Read Waray Samarenyo Meaning Based 2 Hadi 13 Bible Online

2 Hadi 13 - Waray Samarenyo Meaning Based bible

2 Hadi 13

¹Dida han ika-23 ka tuig nga pagkahadi han Juda ni Joas nga anak ni Ahasias, nahimo nga hadi han Israel hi Joacas nga anak ni Jehu, ngan naghadi ini hiya ha Samaria hin 17 ka tuig.

²Nakasala hiya han GINOO sugad kan Hadi Jeroboam nga una ha iya, ngan gintutdoan niya hin pakasala an Israel; waray gud hiya bumaya han iya magraot nga mga binuhatan.

³Sanglit nasina han Israel an GINOO, ngan tinugotan niya nga magpadayon hira Hadi Hasael han Siria ug Benadad nga iya anak hin pagpirde han Israel.

⁴Niyan nag-ampo ha GINOO hi Joacas, ngan pinamatian han GINOO an iya pag-ampo, kay hinkit-an han GINOO nga gintatalumpigos han hadi han Siria an mga Israelita.

⁵Ginpadad-an han GINOO an Israel hin pangulo nga nagtalwas ha ira ha mga Siriahanon, sanglit nagkamay-ada kalinaw an mga Israelita, sugad hadto anay.

⁶Kundi waray gihapon nira bayai an mga sala nga igintutdo ni Hadi Jeroboam han Israel kundi nagpadayon[16] lugod hin pakasala; ngan nagpabilin ha Samaria an ladawan han diyosa nga Asera.

⁷Waray na nahibilin han kasondalohan ni Joacas labot hin 50 nga mga dikabayo, 10 nga mga karuwahe, ngan 10,000 nga mga sondalo, kay ginpamatay han hadi han Siria an iba ha ira; nga gintamaktamakan hira sugad hin tapotapo.

⁸Nahisurat dida han Kasaysayan han Kahadian han Israel an iba pa nga nabuhat ni Joacas, ngan an ngatanan nga iya pakiaway.

⁹Namatay hiya ngan iginlubong ha Samaria, ngan sinmaliwan ha iya hin pagkahadi hi Joas nga iya anak.

¹⁰Dida han ika-37 ka tuig nga pagkahadi han Juda ni Hadi Joas, nahimo nga hadi han Israel hi Joas nga anak ni Joacas, ngan naghadi ini hiya ha Samaria hin 17 ka tuig.

¹¹Nakasala liwat hiya ha GINOO ngan nagsunod han magraot nga mga binuhatan ni Hadi Jeroboam nga nagtutdo han Israel hin pakasala.

¹²Nahisurat dida han Kasaysayan han Kahadian han Israel an iba pa nga nabuhat ni Joas, lakip an iya pakiaway kontra kan Hadi Amasias han Juda.

¹³Namatay hi Joas ngan iginlubong didto han hadianon nga mga lubnganan ha Samaria, ngan sinmaliwan ha iya hin pagkahadi hi Jeroboam II nga iya anak.

¹⁴Nasakit hin grabe hi Eliseo nga manaragna, ngan han tikamaratay na hiya, dinmuaw ha iya hi Hadi Joas han Israel. Nagsiring an hadi nga nagtatangis, “Amay ko, amay ko! Ikaw an madig-on nga nanalipod han Israel!”

¹⁵Ginsugo hiya ni Eliseo, “Kuha hin bawog ngan mga udyong hin pana.” Kinuha ini ni Joas

¹⁶ngan ginpaandam ha iya ni Eliseo. Ginbingat han hadi an bawog, ngan kinaptan ni Eliseo an mga kamot han hadi.

¹⁷Niyan, ha pagsugot han iginsiring han manaragna, inabrehan han hadi an bintana nga naatubang ha Siria. “Pana na!” nagsugo hi Eliseo. Han pakapana gudla han hadi, sinmiring an manaragna, “Ikaw an pana han GINOO, nga igdadaog niya han Siria. Aawayon mo didto ha Afek an mga Siriahanon tubtob nga pirdehon mo hira.”

¹⁸Niyan ginsugo ni Eliseo an hadi hin pagkuha han iba nga mga udyong ngan ipana ini ha tuna. Pinmana ha tuna an hadi hin makatulo, ngan inmukoy.

¹⁹Nakapasina ini kan Eliseo, ngan ginsiring niya an hadi, “Unta napana ka hin makalima o makaunom, ngan imo gud an bug-os nga pagdarag-on kontra han mga Siriahanon; kundi yana pipirdehon mo hira hin makatulo la.”

²⁰Namatay hi Eliseo ngan iginlubong. Kada tuig nababatasan han mga hugpo hin mga Moabita hin pagsulong han tuna han Israel.

²¹Usa ka higayon dida hin paglubong, hinkit-an in usa hini nga mga hugpo, ngan iginlabog nala han mga maglurubong an minatay ngadto han lubnganan ni Eliseo, ngan nagdadlagan hira.[17] Han pagdapat gudla han lawas dida han mga tul-an ni Eliseo, nabuhi an minatay ngan tinmukdaw.

²²Gintalumpigos an mga Israelita ni Hadi Hasael han Siria ha bug-os nga panahon nga pagkahadi ni Joacas,

²³kundi nalooy ngan pinmaid ha ira an GINOO. Waray hiya tumugot nga mapuo an Israel, kundi ginbuligan hira, tungod han iya ginsaaran kan Abraham, Isaac, ug Jacob. Waray gud hiya mahingalimot han iya mga tawo.

²⁴Dida han kamatay ni Hadi Hasael han Siria, nahimo nga hadi hi Benadad nga iya anak.

²⁵Niyan ginpirde nakatulo ni Hadi Joas han Israel hi Benadad, ngan nabawi an mga syudad nga nabihag ni Benadad ha panahon han pagkahadi ni Joacas nga amay ni Joas.