Read Waray Samarenyo Meaning Based 2 Samuel 3 Bible Online

2 Samuel 3 - Waray Samarenyo Meaning Based bible

2 Samuel 3

¹Nag-iha an pag-inaraway han kasondalohan nga naugop han panimalay ni Saul kontra han mga naugop han panimalay ni David. Nagtikakusog hi David samtang nagtikaluya an iya mga pangontra.

²Natawo kan David didto ha Hebron an masunod nga unom nga kalalaken-an, tikang han gimamagurangi: hi Amnon an suhag kanay iroy amo hi Ahinoam nga taga-Jezrael;

³sunod hi Quileab nga anak ni Abigail nga taga-Carmelo, nga nabalo kan Nabal; hi Absalon nga anak ni Maaca nga anak nga babaye ni Hadi Talmai han Gesur;

⁴hi Adonias nga anak ni Haguit; hi Sefatias nga anak ni Abital;

⁵hi Itream nga anak ni Egla. Ini ngatanan mga anak ni David ngan didto hira ngatanan natawo ha Hebron.

⁶Samtang nagpapadayon an away han kan David kasondalohan kontra han kasondalohan nga naugop han panimalay ni Saul, nagin gamhanan hi Abner han mga sakop ni Saul.

⁷Usa ka adlaw ginsumbong ni Isboset nga anak ni Saul hi Abner tungod hin pakigdirig niya kan Rispa nga anak ni Aia ngan aruasawa ni Saul.

⁸Nasina gud hi Abner. Ginmoliat hiya, “Naghuhunahuna ka ba nga maglilingo ako kan Saul? Naghuhunahuna ka ba nga nag-aalagad ako han Juda? Tikang ha tinikangan maunongon ako kan Saul nga imo amay, han iya kabugtoan, ngan han iya kasangkayan, ngan gintinguha ko nga diri ka pirdehon ni David; kundi yana gintatahapan mo ako hin kasal-anan hiunong hin babaye!

⁹Nagsaad kan David an GINOO nga iya kukuhaon an ginhadian tikang kan Saul ngan han iya katulinan ngan hihimoon hi David nga hadi han bug-os nga Israel ug Juda, tikang ha usa nga kataposan han nasod ngadto ha luyo. Yana patayon unta ako han Dyos kon diri ko ini matuman!”

¹¹Duro gud an kahadlok ni Isboset kan Abner nga waray hiya makayakan bisan usa ka pulong.

¹²Nagpasugo hi Abner ngadto kan David nga hito nga panahon nakadto pa ha Hebron,[3] hin pagsiring, “Hin-o in maghahadi hini nga tuna? Pagsabot kita ngan bubuligan ko ikaw nga maimo an bug-os nga Israel.”

¹³“Maupay!” binmaton hi David. “Makikigsabot ako ha imo, kundi kinahanglan dad-on mo ngadi ha akon hi Mical nga anak ni Saul kon kumadi ka pakigkita ha akon.”

¹⁴Ngan nagsugo liwat hi David ngadto kan Isboset hin pagsiring, “Ibalik ha akon hi Mical nga akon asawa. Ginbaydan ko hin usa ka gatos nga kayupapis han ikinatawo hin mga Filisteohanon an pangasawa ko ha iya.”

¹⁵Sanglit iginpakuha ni Isboset hi Mical tikang han iya bana nga hi Paltiel nga anak ni Lais.

¹⁶Nagsinunod ha iya hi Paltiel tubtob gud ngadto han bungto han Bahurim, nga nagtitinangis samtang naglalakat hiya. Kundi han pagsidnga ha iya ni Abner, “Uli na,” inmoli hiya.

¹⁷Kinmadto hi Abner han mga pangulo han Israel ngan nagsiring ha ira, “Maiha na nga karuyag niyo nga hi David an maghadi ha iyo.

¹⁸Yana na an iyo higayon. Hinumdomi nga nagsiring an GINOO, ‘Gagamiton ko hi David nga akon surugoon pagtalwas han akon mga tawo nga Israelita tikang han mga Filisteohanon ngan han ngatanan nga ira mga kaaway.’”

¹⁹Naghimangraw liwat hi Abner han mga tawo nga sakop han tribo ni Benjamin, ngan katapos kinmadto hiya ha Hebron pagsumat kan David han ginkauyonan nga bubuhaton han mga tawo han Benjamin ngan han Israel.

²⁰Han pag-abot ni Abner upod in 20 ka tawo ngadto kan David didto ha Hebron, ginkombitehan hira ni David.

