Read Waray Samarenyo Meaning Based 2 Hadi 20 Bible Online

2 Hadi 20 - Waray Samarenyo Meaning Based bible

2 Hadi 20

¹Hadto nga panahon, nasakit hi Hadi Ezequias ngan harapit na mamatay. Nasingadto hin pagduaw ha iya hi manaragna Isaias nga anak ni Amos, ngan nagsiring ha iya, “Nasiring an GINOO nga kinahanglan husayon mo an ngatanan mo nga mga butang, kay diri ka na mag-uupay. Pag-andam nala kay mapatay ka.”

²Linmingi hi Ezequias ha bungbong ngan nag-ampo:

³“Hinumdomi, O GINOO, nga nag-alagad ako ha imo nga matinumanon ngan maunongon, ngan dayuday gintuman ko an karuyag mo ipabuhat ha akon.” Ngan nagtangis hiya hin duro.

⁴Binayaan ni Isaias an hadi, kundi san-o hiya lumapos han butnga nga libong han palasyo, ginsiring hiya han GINOO,

⁵hin pagbalik ngadto kan Ezequias nga pangulo han mga tawo han GINOO, ngan pagsiring ha iya, “Hinbatian ko, an GINOO nga Dyos ni David nga imo ginikanan, an imo pag-ampo ngan hinkit-an ko an imo mga luha. Tatambalan ko ikaw ngan paglabay hin tulo ka adlaw makadto ka ha Templo.

⁶Dudugangan ko hin 15 ka tuig an imo kinabuhi. Tatalwason ko han emperador han Asiria ikaw ngan ini nga syudad han Jerusalem. Pananalipdan ko ini nga syudad para han kalugaringon ko nga kadungganan ngan tungod han saad nga akon ginhimo kan David nga akon surugoon.”

⁷Niyan ginsiring ni Isaias an mga tinapuran han hadi nga tamposan hin binayo nga igos an iya hubag, ngan mauupay hiya.[30]

⁸Nagpakiana hi Hadi Ezequias, “Ano an tigaman nga tatambalan ako han GINOO ngan makakakadto ako ha Templo paglabay hin tulo ka adlaw?”

⁹Binmaton hi Isaias, “Tatagan ka han GINOO hin tigaman nga magtutuman hiya han iya saad. Yana, karuyag ba nimo nga umunhan an lambong hin napulo ka pitad o umisol hin napulo ka pitad?”

¹⁰Binmaton hi Ezequias, “Masayon an pagpaunhan han lambong hin napulo ka pitad! Paisola ini hin napulo ka pitad.”

¹¹Nag-ampo ha GINOO hi Isaias, ngan ginpaisol niya hin napulo ka pitad an lambong dida han hagdanan nga ginhimo ni Hadi Acas.

¹²Hadto nga amo nga panahon an hadi han Babilonia, hi Merodacbaladan, nga anak ni Baladan, nakabati nga nasakit hi Hadi Ezequias, sanglit ginpadad-an niya hin surat ug regalo.

¹³Ginkarawat ni Ezequias an mga sinugo ngan ginpakita hira han iya karikohan—an iya salapi ug bulawan, an iya mga panakot ngan mga pahamot, ngan an ngatanan niya nga garamiton hin pakig-away. Waray butang ha iya mga hirimosan o bisan diin ha iya ginhadian nga waray niya ipakita ha ira.

¹⁴Niyan kinmadto kan Hadi Ezequias hi manaragna Isaias ngan nagpakiana, “Diin tikang ini nga mga tawo, ngan ano an ira iginsiring ha imo?” Binmaton hi Ezequias, “Tikang hira ha Babilonia nga hirayo hin duro nga nasod.”

¹⁵“Ano an ira hinkit-an ha palasyo?” pinmakiana hi Isaias. Binmaton hiya, “Hinkit-an nira an ngatanan. Waray butang ha mga hirimosan nga waray ko ipakita ha ira.”

¹⁶Niyan ginsiring ni Isaias an hadi, “Nasiring an GINOO nga Labi Kamakagarahum nga

¹⁷maabot in panahon nga dadad-on ha Babilonia an ngatanan nga butang ha imo palasyo, an ngatanan nga gintirok han imo kaapoy-apoyan ngada hini nga adlaw. Waray gud mahibibilin.

¹⁸Dadad-on in pira han imo kalugaringon nga suok nga mga tulin, ngan hihimoon nga mga yunuko basi mag-alagad ha palasyo han hadi han Babilonia.”

¹⁹An kasabot ni Hadi Ezequias nga an buot sidngon han mensahe nga magkakamay-ada kalinaw ngan kahimyangan ha iya panahon, sanglit binmaton hiya, “Maupay an mensahe han GINOO nga ihinatag mo ha akon.”

²⁰Nahisurat dida han Kasaysayan han Kahadian han Juda an iba pa nga nabuhat ni Hadi Ezequias, an iya mga paki-away, ngan an susumaton han paghimo niya hin linaw ngan hin aragian hin tubig ngadto ha syudad.

²¹Namatay hi Ezequias ngan sinmaliwan ha iya hin pagkahadi hi Manases nga iya anak.