Read Waray Samarenyo Meaning Based Genesis 43 Bible Online

Genesis 43 - Waray Samarenyo Meaning Based bible

Genesis 43

¹Nagtikagrabi an gutom didto ha Canaan,

²ngan han kaubos na han ngatanan nga trigo nga ira gindara tikang ha Ehipto, nagsiring hi Jacob ha iya mga anak, “Balik kamo ngadto ngan palit hin gutiay nga pagkaon para ha aton.”

³Nagsiring ha iya hi Juda, “Ginpahimatngonan gud kami han tawo nga diri hiya makarawat ha amon kon diri upod namon an amon bugto.

⁴Kon tumugot ka nga umupod ha amon an amon bugto, makadto kami ngan mapalit hin pagkaon para ha imo.

⁵Kon diri ka tumugot, diri kami makadto, kay nagsiring ha amon an tawo nga diri gud kami kakarawaton niya gawas kon upod ha amon an amon bugto.”

⁶Nagsiring hi Jacob, “Kay ano hin pagdad-i niyo ha akon hin damo nga kakurian pinaagi hin pagsumat han tawo nga may-ada pa niyo iba nga bugto?”

⁷Nagbaton hira, “Nagpinakiana an tawo hiunong ha aton ngan han aton panimalay, ‘Buhi pa ba an iyo amay? May-ada pa ba kamo iba nga bugto nga lalake?’ Kinahanglan batonon namon an iya mga pakiana. Uunanhon namon hin paghibaro nga iya igpapakuha ha amon an amon bugto?”

⁸Nagsiring hi Juda ha iya amay, “Paupda ha akon an bata, ngan magkakalakat kami dayon, basi waray ha aton mamamatay hin gutom.

⁹Igsasaad ko sugad nga garantiya an akon kalugaringon nga kinabuhi ngan ako an labi nga maaram ha iya. Kon diri ko hiya mahigbalik ha imo ha maupay nga kahimtang, aangkonon ko an kasaypanan ha bug-os ko nga kinabuhi.

¹⁰Kon waray pa kami paghinulat hin maiha, ngada yana makaduha na unta kami pakabalik.”

¹¹Nagsiring ha ira an ira amay, “Kon amo man ito an kinahanglan, buhata ini: dad-a ha iyo mga surudlan an gimamag-upayi nga mga abot han tuna sugad nga regalo para han gobernador: mga balsamo, mga dugos, mga pahamot, mga pili, ngan mga almendras.

¹²Pagdara liwat kamo hin duble kadamo nga kwarta, kay kinahanglan igbalik niyo an kwarta nga iginbutang dida ha ganggang han iyo mga sako. Bangin usa la ini nga kalipat.

¹³Dad-a an iyo bugto, ngan balik kamo dayon.

¹⁴Igtugot unta han Dyos nga Labi Kamakagarahum nga malooy ha iyo an tawo, basi igbalik ha iyo hin Benjamin ngan an usa pa niyo nga bugto. Para ha akon, kon kinahanglan mawara an akon mga anak, pag-aantoson ko ini.”

¹⁵Sanglit gindara han magburugto an mga regalo ngan duble kadamo nga kwarta, ngan ginmikan hira para ha Ehipto upod hi Benjamin. Didto pinmakita hira kan Jose.

¹⁶Han paghikit-i ni Jose kan Benjamin nga upod ha ira, nagsiring hiya ngadto han surugoon nga tinaporan han iya balay, “Dad-a ini nga mga tawo ngadto han akon balay. Maniningudto hira upod ha akon, sanglit pag-ihaw hin mananap ngan andama ini.”

¹⁷Ginbuhat han surugoon sumala han iginsugo ha iya, ngan gindara an magburugto ngadto han balay ni Jose.

