Read Waray Samarenyo Meaning Based 1 Hadi 14 Bible Online

1 Hadi 14 - Waray Samarenyo Meaning Based bible

1 Hadi 14

¹Hito nga panahon nasakit hi Abias nga anak nga lalake ni Hadi Jeroboam.

²Nagsiring ha iya asawa hi Jeroboam, “Pagpalain han imo hetsura basi waray tawo nga makakilala ha imo, ngan pakadto ha Silo diin nag-uokoy hi Ahias, an manaragna nga nagsiring nga ako an maghahadi han Israel.

³Dad-i hiya hin napulo ka bug-os nga tinapay, mga pira nga mga torta, ngan hin usa ka tibod nga dugos. Pakianhi hiya kon ano an dadangatan han aton anak, ngan pagsusumatan ka niya.”

⁴Sanglit kinmadto hiya han balay ni Ahias didto ha Silo. Diri na hi Ahias nakita tungod hin kalagas.

⁵Ginsumatan hiya han GINOO nga tiabot an asawa ni Jeroboam hin pagpakiana ha iya hiunong han iya anak nga lalake nga masakit. Ngan ginsumatan hi Ahias han GINOO kon ano an iya igsisiring. Han pag-abot na han asawa ni Jeroboam, waray hiya magpakilala.

⁶Kundi han pakabati ni Ahias nga tisulod na hiya han porta, nagsiring hiya, “Uswag. Maaram ako nga asawa ka ni Jeroboam. Kay ano nga diri ka karuyag hikilal-an? May-ada ako maraot nga sumat para ha imo.

⁷Kadtoa ngan sumati hi Jeroboam nga amo ini an sinisiring ha iya han GINOO nga Dyos han Israel: ‘Ginpili ko ikaw tikang han mga tawo ngan ginhimo nga hadi han akon mga tawo nga Israel.

⁸Kinuha ko an ginhadian tikang han mga tulin ni David ngan iginhatag ko ini ha imo. Kundi waray ka magsugad kan David nga akon surugoon, nga maunongon ha akon, nagsugot han akon mga sugo, ngan nagbuhat han akon la kinaruruyag.

⁹Nakasala ka hin labaw pa gud nga mga sala kay hadton mga naghadi una ha imo. Iginsikway mo ako ngan gin-aghat mo an akon kasina pinaagi hin paghimo hin mga diyosdiyos ngan hin metal nga mga ladawan nga siringbahon.

¹⁰Tungod hini pagdadad-on ko hin karat-an an imo hadianon nga panimalay ngan pupuohon ko an ngatanan mo nga mga tulin nga kalalaken-an, ma batan-on o tigurang. Pupuohon ko an imo panimalay; pagsisilhigon ko hira sugad hin tai.

¹¹Kakaonon hin mga ayam an bisan hin-o nga sakop han imo panimalay nga mamatay ha syudad, ngan kakaonon hin katamsihan an mamatay ha kaumhan. Ako nga GINOO an nagyakan.’”

¹²Ngan nagpadayon hi Ahias hin pagsiring ha asawa ni Jeroboam, “Yana uli na. Ha pagsulod mo gud han bungto mamamatay an imo anak.

¹³Magmamabidoon an ngatanan nga mga tawo han Israel para ha iya ngan iglulubong hiya. Hiya la an sakop han panimalay ni Jeroboam nga iglulubong hin maupay, kay hiya la an nalipayan han GINOO nga Dyos han Israel.

¹⁴Magbubutang an GINOO hin usa nga hadi han Israel nga magtatapos han hadianon nga panimalay ni Jeroboam.[45]

¹⁵Kakastigohon han GINOO an Israel, ngan mababay-og hiya sugad hin usa nga tigbaw ha sapa nga nababay-og. Gagaboton niya an mga tawo han Israel tikang hini nga maupay nga tuna nga iya iginhatag ha ira kaapoy-apoyan, ngan igpapasarang hira ha unhan pa han Salog Eufrates, kay gin-aghat nira an iya kasina pinaagi hin panhimo hin mga ladawan han diyosa nga hi Asera.

¹⁶Babayaan han GINOO an Israel kay nakasala hi Jeroboam ngan gintutdoan niya hin pakasala an mga tawo han Israel.”

¹⁷Inmoli an asawa ni Jeroboam ngadto ha Tersa. Han pagsulod niya han iya balay namatay an bata.

¹⁸Nagmabidoon an katawhan han Israel tungod han bata ngan iginlubong ini hiya, sumala han iginsiring han GINOO pinaagi han iya surugoon nga hi Ahias nga manaragna.

¹⁹An iba pa nga nabuhat ni Hadi Jeroboam, an mga away nga iya pinakiawayan ngan an paagi han iya paghadi, nahisurat ngatanan dida han Kasaysayan han Kahadian han Israel.

²⁰Naghadi hi Jeroboam sulod hin 22 ka tuig. Namatay hiya ngan iginlubong, ngan sinmaliwan ha iya hin pagkahadi hi Nadab nga iya anak.

²¹An panuigon ni Roboam nga anak ni Solomon 41 han kahimo niya nga hadi han Juda, ngan naghadi hiya hin 17 ka tuig didto ha Jerusalem, an syudad nga ginpili han GINOO tikang han ngatanan nga katunaan han Israel, nga amo an dapit diin pagsisingbahon hiya. Hi Naama nga taga-Amon amo an iroy ni Roboam.

²²Nakasala han GINOO an mga tawo han Juda ngan nakaaghat ini han kasina han GINOO ha ira larulabaw pa kay han ginbuhat han ngatanan nga ira kaapoy-apoyan.

²³Nagtindog hira hin mga dapit hin pagsingba para hin buwa nga kadiyosan, ngan nagtindog hin mga harigi nga bato ngan mga ladawan hin pagsingba kan Asera ha bawbaw han mga pungtod ngan ha sirong hin magrampag nga mga kahoy.

²⁴An giraraoti han ngatanan amo nga may-ada kalalaken-an ngan kababayen-an nga maraot an ira dungog nga nag-aalagad didto han mga pagano nga mga dapit hin pagsingba. Ginbuhat han mga tawo han Juda an ngatanan nga makaarawod nga mga binuhatan han mga tawo nga ginpaiwas han GINOO tikang han tuna samtang nasulong han nasod an mga Israelita.

²⁵Dida han ikalima ka tuig nga pagkahadi ni Roboam, ginsulong ni Hadi Sesac han Ehipto an Jerusalem.

²⁶Ginkuha niya an ngatanan nga mga manggad ha Templo ngan ha palasyo, lakip an mga taming nga bulawan nga ginhimo ni Solomon.

²⁷Ginliwanan ini ni Hadi Roboam hin mga taming nga bronse ngan igintubyan ini ngadto han mga opisyal nga tinaporan han mga gwardya nga nagbabantay han mga ganghaan han palasyo.

²⁸Ha kada pagkakadto ha Templo han hadi, ginagawas han mga gwardya an mga taming ngan katapos ibinabalik ini ngadto ha kwarto han mga gwardya.

²⁹An iba pa nga nabuhat ni Hadi Roboam nahisurat dida han Kasaysayan han Kahadian han Juda.

³⁰Sulod hini nga panahon waray hunong an pag-inaway nira Roboam ug Jeroboam.

³¹Namatay hi Roboam ngan iginlubong hiya didto han hadianon nga mga lubnganan han Syudad ni David (hi Naama nga taga-Amon amo an iroy niya), ngan sinmaliwan ha iya hin pagkahadi hi Abias nga iya anak.