Read Waray Samarenyo Meaning Based 1 Hadi 8 Bible Online

1 Hadi 8 - Waray Samarenyo Meaning Based bible

1 Hadi 8

¹Niyan ginpatawag ni Hadi Solomon an ngatanan nga mga pangulo han mga tribo ngan han mga banay han Israel ngan nagtirok hira didto ha Jerusalem basi pagdad-on an Kahon han Ginsaaran han GINOO ngadto han Templo tikang ha Sion nga Syudad ni David.

²Nagkatirok hira ngatanan ha panahon han Pyesta han mga Payagpayag ha bulan han Etanim nga ikapito nga bulan.

³Han katirok na han ngatanan nga mga pangulo, ginpas-an han kapadian an Kahon han Ginsaaran,

⁴ngan gindara ini ngadto ha Templo. Ginbalhin han mga Levita ngan han kapadian ngadto han Templo an Tulda han GINOO ngan an ngatanan nga mga kasangkapan hini.

⁵Nagkatirok ha atubangan han Kahon han Ginsaaran hira Hadi Solomon ngan an ngatanan nga mga tawo han Israel, ngan naghalad hira hin damo kaupay nga mga karnero ngan mga baka.

⁶Niyan gindara han kapadian an Kahon han Ginsaaran ngadto han Templo ngan iginbutang ini didto han Labi Kabaraan nga Dapit, ha ubos han mga kerubin.

⁷An binuklad nira nga mga pako nakatahob han Kahon han Ginsaaran ngan han mga parasgan hini.

⁸Hinkikit-an an mga kataposan han mga parasgan hin bisan hin-o nga natukdaw ha atubangan gud han Labi Kabaraan nga Dapit kundi diri ini hinkikit-an ha iba nga dapit. (Aadto pa ini nga mga parasgan yana nga adlaw.)

⁹Waray gud sulod an Kahon han Ginsaaran labot han duha nga mga papan nga bato nga iginsulod ni Moises didto ha Bukid Sinai, diin naghimo an GINOO hin ginsaaran han mga tawo han Israel han paggawas nira ha Ehipto.

¹⁰Han nagkakagawas na han Templo an kapadian, naluob dayon an Templo hin dampog,

¹¹nga nasilaw han mabislaw nga kapawa han GINOO, ngan waray na hira makagpadayon hin pagsingba.

¹²Niyan nag-ampo hi Solomon, “Ikaw, O GINOO, an nagbutang han adlaw didto ha langit,[25] kundi ginpili mo hin pag-ukoy ha mga dampog ngan kasisidman.

¹³Yana gintindogan ko ikaw hin harangdon nga templo, usa nga dapit nga imo pag-uokyan ha kadayonan.”

¹⁴Samtang nagkakatukdaw didto an mga tawo, inmatubang ha ira hi Hadi Solomon, ngan naghangyo hiya nga pagbendisyonan hira han Dyos.

¹⁵Nagsiring hiya, “Pagdayawon an GINOO nga Dyos han Israel! Gintuman niya an saad nga ginhimo kan David nga akon amay, han iya pagsidnga ha iya,

¹⁶‘Tikang han pagpagawsa ko ha Ehipto han akon mga tawo nga Israel, waray ako magpili hin bisan ano nga syudad ha bug-os nga tuna han Israel nga pagtitindogan hin usa nga templo nga pagsisingbahan ha akon. Kundi ginpili ko ikaw, David, nga maghahadi han akon mga tawo.’”

¹⁷Ngan nagpadayon hi Solomon, “Naruyag hin pagtindog hin usa nga templo hi David nga akon amay, diin pagsisingbahon an GINOO nga Dyos han Israel,

¹⁸kundi nagsiring kan David an GINOO, ‘Maupay an imo pag-ungara hin pagtindog hin usa nga templo para ha akon,

¹⁹kundi diri ikaw kundi an imo anak amo an magtitindog han templo!’

