Read Waray Samarenyo Meaning Based 2 Samuel 4 Bible Online

2 Samuel 4 - Waray Samarenyo Meaning Based bible

2 Samuel 4

¹Han paghibaro ni Isboset nga anak ni Saul nga ginpatay hi Abner didto ha Hebron, nahadlok hiya, ngan nalisang an bug-os nga mga tawo han Israel.

²May-ada hi Isboset duha nga mga opisyal. Amo ini hira an pangulo han hugpo para hin pagsulong, hira Baana ug Recab nga mga anak ni Rimon nga taga-Beerot nga sakop han tribo ni Benjamin. (Iniisip nga bahin han Benjamin an Beerot.

³Nangalagiw ngadto ha Gitaim an tinuod nga mga umurokoy han Beerot, diin nag-ukoy hira tikang pa hadto.)

⁴Usa pa nga kaliwat ni Saul amo hi Mefiboset nga anak ni Jonatan. Lima pa la an iya panuigon han pagpataya kanda Saul ug Jonatan. Han pag-abot tikang ha Jezrael han sumat nga patay na hira Saul ug Jonatan, ginpurot hiya han iya magmarangno ngan kinmalagiw; kundi han duro nga pagdagmit han magmarangno nabuhian ngan nahulog hiya, ngan napiay.

⁵Kinmadto han balay ni Isboset hira Recab ug Baana, ngan inmabot hira didto nga naudtohan an adlaw, samtang napahuway hi Isboset.

⁶Ginpiraw an babaye nga nagbabantay han porta samtang nagsisisig hiya hin trigo, ngan nahingaturog hiya, sanglit nakasulod dayon hira Recab ug Baana.[4]

⁷Han didto na hira ha sakob, sinmulod hira han katurogan nga kwarto ni Isboset, diin hinmumuokan hiya, ngan ginpatay nira hiya. Niyan ginpugotan hiya nira, gindara an ulo, ngan naglatas hira ha bug-os nga gab-i han Kahamub-an han Jordan.

⁸Ginhatag nira an ulo kan Hadi David didto ha Hebron, ngan nagsiring ha iya, “Iini an ulo ni Isboset, nga anak ni Saul nga imo kaaway nga nag-iparatay ha imo. Yana nga adlaw gintugotan han GINOO an Imo Kaharangdon hin pagbulos kan Saul ngan han iya mga tulin.”

⁹Ginbaton hira ni David, “Nagsusumpa ako pinaagi han buhi nga GINOO nga nagtalwas ha akon tikang han ngatanan nga kataragman!

¹⁰An magsarangyaw nga kinmadto ha akon didto ha Siclag nga nagsumat ha akon han kamatayon ni Saul, naghunahuna nga dara niya in maupay nga sumat. Gindakop ngan ginpapatay ko hiya. Amo adto an suhol nga akon iginhatag ha iya tungod han iya maupay nga sumat!

¹¹Labaw pa gud hin kamaraot para han magraot nga mga tawo an pagpatay hin tawo nga waray sala, nga nakaturog la dida han iya kalugaringon nga balay! Yana bubulson ko kamo tungod han pagpatay niyo ha iya, ngan pupuohon ko kamo dinhe ha bawbaw han tuna!”

¹²Nagsugo hi David ngan ginpatay han iya mga sondalo hira Recab ug Baana, ngan gin-utod an ira mga kamot ngan mga tiil nga ira ginbitay hirani han linaw didto ha Hebron. Kinuha nira an ulo ni Isboset ngan iginlubong ini didto han lubnganan ni Abner ha Hebron.