Read Waray Samarenyo Meaning Based 1 Hadi 7 Bible Online

1 Hadi 7 - Waray Samarenyo Meaning Based bible

1 Hadi 7

¹Nagtindog liwat hi Solomon hin usa nga palasyo para ha iya, ngan inmabot an iya pagtindog hini hin 13 ka tuig.

²An ruwang nga ginngaranan nga Ruwang han Kagurangan han Libano[15] 44 ka metros an kahilaba, 22 ka metros an kahiluag, ngan 13.5 ka metros an kahitaas. May-ada ini tulo[16] ka rumbay nga mga harigi nga sidro, nga 15 nga harigi ha kada rumbay, nga may-ada mga baybayan nga sidro nga natungtong dida han mga harigi. An alkoba nga sidro hini natubtob han tinutungtongan han mga kwarto nga hirimosan, nga tinukod han mga harigi.

⁴May-ada tulo ka rumbay hin mga bintana an kada usa han duduha nga mga bungbong ha ligid.

⁵May-ada rektanggulo nga mga balayan an mga porta ngan an mga bintana,[17] ngan nag-aatubang an tulo ka rumbay nga mga bintana ha magtugbang nga bungbong.

⁶An Ruwang han mga Harigi 22 ka metros an kahilaba ngan 13.5 ka metros an kahiluag. May-ada ini inatopan nga balkon nga tinukod hin mga harigi.

⁷An Ruwang han Trono nga tinatawag liwat nga Ruwang nga Hukmanan, diin gintuhay ni Solomon in mga kalipongan, may-ada mga bungbong nga sidro tikang ha salog ngadto han mga pagbo.[18]

⁸Ginhimo sugad han iba nga balay an kan Solomon kalugaringon nga urokyan didto hin lain nga bungsaran luyo han Ruwang nga Hukmanan. Gintindog liwat niya in sugad nga balay para han iya asawa nga anak han hadi han Ehipto.

⁹Hinimo ini ngatanan nga mga balay lakip an dako nga bungsaran, tikang ha mga patukoranan ngadto han mga barisbisan hin pinili nga mga bato nga gin-andam didto han gintatabasan han mga bato, nga gintabas hin igo nga sukol, nga ginturupong hin mga lagadi an gawas ngan an sulod nga mga bayhon.

¹⁰Hinimo hin dagko nga mga bato an mga patukoranan, nga gin-andam didto han dapit nga tarabasan hin bato, nga tag tulo ka metros an kahiglaba han iba ngan upat ka metros an kahiglaba han iba.

¹¹Ha bawbaw hini may-ada iba liwat nga mga bato nga gintabas hin igo nga sukol, ngan mga baybayan nga sidro.

¹²An bungsaran han palasyo, an surusulod nga bungsaran han Templo, ngan an aragian nga kwarto han Templo may-ada mga pader nga may-ada usa ka sapad nga mga baybayan nga sidro ha kada tulo ka sapad nga tinabas nga mga bato.

¹³Ginpakuha ni Hadi Solomon in usa ka tawo nga ginngaranan nga Hiram, nga batid nga panday hin bronse, tikang ha syudad han Tiro.

¹⁴Nagin batid liwat nga panday hin bronse an iya amay nga patay na nga taga-Tiro; sakop han tribo ni Neftali an iroy niya. Maaram ngan batid gud nga panday hin bronse hi Hiram. Ginkarawat niya an pagdapit ni Hadi Solomon nga magin tinaporan hiya han ngatanan nga buruhaton nga nagamit hin bronse.

¹⁵Ginhimo ni Hiram in duha nga bronse nga mga harigi nga walo ka metros an kahitaas ngan 5.3 ka metros an likos han kada usa,[19] ngan ginbutang niya ini nga mga harigi didto han aragian han Templo.

¹⁶Ginhimo liwat niya in duha nga bronse nga mga uloulo hin harigi, nga 2.2 ka metros an kahitaas han kada usa, nga iginbutang ha bawbaw han mga harigi.

¹⁷Inadornohan an bawbaw han kada harigi hin hinukot nga mga kadena,[20]

¹⁸ngan hin duha ka rumbay nga bronse nga mga granada.

¹⁹Sugad hin mga bukad nga liryo an mga uloulo han harigi nga 1.8 ka metros an kahitaas,

²⁰ngan iginbutang ini ha bawbaw hin linidong nga bahin ha igbaw han adorno nga kadena. May-ada 200 nga mga granada ha duha nga rumbay palibot han kada[21] uloulo han harigi.

²¹Iginbutang ni Hiram ha atubangan han aragian han Templo ini nga duha nga bronse nga mga harigi: ginngaranan nga Aquin[22] an usa nga harigi ha timogan, ngan Boos[23] an didto ha amihanan.

²²Nakada ha bawbaw han mga harigi an mga uloulo nga hitsura hin mga liryo an kaguhit. Sanglit nahuman an trabaho han mga harigi.

²³Naghimo hi Hiram hin malidong nga bronse nga tangke nga 2.2 ka metros an kahilarom, 4.4 ka metros an kahiluag, ngan 13.2 ka metros an likos.

²⁴Ha palibot han gawas nga gangang han tangke[24] may-ada duha ka rumbay nga bronse nga mga milon nga gindebuho upod han tangke.

²⁵Nagtungtong an tangke dida han mga bungkog hin 12 nga bronse nga mga baka nga nangangatubang tipagawas: tulo tipaamihanan, tulo tipakatundan, tulo tipatimogan, ngan tulo tipasinirangan.

