Read Waray Samarenyo Meaning Based 2 Samuel 8 Bible Online

2 Samuel 8 - Waray Samarenyo Meaning Based bible

2 Samuel 8

¹Waray kaiha ginsulong na liwat ni David an mga Filisteohanon, ginpirde hira, ngan waray na hin pagdumara han ira tuna.

²Ginpirde liwat niya an mga Moabitanhon; iya ginpapanhigda hira ha tuna, ngan ginpatay an duha han kada tulo ka tawo ha ira. Sanglit nasakop niya an mga Moabitanhon ngan nagbayad ha iya hin mga buhis.

³Niyan ginpirde niya hi Hadadeser nga anak ni Rehob nga hadi han Siriahanon nga lalawigan han Soba, han tikadto hi Hadadeser hin pagdumara na liwat han katunaan ha ligid han iraya nga Salog Eufrates.

⁴Nabihag ni David in 1,700 han iya mga dikabayo nga sondalo ngan 20,000 han iya iba nga mga sondalo. Ginpili niya in mga kabayo nga igo hin usa ka gatos nga mga karuwahe ngan pinamiangan an iba nga mga kabayo.

⁵Nagpadara hin kasondalohan an mga Siriahanon han Damasco hin pagbulig kan Hadi Hadadeser; pinakiawayan hira ni David ngan pinamatay in 22,000 ka tawo.

⁶Katapos nagtindog hiya hin mga kampo hin kasondalohan didto[17] han ira katunaan, ngan nasakop niya hira ngan nagbayad hin mga buhis ha iya. Ginpadaog han GINOO hi David ha ngatanan nga dapit.

⁷Gin-agaw ni David an bulawan nga mga taming nga dara han mga opisyal ni Hadadeser ngadto ha Jerusalem.

⁸Ginkuha liwat niya in kadam-an nga mga bronse tikang ha Beta ug Berotai nga mga syudad nga ginhahadian ni Hadadeser.

⁹Hinbatian ni Hadi Toi han Hamat nga ginpirde ni David an ngatanan nga kasondalohan ni Hadadeser.

¹⁰Sanglit ginsugo niya hi Joram nga iya anak pagpahalipay kan Hadi David ngan pagpasidungog ha iya kay ginpirde man niya hi Hadadeser nga makadamo na pakiawayi ni Toi. Gindad-an ni Joram hi David hin mga regalo nga hinimo hin bulawan, salapi, ug bronse.

¹¹Iginhalad ini ni Hadi David nga garamiton hin pagsingba upod han salapi ug bulawan nga iya nakuha didto han mga nasod nga iya napirde—

¹²an Edumea, Moab, Filistia, ug Amalek—sugad man hin bahin han naagaw niya kan Hadadeser.

¹³Labi nga nabantogan hi David han pagbalik niya tikang hin pamatay hin 18,000 nga mga Edomitanhon didto ha Kahamub-an han Asin.

¹⁴Nagtindog hiya hin mga kampo hin kasondalohan[18] ha bug-os nga Edumea, ngan nasakop niya an mga tawo didto. Ginpadaog han GINOO hi David ha ngatanan nga dapit.

¹⁵Naghadi hi David han bug-os nga Israel, ngan gintalinguha niya nga dayuday nga maupay an iya pagdumara ngan waray pinalabi nga iya mga tawo.

¹⁶Hi Joab kanay iroy amo hi Seruia amo an pangulo han kasondalohan; hi Josafat nga anak ni Ahilud amo an tinaporan han mga sinurat;

¹⁷hira Sadoc nga anak ni Ahitob ngan hi Ahimelec nga anak ni Abiatar amo an kapadian; hi Seraias amo an sekretaryo han korte;

¹⁸hi Benaia nga anak ni Joiada amo an tinaporan han[19] mga gwardya ni David; ngan kapadian liwat an mga anak ni David.