han GINOO hi Cain hin tigaman basi diri hiya pagpatayon han bisan hin-o nga makakita ngan igkatapo niya.

¹⁶Ngan pinmahirayo hi Cain han GINOO ngan nag-ukoy hiya didto hin usa nga tuna nga ginngaranan nga Nod[21] ha sinirangan han Eden.

¹⁷Nag-anak hin usa nga lalake hira Cain ngan han iya asawa, ngan ginngaranan hiya nga Enoc. Niyan nagtindog hi Cain hin syudad ngan isinangay ini han iya anak.

¹⁸May-ada usa nga anak nga lalake hi Enoc nga ginngaranan nga Irad nga amo an amay ni Mehujael nga amay ni Matusael nga amay ni Lamec.

¹⁹May duha nga mga asawa hi Lamec: hira Ada ug Zila.

²⁰Nag-anak hi Ada kan Jabal nga amo an ginikanan hadton mga magmarangno hin kahayopan ngan nag-uokoy dida hin mga tulda.

²¹An iya bugto amo hi Jubal nga ginikanan han ngatanan nga mga musikero nga nagtutukar han arpa ngan han plauta.

²²Nag-anak hi Zila kan Tubal-cain nga maghirimo hin magkalainlain nga mga garamiton[22] tikang hin bronse ug puthaw. Hi Naama amo an babaye nga bugto ni Tubal-cain.

²³Ginsiring ni Lamec an iya kaasaw-an, “Ada ug Zila, pamatii ako. Nakamatay ako hin batan-on nga lalake kay ginsuntok ako niya.

²⁴Kon pito nga kinabuhi an iginbabayad para hin pagpatay kan Cain, setentay siete nga kinabuhi an igbabayad kon pagpatayon ako.”

²⁵Nag-anak liwat hin lain nga lalake hira Adan ngan han iya asawa. Nagsiring hi Eva kan Adan, “Gintagan ako han Dyos hin usa nga anak nga lalake nga liwan kan Abel nga ginpatay ni Cain.” Sanglit iya ginngaranan nga Set[23] an bata.

²⁶May-ada usa nga anak nga lalake hi Set nga ginngaranan niya nga Enos. Amo adto an panahon nga nagtikang an mga tawo hin pagsangpit ngan pagsingba han baraan nga ngaran han GINOO.