²⁶Tulo ka pulgada an kadakmol han ligid han tangke. An ligid han gangang sugad hin kanan kupa nga nabawod tipagawas, sugad hin nabuklad nga liryo. Mga 10,000 ka galon an sulod han tangke.

²⁷Naghimo liwat hi Hiram hin napulo nga bronse nga mga karomata; an kada usa 1.8 ka metros an kahilaba, 1.8 ka metros an kahiluag, ngan 1.3 ka metros an kahitaas.

²⁸Hinimo ini tikang hin kwadrado nga mga tabla nga iginbutang dida hin mga balayan,

²⁹nga may-ada dagway hin mga liyon, mga tudo nga baka, ngan mga kerubin dida han mga tabla; ngan dida han bawbaw han mga balayan ha igbaw ngan ha ubos han mga liyon ngan mga tudo may-ada mga korona nga inadornohan.

³⁰May-ada upat nga bronse nga mga ruyda nga may-ada bronse nga mga ihe an kada karomata. Dida han upat nga mga kanto may-ada bronse nga mga tuko para hin sangga; inadornohan an upat nga mga tuko hin mga korona.

³¹May-ada malidong nga balayan ha bawbaw hini para han sangga. Natubaw tipaigbaw hin 18 ka pulgada tikang ha bawbaw han karomata ngan hin pito ka pulgada tipaubos. Ginpalibotan ini hin ginuhit nga mga adorno.

³²An mga ruyda 25 ka pulgada an kahigtaas; aada ini ha ilarom han mga tabla, ngan usa la ka bug-os an ihe ngan an karomata.

³³Sugad hin kanan karuwahe, an iya mga ruyda; puros bronse an mga ihe, mga yanta, mga rayos, ngan an mga butnga han ruyda.

³⁴May-ada upat nga mga tuko dida han ilarom nga mga kanto han kada karomata, nga usa la ka bug-os ngan han karomata.

³⁵May-ada siyam ka pulgada nga banda palibot han bawbaw han kada karomata; usa la ka bug-os an karomata, an mga tuko hini, ngan an mga tabla.

³⁶Inadornohan an mga tuko ngan an mga tabla hin mga dagway hin mga kerubin, mga liyon, ngan mga kahoy nga palmera, ngan ginpalibotan hin mga korona.

³⁷Sanglit amo ini an paghimo han mga karomata; papreho hira ngatanan ha kadako ngan ha dagway.

³⁸Naghimo liwat hi Hiram hin napulo nga mga palanggana, usa para han tagsa nga karomata. An kada palanggana 1.8 ka metros an kahilapad, ngan nasulod hin 200 ka galon.

³⁹Iginbutang niya an lima nga mga karomata didto han timogan nga ligid han Templo, ngan an iba nga lima didto han amihanan nga ligid; iginbutang niya an tangke didto han timog-sinirangan nga kanto.

⁴⁰Naghimo liwat hi Hiram hin mga daba, mga pala, ngan mga makaong. Ginhuman niya an ngatanan niya nga mga buruhaton han Templo han GINOO para kan Hadi Solomon. Amo ini an iya pinanhimo: An duha nga mga harigi An duha nga mga uloulo nga dagway hin makaong ha bawbaw han mga harigi An adorno hin hinukot nga mga kadena han kada uloulo han mga harigi An 400 nga bronse nga mga granada, hin duha ka rumbay nga tag 100 an kada usa palibot han adorno ha kada uloulo han mga harigi An 10 nga mga karomata An 10 nga mga palanggana An tangke An 12 nga mga tudo nga baka nga nahawid han tangke An mga daba, mga pala, ngan mga makaong. Puros pinainggat nga bronse ini ngatanan nga mga garamiton han Templo, nga ginhimo ni Hiram para kan Hadi Solomon.

⁴¹

⁴²

⁴³

⁴⁴

⁴⁵

⁴⁶Ginpahimo han hadi ini ngatanan didto han pandayan hin puthaw ha butnga han Sucot ug Saretan, didto han Kahamub-an han Jordan.

⁴⁷Waray igpatimbang ni Solomon ini nga bronse nga mga garamiton kay uraora ini hin kadamo, sanglit waray hibaroi an kabug-aton hini.

⁴⁸Nagpahimo liwat hi Solomon hin bulawan nga mga garamiton para han Templo: an altar, an lamesa para han baraan nga tinapay,

⁴⁹an 10 nga mga kandilero nga natindog ha atubangan han Labi Kabaraan nga Dapit, lima didto ha timogan nga ligid ngan lima didto ha amihanan; an mga bukad, mga lampara, ngan mga kimpit;

⁵⁰an mga kopa, mga igpaparong hin lampara, mga makaong, mga surodlan hin insyenso, ngan an mga sangga nga ginagamit hin pagdara hin mga baga; ngan an mga bisagra para han mga porta han Labi Kabaraan nga Dapit ngan han garugawas nga mga porta han Templo. Hinimo hin bulawan ini ngatanan nga mga kasangkapan.

⁵¹Han kahuman na ni Hadi Solomon han ngatanan nga mga buruhaton didto ha Templo, iginsulod niya didto han mga hirimosan nga kwarto han Templo an ngatanan nga mga iginhalad ha GINOO ni David nga iya amay—an salapi, bulawan, ngan iba pa nga mga butang.