Read Waray Samarenyo Meaning Based 2 Hadi 3 Bible Online

2 Hadi 3 - Waray Samarenyo Meaning Based bible

2 Hadi 3

¹Dida han ika-18 ka tuig han pagkahadi han Juda ni Hadi Josafat, nahimo nga hadi han Israel hi Joram nga anak ni Acab, ngan naghadi hiya hin 12 ka tuig ha Samaria.

²Nakasala hiya han GINOO, kundi diri hiya sugad kamaraot han amay o han iroy niya nga hi Jezebel; ginkuha niya an ladawan nga gintindog han iya amay para han pagsingba kan Baal.

³Kundi sugad kan Hadi Jeroboam nga anak ni Nebat, nga una ha iya, gintutdoan niya hin pakasala an Israel, ngan waray gud hiya umundang hin pakasala.

⁴Nagmangno hin mga karnero hi Hadi Mesa han Moab, ngan kada tuig nahatag hiya ha hadi han Israel hin buhis nga 100,000 nga mga nati nga karnero ngan hin barahibo hin 100,000 nga mga karnero.

⁵Kundi han kamatay ni Hadi Acab han Israel, nakig-away han Israel hi Mesa.

⁶Ginmawas dayon han Samaria hi Hadi Joram ngan gintirok an ngatanan niya nga kasondalohan.

⁷Nagpatugon hiya kan Hadi Josafat han Juda: “Kinmontra ha akon an hadi han Moab; maupod ka ba ha akon hin pakig-away ha iya?” Nagbaton hi Hadi Josafat, “Maupod ako. Andam ako sugad ha imo, ngan sugad man an akon mga tawo ngan an akon mga kabayo.

⁸Hain man kita aagi hin pagsulong ha iya?” Nagbaton hi Joram, “An hilaba nga dalan ha kamingawan han Edom an aton aagian.”

⁹Sanglit nagburunyog hira Hadi Joram ngan an mga hadi han Juda ug Edom. Katapos hin pito ka adlaw nga pagbinaktas, naubosan hira hin tubig, ngan waray na gud nahisalin para han mga tawo o han mga kargahan nga hayop.

¹⁰“Ta, waray na kita mahihimo!” nagsiring hi Hadi Joram. “Igintubyan han GINOO ha mga kamot han hadi han Moab kita nga tulo!”

¹¹Nagpakiana hi Hadi Josafat, “May-ada ba dinhe manaragna nga aton susugoon hin pagpakiana han GINOO?” Binmaton in usa nga opisyal han mga sondalo ni Hadi Joram, “Aanhi hi Eliseo nga anak ni Safat. Kabulig hiya anay ni Elias.”

¹²Nagsiring hi Hadi Josafat, “Matuod hiya nga manaragna.” Sanglit nasingadto kan Eliseo an tulo nga kahadian.

¹³“Kay ano nga mabulig ako ha imo?” ginsiring ni Eliseo an hadi han Israel. “Kadto ngan pakianhi an mga manaragna nga ginpakianhan han imo amay ug iroy.” Binmaton hi Joram, “Ayaw gad! An GINOO man an nagtubyan ha amon nga tulo nga kahadian ha kamot han hadi han Moab.”

¹⁴Binmaton hi Eliseo, “Sugad nga buhi an GINOO nga akon gin-aalagad, diri unta ako manginginlabot ha imo kon diri la tungod hin pagtahod ko kan Hadi Josafat han Juda.

¹⁵Dad-i ako hin musikiro yana.” Samtang nagtutukar han iya arpa an musikiro, inmabot kan Eliseo an gahom han GINOO,

¹⁶ngan nagsiring hiya, “Amo ini an siring han GINOO: ‘Lub-a niyo hin kali ini nga hinubsan nga sapa.

¹⁷Bisan kon diri kamo kumita hin uran o hangin, mapupuno hin tubig ini nga hinubsan nga sapa, ngan makakainom an iyo kabakahan, ngan an iyo kargahan nga mga hayop.’”

¹⁸Ngan nagpadayon hi Eliseo, “Kundi masayon la para han GINOO ini nga buruhaton; padadag-on liwat kamo niya kontra han mga Moabita.

¹⁹Aagawon niyo an ngatanan nira nga magtahom nga pinaderan nga mga syudad; pupudlon niyo an ngatanan nira nga mga kahoy nga nabunga, tatak-opan an ngatanan nira nga mga burabod, ngan dadaoton an ngatanan nira nga maglangbo nga kaumhan pinaagi hin pagpasarangi han uma hin mga bato.”

²⁰Pagkabuwas han aga, ha takna nga paghalad hin mga hayop nga tutuboron, inmawas in tubig tikang ha Edumea, ngan naluob an tuna.

²¹Pakabati la han mga Moabita nga inmabot hin pakiaway ha ira an tulo nga kahadian, gintawag an ngatanan nga mga tawo nga nakakadara na hin hinganiban, tikang han gimamagurangi ngadto han gimamanghori, ngan naghulat hira didto han pag-ultan.

²²Han pagbangon nira han pagkabuwas han aga, sinirakan han adlaw an tubig, ngan mapula an tubig pagkit-on sugad hin dugo.

²³“Dugo ito!” naggoliat hira. “Bangin nag-inaraway ngan nagpinatayay yana an tulo nga mga hadi ug an ira kasondalohan! Tana, panikasi ta an ira kampo!”

²⁴Kundi han pag-abot nira ha kampo, ginsulong hira han mga Israelita ngan inmisol hira. Nagpadayon paglanat[3] an mga Israelita. Ginpatay nira an mga Moabita,

²⁵ngan ginbungkag an ira mga syudad. Kon nalabay hira hin malangbo nga uma, naitsa ngadto han uma hin usa nga bato an kada Israelita, tubtob nga nagsarang in damo nga mga bato didto han mga kaumhan; gintak-opan liwat nira an mga burabod ngan ginpulod an mga kahoy nga nabunga. Ha kataposan, an kapital na la nga syudad han Kirhareset[4] an nahibilin, ngan ginpalibotan ngan ginsulong ini han mga Israelita.

²⁶Han pakasabot han hadi han Moab nga napipirde na hiya, nagpaupod hiya hin 700 nga mga mag-upay gumamit hin espada ngan nagpirit hiya hin pagtarop ha butnga han kaaway ngan pagkalagiw ngadto han hadi han Siria,[5] kundi waray hiya pakahimo.

²⁷Sanglit kinuha niya an iya suhag nga lalake nga sumurunod ha iya hin pagkahadi, ngan ha bawbaw han pader han syudad iginhalad hiya nga unong nga tutuboron ngadto han diyos han Moab. Nahadlok an mga Israelita, sanglit inmisol hira han syudad ngan inmoli ha ira kalugaringon nga nasod.