Read Waray Samarenyo Meaning Based 1 Hadi 12 Bible Online

1 Hadi 12 - Waray Samarenyo Meaning Based bible

1 Hadi 12

¹Kinmadto ha Siquem hi Roboam, diin nagtitirok an ngatanan nga mga tawo han amihanan nga Israel hin paghimo ha iya nga hadi.

²Han kasumati hini kan Jeroboam nga anak ni Nebat, nga kinmadto ha Ehipto hin pagpalagiw kan Hadi Solomon, inmoli hiya tikang[41] ha Ehipto.

³Ginpasugoan hiya han mga tawo han amihanan nga mga tribo, ngan kinmadto hira ngatanan kan Roboam ngan nagsiring ha iya,

⁴“Ginpakurian kami ni Solomon nga imo amay ngan ginpabug-atan kami niya. Kon makahimo ka hin pagpagaan ngan pagmasarusayon han amon kinabuhi, magmamaunongon kami nga imo mga sakop.”

⁵Binmaton hiya, “Balik kamo katapos hin tulo ka adlaw, ngan babatonon ko kamo.” Sanglit nagkalakat hira.

⁶Nagpakiana hi Roboam han larulagas na nga mga tawo nga nag-alagad hin ka magsaragdon ni Solomon nga iya amay, “Ano an iyo igsasagdon nga angay ko igbaton hini nga mga tawo?”

⁷Binmaton hira, “Kon karuyag mo nga magmaupay an imo pag-alagad hini nga mga tawo, ihatag an ira pinangangaro, ngan dayuday hira mag-aalagad ha imo hin maunongon.”

⁸Kundi nagpakabungol la hi Roboam han ira sagdon. Kinmadto lugod hiya han iya kalugaringon nga mga magsaragdon nga mga batan-on nga kalalaken-an nga nagtubo kaupod niya.

⁹Nagpakiana hiya ha ira, “Ano an iyo igsasagdon nga akon ha mga tawo nga naghahangyo ha akon nga pagaanon ko an ira mga pinas-an?”

¹⁰Binmaton hira, “Amo ini an kinahanglan igsiring mo ha ira; ‘Darudako an akon tamuyingking kay han hawak han akon amay.

¹¹Kon ginpabug-atan kamo han akon amay, maburubug-at an akon ipapapas-an ha iyo. Ginlatob kamo niya hin mga latigo; kundi paghahampakon ko kamo hin mga latigo nga tunokon!’”

¹²Paglabay hin tulo ka adlaw, binmalik kan Hadi Roboam hi Jeroboam ngan an ngatanan nga mga tawo, sumala han tugon niya ha ira,

¹³ngan gin-isgan la lugod hira. Waray baliha han hadi an sagdon han larulagas nga mga magsaragdon, ngan ginhimangrawan an mga tawo,

¹⁴sumala han iginsagdon han batan-on nga mga magsaragdon. Nagsiring hiya, “Kon ginpabug-atan kamo han akon amay, maburubug-at pa an akon ipapapas-an ha iyo. Ginlatob kamo niya hin mga latigo, kundi paghahampakon ko kamo hin mga latigo nga tunokon!”

¹⁵Pagbuot adto han GINOO diri hiya mamati han mga tawo, basi matuman an iya saad kan Jeroboam nga anak ni Nebat pinaagi kan manaragna Ahias nga taga-Silo.

¹⁶Han pakasabot han mga tawo nga diri gud mamamati ha ira an hadi, naggogliat hira, “Mapukan hi David ngan an iya panimalay! Ano gud an ira nabuhat para ha aton? Mga tawo han Israel panguli kita! Pasagdi na la hi Reboam!” Sanglit sinmupil an mga tawo han Israel,

¹⁷ngan ginbayaan nira hi Roboam nga hadi la han mga tawo nga nag-ukoy ha katunaan han Juda.

