Read Waray Samarenyo Meaning Based 2 Hadi 17 Bible Online

2 Hadi 17 - Waray Samarenyo Meaning Based bible

2 Hadi 17

¹Dida han ika-12 ka tuig nga pagkahadi han Juda ni Hadi Acas, nahimo nga hadi han Israel hi Hosea nga anak ni Ela, ngan naghadi hiya ha Samaria hin siyam ka tuig.

²Nakasala hiya han GINOO, kundi diri sugad gud han una nga mga hadi nga naghadi han Israel.

³Nakig-away ha iya hi Emperador Salmanaser han Asiria; nagpasakop hi Hosea kan Salmanaser ngan nagbayad ha iya hin buhis kada tuig.

⁴Kundi usa ka panahon nagpasugo hi Hosea ngadto kan Hadi Sua han Ehipto hin pangaro hin bulig ha iya, ngan waray na hiya magbayad ha Asiria han tinuig nga buhis. Han paghibaro hini ni Salmanaser, iginpadakop niya hi Hosea ngan iginpapriso.

⁵Niyan ginsulong ni Salmanaser an Israel, ngan ginrikopohan niya an Samaria sulod hin tulo ka tuig.

⁶Dida han ikasiyam ka tuig han pagkahadi ni Hosea, ginbihag han Asiriahanon nga emperador[26] an Samaria, gindara ha Asiria nga mga priso an mga Israelita, ngan ikinadto ha syudad han Hala in pira ha ira, an iba didto ha may Salog Habor ha distrito han Gosan, ngan an iba ha mga syudad han Media.

⁷Napukan an Samaria kay an mga Israelita nakasala han GINOO nga ira Dyos nga nagtalwas ha ira tikang han hadi han Ehipto ngan nagpangulo ha ira hin paggawas han Ehipto. Nagsingba hira hin iba nga kadiyosan,

⁸nagsunod han mga batasan han mga tawo nga gintabog han GINOO samtang nasulong an iya mga tawo, ngan nagtuman han mga pamatasan nga igintutdo han kahadian han Israel.[27]

⁹Nagbuhat an mga Israelita hin mga butang nga diri tugot han GINOO nga ira Dyos. Nagtindog hira hin pagano nga mga dapit hin pagsingba ha ngatanan nira nga kapungtoran, tikang han gigugutiayi nga baryo ngadto han gidadakoi nga syudad.

¹⁰Nagtindog hira hin mga harigi nga bato ngan mga ladawan han diyosa nga hi Asera ha ngatanan nga kapungtoran ngan ha sirong han kada marampag nga kahoy,

¹¹ngan nagsunog hira hin insyenso ha ngatanan nga pagano nga mga altar, ngan nagsunod han binuhatan han mga tawo nga ginpaiwas han GINOO. Gin-aghat nira nga masina an GINOO pinaagi han ngatanan nira nga magraot nga mga buhat,

¹²ngan ginsupak nira an sugo han GINOO nga diri hira magsingba hin mga diyosdiyos.

¹³Nagsugo an GINOO hin iya mga magsarangyaw ngan mga manaragna hin pagpahimatngon han Israel ug Juda: “Bayai an magraot niyo nga mga binuhatan ngan sugta an akon mga sugo nga aada han Balaod nga iginhatag ko ha iyo kaapoy-apoyan, ngan iginduhol ko ha iyo pinaagi han akon mga surugoon nga mga manaragna.”

¹⁴Kundi waray hira magsugot; magtig-a an ira mga ulo sugad han ira kaapoy-apoyan nga waray pagtoo han GINOO nga ira Dyos.

¹⁵Dinmiri hira hin pagsugot han iya mga tugon, waray hira magtuman han ginsaaran nga ginhimo niya ha ira kaapoy-apoyan, ngan nagpakabungol hira han iya mga pahimatngon. Nagsingba hira hin waray pulos nga mga diyosdiyos ngan nagin waray pulos hira ngahaw, ngan nagsunod hira han mga batasan han mga higrani nga nasod, nga sinmupak han sugo han GINOO nga diri hira magsubad ha ira.

¹⁶Ginsupak nira an ngatanan nga mga balaod han GINOO nga ira Dyos ngan naghimo hin duha nga metal nga baka basi pagsingbahon. Naghimo liwat hira hin ladawan han diyosa nga hi Asera, nagsingba han mga bituon, ngan nag-alagad han diyos nga hi Baal.

¹⁷Gin-unong nira an ira mga anak nga kalalaken-an ug kababayen-an ngan ginhalad nira nga halad nga tutuboron ngadto han pagano nga kadiyosan. Ginggamit nira in mga paratigo ngan mga paradiwata, ngan nagtubyan ha ira kalugaringon hin pagbuhat hin sala ha atubangan han GINOO, sanglit nasina gud an GINOO.

¹⁸Nasina han mga Israelita an GINOO ngan ginpaiwas hira ha iya atubangan, nga an tribo ni Juda na la an isinalin.

¹⁹Kundi bisan pa an mga tawo han Juda waray magsugot han mga balaod han GINOO nga ira Dyos; ginsubad nira an mga batasan nga ginsunod han mga tawo han Israel.