²⁰“Ngan yana gintuman na han GINOO an iya saad. Sinmaliwan ako han akon amay nga hadi han Israel, ngan gintindog ko an Templo diin pagsisingbahon an GINOO nga Dyos han Israel.

²¹Gin-andaman ko liwat hin usa nga dapit didto han Templo para han Kahon han Ginsaaran nga sinusudlan han mga papan nga bato han ginsaaran nga ginhimo han GINOO ngan han aton kaapoy-apoyan han pagpagawsa niya ha ira ha Ehipto.”

²²Niyan, ha atubangan han mga tawo, kinmadto ngan tinmindog hi Solomon ha atubangan han altar, diin ginbayaw niya an iya mga kamot

²³ngan nag-ampo, “O GINOO nga Dyos han Israel, waray diyos nga sugad ha imo ha bug-os langit ug tuna! Gintutuman mo an imo ginsaaran, ngan dayuday an imo paghigugma han imo mga tawo nga kinasingkasing nagsusugot ha imo.

²⁴Gintuman mo an imo saad kan David nga akon amay nga imo surugoon ngan natuman yana nga adlaw an tagsa nga pulong.

²⁵Ngan yana, O GINOO nga Dyos han Israel, nag-aampo ako nga imo liwat pagtumanon an lain nga imo saad nga imo ginhimo ha akon amay han pagsidnga mo ha iya nga dayuday magkakamay-ada usa han iya mga tulin nga maghahadi han Israel, basta magsugot hira hin maupay sugad han imo ginbuhat.

²⁶Sanglit yana, nag-aampo ako, O Dyos han Israel, nga imo pagtumanon ini nga imo ginsaad kan David nga akon amay, nga imo surugoon.

²⁷“Kundi makakahimo ka ba, O Dyos, hin pag-ukoy dinhe ha tuna? Diri ngani igo nga imo urokyan an bug-os nga kalangitan, sanglit uunanhon nga maigo ka dinhe hini nga Templo nga akon gintindog?

²⁸O GINOO nga akon Dyos, imo ako surugoon. Pamatii gad an akon pag-ampo, ngan itugot an akon mga hangyo ha imo yana.

²⁹Bantayi adlaw gab-i ini nga templo, ini nga dapit nga imo ginpili, diin pagsisingbahon ka. Pamatii ako kon naatubang ako hini nga Templo ngan nag-aampo.

³⁰Pamatii an akon mga pag-ampo ngan an pag-ampo han imo mga tawo kon naatubang hira hini nga dapit ngan nag-aampo. Pamatii kami didto han imo urokyan ha langit ngan pasayloa kami.

³¹“Kon iginsusumbong in usa ka tawo hin pakasala hin iya amyaw ngan pagdad-on hiya ha imo altar dinhe hini nga Templo ngan papagsumpaon nga diri hiya salaan,

³²O GINOO, pamati didto ha langit ngan paghukmi an imo mga surugoon. Kastigoha an salaan sumala han angay ha iya, ngan talwasa an diri salaan.

³³“Kon pirdehon han ira mga kaaway an imo mga tawo nga Israel tungod han ira pakasala ha imo, ngan onina, magbasol ngan kumanhi hira hini nga Templo hin pag-ampo nga mapinaubsanon pangaro hin pasaylo,

³⁴pamatii hira didto ha langit. Pasayloa an mga sala han imo mga tawo ngan igbalik hira ngadto han tuna nga imo iginhatag ha ira kaapoy-apoyan.

³⁵“Kon makasala ha imo an imo mga tawo, ngan kastigohon mo hira hin diri paghatag hin uran, ngan onina, magbasol hira ngan umatubang nganhi hini nga Templo, mag-ampo, ngan magdayaw ha imo,

³⁶pamatii hira didto ha langit. Pasayloa an mga sala han hadi ngan han mga tawo han Israel ngan tutdoi hira hin pagbuhat han matadong. Niyan, O GINOO, ipadara an uran nganhi hini nga imo tuna nga iginhatag mo ha imo mga tawo nga ira dayon nga panurundon.