¹⁸Niyan ginsugo ni Hadi Roboam hi Aduram nga tinaporan han pinirit nga pagtrabaho hin pagkadto han mga Israelita, kundi ira ginbato ini hiya ngada han kamatay. Tungod hini sinmakay dayon hi Roboam han iya karuwahe ngan kinmalagiw ngadto ha Jerusalem.

¹⁹Tikang hito nga panahon, sinmupil na han panimalay ni David an mga tawo han amihanan nga ginhadian han Israel.

²⁰Han paghibaro la han mga tawo han Israel nga binmalik na hi Jeroboam tikang ha Ehipto, ira gindapit hiya ngadto hin usa nga katirok han mga tawo, ngan ira ginhimo hiya nga hadi han Israel. An tribo la ni Juda an nagpabilin hin pag-ugop han mga tulin ni David.

²¹Han pag-abot ni Roboam ha Jerusalem, iya gintirok in 180,000 han iya gimamag-upayi nga mga sondalo han mga tribo ni Juda ug Benjamin. Nakahunahuna hiya hin pakig-away basi mahibalik ngada ha iya pagdumara an amihanan nga mga tribo han Israel.

²²Kundi ginsiring han Dyos hi Semaias nga manaragna

²³nga pahibaroon hi Hadi Roboam han Juda ngan an ngatanan nga mga tawo han mga tribo han Juda ug Benjamin nga nagsiring an GINOO:

²⁴“Ayaw niyo pagsulonga an iyo kalugaringon nga igkasi mga Israel. Panguli kamo ngatanan, kay akon ini pagbuot nga mahinabo ini.” Ginsugot nira ngatanan an sugo han GINOO ngan nanguli hira.

²⁵Ginpadig-on ni Hadi Jeroboam han Israel an bungto han Siquem didto han sagkahon nga nasod han Efraim ngan nag-ukoy la anay hiya didto. Niyan binmaya hiya ngan ginpadig-on an bungto han Fanuel.

²⁶Naghunahuna hiya, “Sugad hiton nahinanabo yana, kon kumadto ha Jerusalem an akon mga tawo ngan maghalad hin mga hayop nga tutuboron ngadto han GINOO didto han Templo, hi Hadi Roboam han Juda an ira pag-aalagadon ngan papatayon ako.”

²⁸Katapos niya pakahunahuna hini, naghimo hiya hin duha nga bulawan nga mga tudo nga baka ngan nagsiring hiya ha iya mga tawo, “Maiha na an iyo pagkinadto ha Jerusalem hin pagsingba. Mga tawo han Israel, iini an iyo mga diyos nga nagpagawas ha iyo ha Ehipto!”

²⁹Iginbutang niya an usa nga bulawan nga baka didto ha Betel ngan an ikaduha didto ha Dan.

³⁰Sanglit nakasala an mga tawo kay napakadto hira ha Betel ngan ha Dan[42] hin pagsingba.

³¹Nagtindog liwat hi Jeroboam hin mga dapit hin pagsingba ha bawbaw hin mga pungtod, ngan nagpili hiya hin kapadian tikang hin mga panimalay nga diri sakop han tribo ni Levi.

³²Nagtukod liwat hi Jeroboam hin siringbahon nga pyesta dida han ika-15 nga adlaw han ikawalo nga bulan, sugad han pyesta ha Juda. Naghalad hiya hin mga hayop nga tinubod didto han altar ha Betel ngadto han bulawan nga mga baka nga iya ginhimo, ngan ginbutang niya ha Betel an kapadian nga mag-aalagad han mga altar nga iya gintindog.

³³Ngan dida han ika-15 nga adlaw han ikawalo nga bulan, an adlaw nga gintalaan niya ngahaw, kinmadto hiya ha Betel ngan naghalad hiya hin usa nga hayop nga tinubod dida han altar, ha pagsaurog han pyesta nga iya gintukod para ha mga tawo han Israel.