Read Waray Samarenyo Meaning Based Genesis 40 Bible Online

Genesis 40 - Waray Samarenyo Meaning Based bible

Genesis 40

¹Paglabay hin panahon nakatalapas han hadi han Ehipto an iya tinaporan han bino ngan an iya labaw nga parahimo hin tinapay.

²Nasina hiya hini nga duha nga mga opisyal,

³ngan ginpriso hira didto han balay han kapitan han gwardya, didto han amo manta nga dapit nga ginbutangan kan Jose.

⁴Nag-iha hira didto han prisohan, ngan ginhimo han kapitan hi Jose nga ira surugoon.

⁵Usa ka gab-i didto han prisohan nag-inop an tinaporan han bino ngan an labaw nga parahimo han tinapay, ngan may-ada magkalain nga kahulogan an ira mga inop.

⁶Han pagkadtoa ha ira ni Jose dida han aga, hinkit-an niya nga masulob-on hira.

⁷Nagpakiana hiya ha ira, “Kay ano nga masulob-on kamo hin duro pagkit-on yana adlaw?”

⁸Binmaton hira, “Nag-inop an kada usa ha amon ngan waray gud dinhe tawo nga nakakagsaysay han kahulogan han mga inop.” Nagsiring hi Jose, “An Dyos amo an nahatag hin kaaram hin paghubad hin mga inop. Sumati ako han iyo mga inop.”

⁹Sanglit nagsiring an tinaporan han bino, “Dida han akon inop may-ada usa ka puno hin ubas ha akon atubangan

¹⁰nga may-ada tulo nga mga sanga. Kahuman gud la panaringsing hini, nanmunga ini ngan nagkahihinog an mga ubas.

¹¹Kinakaptan ko an kupa han hadi; sanglit kinuha ko an mga bunga han ubas ngan ginpuga ko ini ngadto han kupa, ngan iginhatag ko ini ha iya.”

¹²Nagsiring hi Jose, “Amo ini an kahulogan hini: an tulo nga mga sanga amo an tulo ka adlaw.

¹³Tulo nala ka adlaw bubuhian ka an han hadi, pasasayloon ka, ngan igbabalik ka ngadto han imo katungdanan. Ighahatag mo ha iya an iya kupa sugad han imo ginbuhat hadto anay han ikaw pa an iya tinaporan han bino.

¹⁴Kundi hinumdomi gad ako kon maghingaupay ka na, ngan malooy ka unta hin paghinabi ha akon ngadto han hadi ngan buligan ako hin paggawas dinhe hini nga prisohan.

¹⁵Ha tinuod gud, ginkawat la ako pagdad-a nganhi tikang han tuna han mga Hebreohanon, ngan bisan pa dinhe ha Ehipto waray ko ginbuhat nga bisan ano nga sadang pasikaran han akon kapriso.”

¹⁶Han pakakita han labaw nga parahimo han tinapay nga maupay an kahulogan han inop han tinaporan han bino, nagsiring hiya kan Jose, “Nag-inop liwat ako; nagtutukdo ako hin tulo nga mga basket nga surudlan hin tinapay.

¹⁷Didto han bawbaw nga basket nakadto an magkalainlain nga hinudno nga mga pagkaon nga para han hadi, ngan ginkikinaon ini han katamsihan.”

¹⁸Binmaton hi Jose, “Amo ini an kahulogan: an tulo nga mga basket amo an tulo ka adlaw.

¹⁹Tulo nala ka adlaw bubuhian ka na han hadi—ngan papupugotan ka niya! Niyan iya pagbibitayon an imo lawas dida hin usa nga palo ngan pangangaonon han katamsihan an imo unod.”

²⁰Paglabay hin tulo ka adlaw, dida han kaadlawan han hadi naghatag hiya hin usa nga kombite para han ngatanan niya nga mga opisyal. Ginbuhian niya an iya tinaporan han bino ngan an iya lagaw nga parahimo hin tinapay ngan gindara hira ha atubangan han iya mga opisyal.

²¹Iginbalik niya an tinaporan han bino ngadto han iya una nga katungdanan,

²²kundi iya iginpapatay an labaw nga parahimo hin tinapay. Natuman an ngatanan sugad gud han iginsiring ni Jose.

²³Kundi waray nagud hinumdomi hi Jose han tinaporan han bino—iya hinkalimtan na gud la hiya.