³⁷“Kon may-ada gutom dinhe ha tuna, o piste, o madaot an mga tanom tungod hin nakalilisang nga sirak, o hin mga kabalay hin duron, o kon sulongon han ira mga kaaway an imo mga tawo, o kon may-ada balatian o sakit dida ha ira,

³⁸pamatii an ira mga pag-ampo. Kon may-ada han imo mga tawo nga Israel, nga tungod hin kinasingkasing nga pagbasol, magbayaw han ira mga kamot ha pag-ampo nganhi hini nga templo,

³⁹pamatii an ira pag-ampo. Pamatii hira ha imo urokyan didto ha langit, pasayloa hira, ngan buligi hira. Ikaw la an sayod han mga hunahuna han ngatanan nga mga tawo. Buhata ha kada tawo sumala han angay ha iya,

⁴⁰basi magsugot ha imo an imo mga tawo ha ngatanan nga panahon nga aanhi hira ha tuna nga imo iginhatag ha ira kaapoy-apoyan.

⁴¹“Kon makabati in lumalangyaw nga nag-uokoy ha hirayo nga tuna han imo kabantogan ngan han dagko nga mga butang nga imo ginbuhat para han imo mga tawo, ngan makanhi hiya hin pagsingba ha imo ngan pag-ampo dinhe hini nga Templo,

⁴²

⁴³pamatii an iya pag-ampo. Pamatii hiya didto ha langit diin nag-uokoy ka, ngan buhata an iya ginhahangyo ha imo, basi kumilala ngan mahadlok ha imo an ngatanan nga mga tawo han kalibutan ngan magsugot hira ha imo sugad han ginbubuhat han imo mga tawo nga Israel. Niyan mahibabaro hira nga ini nga Templo nga akon gintindog amo an dapit nga angay pagsingbahan ha imo.

⁴⁴“Kon sugoon mo an imo mga tawo hin pagkadto ha pag-awayan kontra han ira mga kaaway, ngan mag-ampo hira ha imo bisan kon hain hira nga dapit, nga maatubang nganhi hini nga syudad nga imo ginpili ngan hini nga Templo nga akon gintindog para ha imo,

⁴⁵pamatii an ira pag-ampo. Pamatii hira didto ha langit, ngan ihatag ha ira an pagdarag-an.

⁴⁶“Kon makasala ha imo an imo mga tawo—ngan waray man ngani tawo nga diri nakakasala—ngan ha imo kasina ipapirde mo hira han ira mga kaaway ngan ipahalin mo hira nga mga bihag ngadto hin iba nga tuna, bisan kon hirayo hin duro ito nga tuna,

⁴⁷pamatii an mga pag-ampo han imo mga tawo. Kon didto hito nga tuna magbasol hira ngan mag-ampo ha imo, ngan magkumpisal han ira kamakasasala ngan kamaraot, pamatii an ira mga pag-ampo, O GINOO.

⁴⁸Kon didto hito nga tuna magbasol hira hin tinuod ngan kinasingkasing, ngan mag-ampo hira ha imo nga naatubang nganhi hini nga tuna nga imo iginhatag ha ira kaapoy-apoyan, hini nga syudad nga imo ginpili, ngan hini nga Templo nga akon gintindog para ha imo,

⁴⁹niyan pamatii an ira mga pag-ampo. Pamatii hira didto han imo urokyan ha langit, ngan kalooyi hira.

⁵⁰Pasayloa an ngatanan nira nga mga sala ngan an ira pagsupil ha imo, ngan itugot nga malooy ha ira an ira mga kaaway.

⁵¹Imo hira kalugaringon nga mga tawo nga imo ginpagawas ha Ehipto nga sugad hin naglalarab nga hudno.