²¹Ginsiring ni Abner hi David, “Makadto na ako ngan tatalinguhaon ko nga makabig ngada han Imo Kaharangdon an bug-os nga Israel. Kakarawton ka nira nga hadi ngan maaangkon mo na an imo karuyag ngan maghahadi ka han bug-os nga tuna.” Ginpatapod ni David hi Abner nga waray maglalabot ha iya, ngan ginpagikan hiya.

²²Waray pag-iha inmabot hi Joab ngan an iba nga mga opisyal ni David tikang hin pagsulong, nga dara in damo hin duro nga mga tinikas. Kundi waray na didto ha Hebron hi Abner, kay ginpagikan ngan ginpatapod na hiya ni David.

²³Han pag-abot ni Joab ngan han iya mga tawo, ginsumatan hiya nga kinmadto kan Hadi David hi Abner ngan ginpagikan hiya ngan ginpatapod nga waray mahinanabo ha iya.

²⁴Sanglit kinmadto han hadi hi Joab ngan nagsiring ha iya, “Ano ngani an imo ginbuhat? Kinmanhi na ha imo hi Abner—kay ano nga ginpagikan mo pa hiya?

²⁵Kinmanhi hiya paglingo ha imo, ngan panginano han mga dapit nga imo kinakadtoan, ngan han imo ginbubuhat. Sayod ka man hini ngatanan!”

²⁶Han pagbaya na niya kan David, iginpakuha ni Joab hi Abner ngan iginbalik hiya nira tikang ha Atabay han Sira; kundi waray kalibutan hini hi David.

²⁷Han pag-abot ni Abner didto ha Hebron, gindara hiya ni Joab ngadto ha ligid han ganghaan, nga sugad hin karuyag makighimangraw ha iya hin hilit, ngan didto ginbuno hiya ha tiyan. Sanglit ginpatay hi Abner kay iya man ginpatay hi Asahel nga bugto ni Joab.

²⁸Han paghibaro hini ni David, nagsiring hiya, “Sayod an GINOO nga waray gud sala ako ngan an akon mga sakop han pagpataya kan Abner.

²⁹Mahingada unta kan Joab ngan han iya panimalay an kastigo para hini! Mamay-ada unta tawo dida han iya panimalay nga masakit hin gonorea o sanla, o nga waray gamit ngan magluya, o mamatay ha pag-awayan, o mawaray igo nga pagkaon!”

³⁰Sanglit binmulos kan Abner hira Joab ngan hi Abisai nga iya bugto tungod han pagpataya kan Asahel nga ira bugto didto han pag-awayan ha Gabaon.

³¹Niyan nagsugo hi David kan Joab ngan han iya mga tawo paggisi han ira mga panapton, pagsul-ot hin sako, ngan pagmabidoon para kan Abner. Ngan dida han paglubong naglakat hi Hadi David ha luyo han lungon.

³²Iginlubong hi Abner didto ha Hebron, ngan nagtangis hin dako nga tingog an hadi didto han lubnganan, sugad man an ngatanan nga mga tawo.

³³Ginkanta ni David ini nga pagnguyngoy para kan Abner: “Kinahanglan mamatay ba hi Abner sugad hin lurong?

³⁴Iya mga kamot diri man hinigtan, iya mga tiil diri man pinandogan; Natumba hiya sugad hin kapukan hin usa ha atubangan hin mga kriminal!” Ngan gintangisan liwat hiya han mga tawo.

³⁵Ha bug-os nga adlaw gintinguha han mga tawo nga kumaon hi David, kundi nagsumpa hiya, “Patayon unta ako han Dyos kon kumaon ako hin bisan ano nga diri pa natutunod an adlaw!”

³⁶Nasayod ini hira ngan nalipay hira. Ha tinuod, nakalipay han mga tawo an ngatanan nga ginbuhat han hadi.

³⁷Nasayod an ngatanan nga mga tawo ni David ngan an ngatanan nga mga tawo ha Israel nga waray labot an hadi han pagpataya kan Abner.

³⁸Nagsiring an hadi han iya mga opisyal, “Diri ba kamo maaram nga namatay yana nga adlaw in usa nga dako nga pangulo ha Israel?

³⁹Bisan kon ako an ginpili han Dyos nga hadi, naabat ako hin kaluya yana nga adlaw. Uraura hin kamagpintas para ha akon ini nga mga anak nga kalalaken-an ni Seruia! Kastigohon unta han GINOO han angay ha ira ini nga mga kriminal!”