²⁰Ginsikway han GINOO an ngatanan nga mga Israelita; ginkastigo ngan gintubyan hira ha magbangis nga mga kaaway, tubtob nga ha kataposan, ginpaiwas niya hira ha iya atubangan.

²¹Han bulag na han Juda, an nasod han Israel, ginhimo han mga Israelita nga ira hadi hi Jeroboam nga anak ni Nebat. Ginsugo hira ni Jeroboam hin pagbaya han GINOO, ngan nagtutdo ha ira hin pagbuhat hin makalilisang nga mga sala.

²²Nagsunod hira kan Jeroboam ngan nagpadayon hin pagbuhat han ngatanan nga mga sala nga ginbuhat niya,

²³tubtob nga ha kataposan, ginpaiwas hira han GINOO ha iya atubangan, sumala han iginpahimatngon niya pinaagi han iya mga surugoon nga mga manaragna. Sanglit ginhalin nga mga bihag ngadto ha Asiria an mga tawo han Israel, diin aadto pa hira ngada yana.

²⁴Nagdara an emperador han Asiria hin mga tawo tikang han mga syudad han Babilonia, Cuta, Aba, Hamat, ug Sefarbaim, ngan iginpahimutang hira ha mga syudad han Samaria,[28] liwan han ginbihag nga mga Israelita. Gintag-iya nira ini nga mga syudad ngan nag-ukoy hira didto.

²⁵Han bag-o pa hira nga nag-uokoy didto, waray hira magsingba han GINOO, sanglit nagpadara an GINOO hin mga liyon nga nagpatay hin pira ha ira.

²⁶Nasumatan an emperador han Asiria nga diri mag-aram han balaod han diyos hito nga tuna an mga tawo nga iginpahimutang niya ha mga syudad han Samaria, sanglit nagpadara an diyos hin mga liyon nga amo an nagpipinamatay.

²⁷Sanglit nagsugo an emperador: “Pabalika in usa han kapadian nga aton ginbihag; pabalika ngan paukya hiya[29] didto, basi tutdoan niya an mga tawo han balaod han diyos hito nga tuna.”

²⁸Sanglit kinmadto ngan nag-ukoy ha Betel in padi nga Israelita nga nabihag tikang ha Samaria, ngan nagtutdo hiya han mga tawo hin pagsingba han GINOO.

²⁹Kundi nagpadayon hin paghimo han ira kalugaringon nga mga diyosdiyos an mga tawo nga nag-ukoy didto ha Samaria, ngan iginbutang ini ha mga arampoan nga gintindog han mga Israelita. Naghimo hin mga diyosdiyos didto han mga syudad nga inuokyan nira an tagsa ka lain nga hugpo:

³⁰an mga tawo han Babilonia naghimo hin mga diyosdiyos ni Sucotbemot; mga diyosdiyos ni Nergel, an mga tawo han Cuta; mga diyosdiyos ni Asima, an mga tawo han Hamat;

³¹mga diyosdiyos ni Nebas ug Tartac, an mga tawo han Abit; ngan an mga tawo han Sefarbaim nagtubyan han ira mga anak nga halad nga tinubod ngadto han ira mga diyos nga amo hira Adramelec ug Anamelec.

³²Nagsingba liwat han GINOO ini nga mga tawo, ngan nagpili tikang ha ira ngahaw hin mga tawo nga hihimoon nga kapadian basi mag-alagad didto han pagano nga mga dapit hin pagsingba ngan maghalad didto hin mga hayop nga tutuboron para ha ira.

³³Sanglit nagsingba hira han GINOO, kundi nagsingba liwat han ira kalugaringon nga kadiyosan, sumala han mga batasan han mga nasod diin hira tikang.

³⁴Nagpapadayon pa hira ngada yana nga adlaw han ira daan nga mga pamatasan. Diri hira nagsisingba han GINOO, o nagsusugot han mga balaod ngan mga sugo nga iginhatag niya ha mga tulin ni Jacob nga ginngaranan niya kan Israel.

³⁵Naghimo ha ira hin ginsaaran an GINOO ngan nagsugo ha ira: “Ayaw kamo pagsingba hin iba nga kadiyosan; ayaw pagyukbo ha ira, o pag-alagad ha ira, o paghalad ha ira hin hayop nga tutuboron.

³⁶Kahadloki niyo ako, an GINOO nga nagpagawas ha iyo ha Ehipto pinaagi hin dako nga gahom ug kusog; mayukbo kamo ha akon ngan maghahalad ha akon hin mga hayop nga tutuboron.

³⁷Dayuday kamo magsusugot han mga balaod ngan mga sugo nga iginsurat ko para ha iyo. Ayaw kamo kahadlok hin iba nga kadiyosan,

³⁸ngan ayaw kamo kalimot han ginsaaran nga ginhimo ko ha iyo.

³⁹Kahadloki niyo ako, an GINOO nga iyo Dyos, ngan tatalwason ko kamo han iyo mga kaaway.”

⁴⁰Kundi waray gud la pamati ito nga mga tawo, ngan nagpadayon hira hin pagsunod han ira daan nga mga batasan.

⁴¹Sanglit nagsingba han GINOO ito nga mga tawo, kundi nagsingba liwat han ira mga diyosdiyos; ngan ngada yana nga adlaw amo la gihapon an ginbubuhat han ira mga tulin.