⁵²“O Ginoo nga DYOS, dayuday magmaloloy-on ka unta han imo mga tawo nga Israel ngan han ira hadi, ngan pamatii an ira pag-ampo, kon magsangpit hira hin pakibulig ha imo.

⁵³Ginpili mo hira tikang han ngatanan nga mga katawhan nga magin imo kalugaringon nga mga tawo, sumala han imo iginsiring ha ira pinaagi kan Moises nga imo surugoon, han pagpagawsa mo ha Ehipto han amon kaapoy-apoyan.”

⁵⁴Katapos ni Solomon mag-ampo ha GINOO, tinmindog hiya ha atubangan han altar, diin hiya naglinuhod nga binayaw an iya mga kamot.

⁵⁵Ha dako nga tingog ginhangyo niya nga bendisyonan han Dyos an ngatanan nga mga tawo nga nagtitirok didto. Nagsiring hiya,

⁵⁶“Pagdayawon an GINOO nga naghatag hin kalinaw ha iya mga tawo, sumala han iya iginsaad. Gintuman niya an ngatanan nga mag-upay nga iya iginsaad, pinaagi kan Moises nga iya surugoon.

⁵⁷Mag-upod unta ha aton an GINOO nga aton Dyos, sugad han iya pag-upod han aton kaapoy-apoyan; diri unta kita niya bayaan o pasibay-an;

⁵⁸himoon unta kita niya nga masinugtanon ha iya, basi dayuday mag-ukoy kita hin kinabuhi nga nakakalipay ha iya, ngan magtuman han ngatanan nga mga balaod ngan mga sugo nga iya iginhatag ha aton kaapoy-apoyan.

⁵⁹Hinumdoman unta ha ngatanan nga panahon han GINOO nga aton Dyos ini nga pag-ampo ngan ini nga mga pangamuyo nga akon ginhangyo ha iya. Dayuday magmaloloy-on unta hiya han mga tawo han Israel ngan han ira hadi, sumala han ira adlaw-adlaw nga mga kinahanglanon,

⁶⁰basi mahibaroan han ngatanan nga mga nasod han kalibutan nga an GINOO gudla amo an Dyos—waray na iba.

⁶¹Dayuday magmatinumanon unta ha iya, an GINOO nga aton Dyos kamo nga iya mga tawo, nga nagsusugot han ngatanan niya nga mga balaod ngan mga sugo, sugad han iyo ginbubuhat yana nga adlaw.”

⁶²Niyan naghalad ngadto han GINOO hi Hadi Solomon ngan an ngatanan nga mga tawo hin mga hayop nga tutuboron.

⁶³Naghalad hiya hin 22,000 nga mga baka ngan 120,000 nga mga karnero nga mga halad hin pakigdait. Sanglit pinaagi hini nga mga buhat han hadi ngan han ngatanan nga mga tawo ira ginhalad an Templo, ngadto han GINOO nga Dyos.

⁶⁴Hito manta nga adlaw iya liwat ginhalad an butnga nga bahin han bungsaran, an dapit ha atubangan han Templo ngan iya ginhalaran hin mga hayop nga tinubod nga mga bug-os pa, hin mga halad nga pagkaon, ngan han tambok han mga hayop han mga halad hin pakigdait. Ginbuhat ini niya kay haligotay para hini ngatanan nga mga halad an bronse nga altar.

⁶⁵Didto ngahaw han Templo ginsaurog ni Solomon ngan han ngatanan nga mga tawo han Israel pito[26] ka adlaw an Pyesta han mga Payagpayag. Nakadto in kadam-an kaupay nga mga tawo tikang ha Agianan han Hamat ha amihanan, ngan ha pag-ultan han Ehipto ha timogan.

⁶⁶Ginpauli ni Solomon an mga tawo dida na han ikawalo ka adlaw. Gindayaw hiya nira ngatanan, ngan nanguli hira nga malipayon tungod han ngatanan nga mag-upay nga mga butang nga iginhatag han GINOO kan David nga iya surugoon ngan han iya mga tawo nga Israel.