Read Waray Samarenyo Meaning Based 1 Hadi 6 Bible Online

1 Hadi 6 - Waray Samarenyo Meaning Based bible

1 Hadi 6

¹Kwatro syintos otsenta ka tuig tikang han paggawas ha Ehipto han mga tawo han Israel, dida han ikaupat ka tuig nga paghadi han Israel ni Solomon, dida han ikaduha nga bulan han Zib, nagtikang hi Solomon hin pagtindog han Templo.

²Ha sakob hini 27 ka metros an kahilaba, siyam ka metros an kahiluag, ngan 13.5 ka metros an kahitaas.

³An aragian nga kwarto 4.5 ka metros an kahilaba ngan siyam ka metros an kahiluag pareho han kahiluag han Templo.

⁴An mga bungbong han Templo may-ada mga bintana nga haruhaligot ha gawas kay ha sakob.

⁵Dukot han gawas nga mga bungbong, ha mga ligid ngan ha likod han Templo, gintindog in suy-ab nga tulo ka andana, nga tag 2.2 ka metros an kahitaas han kada andana.

⁶An kahiluag han kada kwarto 2.2 ka metros ha giuubosi nga andana, 2.7 ka metros an butnga nga andana, ngan 3.1 ka metros an igbaw nga andana. Manirunipis an bungbong han Templo ha igbaw nga andana kay han bungbong ha ubos nga andana sanglit nakakatungtong an mga kwarto dida han bungbong, nga waray na iglubong ha bungbong an sapayan hini.

⁷An mga bato nga ginamit hin pagtindog han Templo didto pag-andama ha dapit nga ginkuhaan han mga tinabas nga bato, sanglit waray na aringasa hin mga martilyo, mga parakol, o iba nga mga garamiton nga puthaw samtang gintitindog an Templo.

⁸Nakadto han timogan nga ligid han Templo an aragian ngadto han giuubosi[11] nga andana han suy-ab, nga may hagdan tipakadto han ikaduha ngan ikatulo nga andana.

⁹Sanglit nahuman ni Hadi Solomon an pagtindog han Templo. Binutangan niya hin alkoba nga hinimo hin mga baybayan ngan mga tabla nga sidro.

¹⁰Igindukot ha gawas han mga bungbong han Templo an tulo ka andana nga suy-ab, nga tag 2.2 ka metros kahitaas an kada andana[12] pinaagi hin mga baybayan nga sidro.

¹¹Nagsiring kan Solomon an GINOO,

¹²“Kon tumanon mo an ngatanan ko nga mga balaod ngan mga sugo, pagbubuhaton ko ha imo an iginsaad ko kan David nga imo amay.

¹³Mag-uokoy ako tampo han akon mga tawo nga Israelita dinhe hini nga Templo nga imo gintindog, ngan diri ko hira pababay-an.”

¹⁴Sanglit nahuman ni Solomon an pagtindog han Templo.

¹⁵Ginhaklapan niya hin mga tabla nga sidro an sakob nga mga bungbong han templo tikang ha salog ngadto han alkoba, ngan ginsalogan niya hin palotsina.

¹⁶Ikinadto ha kataposan han Templo an surusulod nga kwarto nga gintawag nga Labi Kabaraan nga Dapit. Siyam ka metros an kahilaba hini, ngan binongbongan ini hin tabla nga sidro tikang ha salog ngadto ha alkoba.[13]

¹⁷An kwarto ha atubangan han Labi Kabaraan nga Dapit 18 ka metros an kahilaba.

¹⁸Inadurnohan an mga tabla nga sidro hin ginuhit nga mga milon ngan mga bukad; luob hin sidro an bug-os nga sakob, sanglit diri hinkikit-an an mga bato han mga bungbong.

¹⁹Ikinadto ha likod nga kataposan han Templo an Labi Kabaraan nga Dapit, nga bubutangan han Kahon han Ginsaaran han GINOO.

²⁰Ini nga surusulod nga kwarto siyam ka metros an kahilaba, siyam ka metros an kahiluag, ngan siyam ka metros an kahitaas, nga luob binawbawan ngatanan hin puraw nga bulawan. Binawbawan an altar[14] hin mga tabla nga sidro.

²¹Luob binawbawan hin bulawan an sakob han Templo, ngan ginkutayan hin bulawan nga mga kadena an aragian han surusulod nga baraan nga kwarto nga luob binawbawan liwat hin bulawan.

²²Luob binawbawan hin bulawan an bug-os nga sakob han Templo, sugad man an altar didto han Labi Kabaraan nga Dapit.

²³Iginbutang ha sakob han Labi Kabaraan nga Dapit in duha nga mga kerubin nga hinimo tikang hin kahoy nga olibo, nga 4.4 ka metros an kahitaas han kada usa.

²⁴Pareho an kadako ngan an hitsura hini nga duha. May tag duha nira nga mga pako nga 2.2 ka metros an kahilaba han kada pako, sanglit naabot hin 4.4 ka metros an kahirayo tikang ha kataposan han usa nga pako ngadto ha kataposan han luyo nga pako.

²⁷Gintupad ini ha sakob han Labi Kabaraan nga Dapit, sanglit naghihiabot an kataposan han duha nira nga binuklad nga mga pako ha butnga han ruwang ngan nadapat an kataposan han luyo nira nga mga pako ha paluyo nga mga bungbong.

²⁸Putos hin bulawan an duha nga mga kerubin.

²⁹Puro inadornohan an mga bungbong han dako nga kwarto ngan han surusulod nga kwarto hin ginuhit nga mga hitsura hin mga kerubin, mga kahoy nga palmera, ngan mga bukad.

³⁰Binawbawan hin bulawan bisan ngani an salog.

³¹Igintaod in doble nga sada nga hinimo hin kahoy nga olibo dida han aragian han Labi Kabaraan nga Dapit; may natais nga arko an igbaw han portahan.

³²Inadurnohan an mga sada hin ginuhit nga mga hitsura hin mga kerubin, mga kahoy nga palmera, ngan mga bukad. Binawbawan hin bulawan an mga sada, an mga kerubin, ngan an mga kahoy nga palmera.

³³Ginhimo in usa nga rektanggulo nga balayan hin porta nga kahoy nga olibo para han aragian ngadto han dako nga kwarto.

³⁴May-ada duduha nga pilopilo nga mga sada nga hinimo hin kahoy nga palotsina,

³⁵ngan inadornohan hin ginuhit nga hitsura hin mga kerubin, mga kahoy nga palmera, ngan mga bukad, nga sahid binawbawan hin bulawan.

³⁶Gintindog ha atubangan han Templo in usa nga surusulod nga bungsaran nga ginpalibutan hin mga pader, nga may usa ka sapad nga sidro nga mga baybayan ha kada tulo ka sapad nga tinabas nga bato.

³⁷Iginpahimutang an patukoranan han Templo dida han ikaduha nga bulan han Zib, han ikaupat ka tuig nga pagkahadi ni Solomon.

³⁸Nahuman ngatanan an Templo sumala gud han plano dida han ikawalo nga bulan han Bul, han ika-11 ka tuig nga pagkahadi ni Solomon. Inmabot hin pito ka tuig an pagtindog ni Solomon han Templo.