¹⁸Samtang gindadara na hira ngadto han balay, nahadlok ngan naghunahuna hira, “Gindadara kita nganhi tungod han kwarta nga iginbutang dida han aton mga sako han syahan ta nga pagkanhi. Aawayon kita nira, kukuhaon an aton mga asno, ngan hihimoon kita nga iya mga oripon.”

¹⁹Sanglit dida han porta han balay, nagsiring hira ngadto han surugoon nga tinaporan,

²⁰“Kon mahimo, mano, kinmanhi kami hadto makausa hin pagpalit hin pagkaon.

²¹Han pagkampo namon dida han amon pagtipauli, gin-abrehan namon an amon mga sako, ngan hin-agian han tagsa ka tawo an iya kwarta dida ha ganggang han iya sako—an ngatanan gud nga kwarta. Amon ini ginbalik nganhi ha imo.

²²Nagdara liwat kami hin darudamo pa nga kwarta nga igpapalit hin dugang nga pagkaon. Diri kami maaram kon hin-o an nag-uli han amon mga kwarta ngadto han amon mga sako.”

²³Nagsiring an surugoon, “Ayaw kamo kabaraka. Ayaw kamo kahadlok. Bangin iginbutang han iyo Dyos nga Dyos han iyo amay an kwarta dida han iyo mga sako para ha iyo. Kinmarawat man ako han iyo bayad.” Niyan gindara niya hi Simeon ngada ha ira.

²⁴Gindara han surugoon an magburugto ngadto han balay. Iya gintagan hira hin tubig basi makagpanhimsaw hira, ngan gintubongan niya an ira mga asno.

²⁵Gin-andam nira an ira mga regalo nga ighahatag nira kan Jose kon umabot hiya dida han udto, kay ginsumatan man hira nga makikigsaro hiya ha iya.

²⁶Han pag-abot la ni Jose ha balay, gindara nira an regalo ngadto ha iya, ngan nanhapa hira ha iya atubangan.

²⁷Nangumosta hiya ha ira hiunong han ira panlawas ngan katapos nagsiring, “Kumosta man an iyo tatay nga iyo iginsumat ha akon? Buhi pa ba hiya ngan maupay ba an iya panlawas?”

²⁸Binmaton hira, “Buhi pa ngan maupay man gihapon an amon amay nga imo ubos nga surugoon.” Ngan nanluhod ngan nanyukbo hira ha iya atubangan.

²⁹Han paghikit-i la ni Jose kan Benjamin nga iya bugto, nagsiring hiya, “O, amo ngay-an ini an iyo gimamanghori nga bugto nga iginsumat niyo ha akon. Pagbendisyonan ka unta han Dyos, anak ko.”

³⁰Niyan binmaya hi Jose hin kadagmitan kay tugob na gud an iya kasingkasing hin kalooy para han iya bugto. Nag-iitarangis na hiya, sanglit sinmulod hiya han iya kwarto ngan nagtangis.

³¹Katapos niya maghiramos, ginmawas hiya nga ginpupugngan niya an iya kalugaringon ngan nagsugo hiya nga magdurot na han pagkaon.

³²Gindurotan hi Jose dida hin usa nga lamesa ngan ha lain nga lamesa an iya kabugtoan. Gindurotan didto hin lain nga lamesa an mga Ehiptohanon nga nangangaon didto, kay ha ira paghunahuna makakapahiubos gud ha ira an pakigsaro han mga Hebreo.

³³Ginpalingkod an kabugtoan nga naatubang kan Jose hin sunodsunod sumala han ira panuigon, tikang han gimamagurangi ngadto han gimamanghori. Han paghikit-i nira han ira sunodsunod nga pangalingkod, naggipasirusiplat hira hin paghipausa.

³⁴Gindurotan hira hin pagkaon tikang didto han lamesa ni Jose, ngan gindurotan hi Benjamin hin lima ka pilo kadamo kay han igindurot han iba ha ira. Sanglit nangaon ngan nag-irignom hira upod kan Jose tubtob han pagkahuhubog nira.