Read Waray Samarenyo Meaning Based 2 Samuel 7 Bible Online

2 Samuel 7 - Waray Samarenyo Meaning Based bible

2 Samuel 7

¹Madig-on na an kamutangan ni Hadi David didto han iya palasyo, ngan gintalwas na hiya han GINOO han ngatanan niya nga mga kaaway.

²Niyan nagsiring an hadi kan Natan, “Nag-uokoy ako dida hin balay nga hinimo hin mga kahoy nga sidro, kundi aada la hin tulda an Kahon han Ginsaaran han Dyos!”

³Binmaton hi Natan, “Buhata an imo ginhuhunahuna, kay aada ha imo an GINOO.”

⁴Kundi hito nga gab-i nagsiring an GINOO kan Natan,

⁵“Kadtoa ngan sumati hi David, an akon surugoon, nga nasiring ako ha iya, ‘Diri ikaw an magtitindog hin templo nga akon uokyan.

⁶Tikang han paggawara ko han mga tawo han Israel ha Ehipto ngada yana, waray pa gud ako mag-ukoy hin templo. Dida han paglakaton ha kamingawan, nagbarobalhin ako pag-ukoy dida hin tulda.

⁷Ha ngatanan nga akon paglakaton upod han mga tawo han Israel waray ako pakiana han mga pangulo[13] nga akon gintudlok kay ano nga waray ako nira ighimo hin templo nga sidro.’

⁸“Sanglit sumati hi David nga akon surugoon nga nasiring ha iya hi ako nga GINOO nga Labi Kamakagarahum, ‘Ginkuha ko ikaw hin ka paramangno hin mga karnero didto han kaumhan ngan ginhimo ko ikaw nga pangulo han akon mga tawo nga Israel.

⁹Dayuday kaupod ako nimo bisan diin ka kadto, ngan ginpirde ko an ngatanan mo nga mga kaaway samtang nasulong ka ha ira. Hihimoon ko ikaw nga sugad ka bantogan han labi kagamhanan nga mga pangulo dinhe ha kalibutan.

¹⁰Nagpili ako hin dapit para han akon mga tawo nga Israelita ngan akon hira iginpahimutang didto, diin mag-uokoy hira hin waray na magtatalumpigos ha ira. Tikang han pagsulod nira hini nga tuna, ginsulong hira hin mag-isog nga mga tawo, kundi diri na ini mahinanabo ha ira. Nagsasaad ako hin pagtalwas ha imo tikang han ngatanan mo nga mga kaaway ngan paghatag ha imo hin mga tulin.

¹²Kon mamatay ka na ngan iglubong tampo han imo mga ginikanan, hihimoon ko nga hadi in usa han imo mga anak ngan padidig-onon ko an iya ginhadian.

¹³Hiya amo an magtitindog hin templo para ha akon, ngan tatalinguhaon ko nga maghadi an iya katulinan ha kadayonan.

¹⁴Magigin amay ako niya ngan magigin anak ko hiya. Kon makasayop hiya, kakastigohon ko hiya sugad hin pagkastigo han iya anak hin usa nga amay.

¹⁵Kundi diri ko kukuhaon ha iya an akon tambulig, sugad han akon ginbuhat kan Saul nga akon ginkuha basi mahimo ka nga hadi.

¹⁶Dayuday magkakamay-ada mga tulin ngan magpapadayon an imo ginhadian. Diri gud matatapos an paghadi han imo katulinan.’”

¹⁷Iginsumat ni Natan kan David an ngatanan nga iginpadayag ha iya han Dyos.

¹⁸Niyan sinmulod hi David han Tulda han GINOO, linmingkod, ngan nag-ampo hiya, “Diri ako takus, bisan ngani an akon panimalay han imo na ginbuhat ha akon, O Ginoo nga DYOS.

¹⁹Kundi ginbubuhat pa nimo in labaw pa gud, O Ginoo nga DYOS; nagsaad ka mahitungod han akon katulinan ha tiarabot nga katuigan. Ngan iginpakita mo ha akon an tiarabot ko nga mga katulinan,[14] O Ginoo nga DYOS!

²⁰Ano pa in akon igsisiring ha imo! Nakilala ka ha akon nga imo surugoon.

²¹Imo ini kaburot-on ngan paglarang hin pagbuhat hini; ginbuhat mo ini ngatanan nga dagko nga mga butang basi makagtutdo ka ha akon.

²²Hin pagkagamhanan nimo, O Ginoo nga DYOS! Waray gud masugad ha imo; maaram gud kami nga ikaw la an Dyos.

²³Waray iba nga nasod ha tuna nga sugad han Israel nga imo gintalwas hin pagkaoripon basi mahimo hira nga imo kalugaringon nga mga tawo. Nakapabantog ha imo ha bug-os nga kalibutan an dagko ngan urosahon nga mga butang nga imo ginbuhat para ha ira.[15] Gintabog mo[16] in iba nga mga nasod ngan an ira kadiyosan han pagsulong han imo mga tawo nga imo gintalwas tikang ha Ehipto basi magin imo kalugaringon hira.

²⁴Ginhimo mo nga imo kalugaringon nga nasod an Israel ha kadayonan, ngan ikaw, O GINOO, nahimo nga ira Dyos.

²⁵“Ngan yana, O Ginoo nga DYOS, tumana ha ngatanan nga panahon an iginsaad mo mahitungod ha akon ngan han akon katulinan, ngan tumana an imo iginsiring nga imo bubuhaton.

²⁶Mababantogan ka hin duro, ngan masiring ha kadayonan an mga tawo, ‘An GINOO nga Labi Kamakagarahum amo an Dyos han Israel.’ Ngan imo ipapadayon ha ngatanan nga panahon an akon katulinan.

²⁷O GINOO nga Labi Kamakagarahum nga Dyos han Israel! Nakadasig ini ha akon hin pag-ampo ha imo, kay iginpadayag mo ini ngatanan ha akon nga imo surugoon, ngan iginsumat mo ha akon nga imo hihimoon nga kahadian an akon katulinan.

²⁸“Ngan yana, O Ginoo nga DYOS, ikaw amo an Dyos; dayuday nagtutuman ka han imo mga saad, ngan imo ginhimo ha akon ini nga makaaramdok nga saad.

²⁹Nahangyo ako ha imo nga bendisyonan mo an akon katulinan basi magpadayon hira pagpahimulos han imo kamaloloy-on ngan kamaupay. Ikaw, O Ginoo nga DYOS an nagsaad hini, ngan magpabilin unta ha kadayonan an imo bendisyon dida han akon katulinan.”