Read Waray Samarenyo Meaning Based 2 Hadi 22 Bible Online

2 Hadi 22 - Waray Samarenyo Meaning Based bible

2 Hadi 22

¹Walo pa la an panuigon ni Josias han kahimo niya nga hadi han Juda, ngan naghadi hiya ha Jerusalem hin 31 ka tuig. Iroy niya hi Idida nga anak ni Hadaya, nga taga-Boscat.

²Ginbuhat ni Josias an nakakalipay han GINOO; ginsunod niya an susbaranan han iya ginikanan, hi Hadi David, nga nagsugot hin matadong han ngatanan nga mga balaod han Dyos.

³Dida han ika-18 ka tuig nga pagkahadi ni Hadi Josias, ginsugo niya hin pagkadto ha Templo an sekretaryo nga hi Safan nga anak ni Asia ngan apo ni Mesulam, dara an sugo:

⁴“Kadto han Labaw nga Padi nga hi Hilkias ngan ipaihap an kwarta nga natirok han kapadian nga nagbabantay han aragian han Templo tikang han mga tawo.

⁵Ipahatag an kwarta ngadto han mga tawo nga tinaporan han pag-ayad han Templo. Kinahanglan baydan nira

⁶an mga panday, an mga magtirindog, an mga parasimento, ngan papaliton an mga kahoy ngan an mga bato nga ginagamit ha pag-ayad.

⁷Tangkod hin duro an mga tawo nga tinaporan han trabaho, sanglit diri na kinahanglan nga maghatag hira hin katuhayan hiunong han mga gasto.”

⁸Igindul-ong ni Safan kan Hilkias an sugo han hadi, ngan nagsumat kan Safan hi Hilkias nga hin-agian niya didto ha Templo An Basahan han Balaod. Ginhatag ha iya ni Hilkias an basahan, ngan ginbasa ini ni Safan.

⁹Katapos inmoli hiya ngadto han hadi ngan nagsumat: “Ginkuha han imo mga surugoon an kwarta ha Templo ngan iginhatag na ha mga tawo nga tinaporan han pag-ayad han Templo.”

¹⁰Ngan nagsiring hiya, “Iini in basahan nga ginhatag ha akon ni Hilkias.” Ngan ginbasa ini niya hin dako nga tingog ha atubangan han hadi.

¹¹Han pakabati han hadi, ginggisi niya an iya panapton tungod hin kabido.

¹²Ginpatawag niya hi Hilkias, hi Safan, hi Ahikam nga iya anak nga lalake, hi Acbor nga anak nga lalake ni Mikias, ngan hi Asias nga surugoon han hadi, ngan ginsugo hira:

¹³“Kadto ngan pakianhi an GINOO para ha akon ngan para han ngatanan nga mga tawo han Juda hiunong han mga pagturon-an hini nga basahan. Nasisina ha aton an GINOO, kay waray pagbuhata han aton kaapoy-apoyan an iginsiring hini nga basahan nga kinahanglan pagbuhaton.”

¹⁴Linmakat hira Hilkias, Safan, Ahikam, Acbor, ug Asias pagpakiana hin babaye nga ginngangaranan kan Hulda nga manaragna nga nag-uokoy didto hin bag-o nga dapit ha Jerusalem. (Tinaporan han mga bisti han Templo an iya bana nga hi Salum nga anak ni Tecba ngan apo hi Harhas.) Iginsumat nira han babaye an nahinabo,

¹⁵ngan ginsiring hira han babaye nga bumalik hira ngadto han hadi ngan isumat ha iya

¹⁶an masunod nga mensahe han GINOO: “Kakastigohon ko an Jerusalem ngan an ngatanan niya nga mga tawo, sumala han nahisurat ha basahan nga ginbasa han hadi.

¹⁷Iginsikway ako nira ngan naghalad hin mga hayop nga tutuboron ha iba nga kadiyosan ngan an ngatanan nga ira nabuhat amo an nagogliat han akon kasina. Tugob an akon kasina han Jerusalem, ngan diri ini magpapapas dayon.

¹⁸Mahitungod han hadi, amo ini an ipasiring ko, an GINOO nga Dyos han Israel: Hinbatian mo an nahisurat ha basahan,

¹⁹ngan nagbasol ngan nagpaubos ka ha akon atubangan, nga naggisi han imo mga panapton ngan nagtangis han pakabati mo han akon pagtarhoga hin pagkastigo han Jerusalem ngan han iya mga tawo. Hihimoon ko ito nga makaarawod nga taran-awon, usa nga dapit kanay ngaran gagamiton han mga tawo hin pagpakaraot. Kundi hinbatian ko an imo pag-ampo,

²⁰sanglit diri mo hikikit-an an kastigo nga dadad-on ko ha Jerusalem. Tutugotan ko nga mamatay ka ha kamurayaw.” Binmalik kan Hadi Josias an mga tawo dara ini nga mensahe.