Read Waray Samarenyo Meaning Based 2 Hadi 9 Bible Online

2 Hadi 9 - Waray Samarenyo Meaning Based bible

2 Hadi 9

¹Niyan gintawag ni Eliseo in usa han batan-on nga mga manaragna ngan ginsiring niya, “Pag-andam ngan pakadto ha Ramot ha Galaad. Dad-a ini nga tibod hin lana hin olibo,

²ngan ha pag-abot mo didto, pamilnga hi Jehu nga anak ni Josafat ngan apo ni Nimsi. Dad-a hiya ngadto hin hilit nga kwarto nga hirayo han iya mga kaurosa.

³Bub-i an iya ulo hini nga lana hin olibo, ngan siring, ‘Nasiring an GINOO nga gindidihogan ka niya nga hadi han Israel.’ Katapos palagiw dayon; ayaw gud paglangan.”

⁴Sanglit kinmadto ha Ramot an batan-on nga manaragna,

⁵diin may-ada katirok an mga opisyal han kasondalohan. Nagsiring hiya, “Harangdon nga pangulo, may mensahe ako ha imo.” Nagpakiana hi Jehu, “Hin-o ha amon an ginhihimangrawan mo?” “Ikaw, harangdon nga pangulo,” binmaton hiya.

⁶Niyan sinmulod han balay hira nga duha, ngan ginbubo han batan-on nga manaragna ha ulo ni Jehu an lana hin olibo ngan nagsiring, “Nasiring an GINOO nga Dyos han Israel: ‘Gindidihogan ko ikaw nga hadi han akon mga tawo nga Israelita.

⁷Kinahanglan nga patayon mo an hadi nga imo agaron, an anak ni Acab, basi ako makabulos kan Jezebel tungod han pagpataya niya han akon mga manaragna ngan han iba ko nga mga surugoon.

⁸Mapatay an ngatanan nga sakop han panimalay ngan mga tulin ni Acab; pupuohon ko an ngatanan nga kalalaken-an ha iya panimalay, batan-on ug lagas.

⁹Bubuhaton ko ha iya panimalay an ginbuhat ko han mga panimalay hi Hadi Jeroboam ug Hadi Baasa han Israel.

¹⁰Diri ilulubong hi Jezebel; kakaonon hin mga ayam an iya lawas didto ha katunaan han Jezrael.’” Katapos niya pagsiring hini, binmaya han kwarto an batan-on nga manaragna ngan pinmalagiw.

¹¹Binmalik hi Jehu ha iya igkasi mga opisyal nga nagpakiana ha iya, “Kumusta man? Ano ba an tuyo ha imo hadto nga lurong?” “Maaram na kamo han iya tuyo,” binmaton hi Jehu.

¹²“Diri, diri kami maaram,” binmaton hira. “Sumati kami han iya iginsiring!” “Ginsumatan ako nga nasiring an GINOO: ‘Gindidihogan ko ikaw nga hadi han Israel,’” binmaton hi Jehu.

¹³Ha gilayon ginbitad han iya igkasi mga opisyal didto ha bawbaw han balitang han hagdan an ira mga kurugpos nga gintindogan ni Jehu; nagtrompeta, ngan naggogliat hira, “Hadi na hi Jehu!”

¹⁴Niyan nakiaway kan Hadi Joram hi Jehu. Nakadto ha Jezrael an hadi, diin nagpatambal hiya han iya kasamdan han pakig-away niya ha Ramot kontra kan Hadi Hasael han Siria. Sanglit nagsiring hi Jehu ha iya igkasi mga opisyal, “Kon naugop kamo ha akon, talinguhaa niyo nga waray gud makagawas han syudad hin pagkadto ngan pagsumat han mga tawo ha Jezrael.”

¹⁶Ngan sinmakay hiya han iya karuwahe ngan ginmikan ngadto ha Jezrael. Waray pa kauupay hi Joram, ngan nakadto hi Hadi Ahasias han Juda, naduaw ha iya.

¹⁷Hinkit-an han gwardya nga nakadto han lantawan ha Jezrael, hi Jehu ngan an iya mga tawo nga nadaop ha ira. Ginmoliat hiya, “May-ada mga dikabayo nga tipakanhi!” Nagbaton hi Joram, “Pagsugo hin dikabayo hin panginano kon mga sangkay o mga kaaway ba hira.”

¹⁸Nangabayo hin pagtapo kan Jehu an sinugo, ngan nagsiring ha iya, “Karuyag mahibaro an hadi kon sangkay ka ba nga nakanhi.” Binmaton hi Jehu, “Waray ka hini labot; sunod ha akon.” Nagsumat an gwardya han lantawan nga an sinugo nakaabot ngadto han hugpo kundi diri na hiya mabalik.

¹⁹Nagsugo liwat hin lain nga nagpakiana kan Jehu han amo gihapon nga pakiana. Binmaton liwat hi Jehu, “Waray ka hini labot, sunod ha akon.”

²⁰Nagsumat na liwat an gwardya nga nakaabot han hugpo an sinugo kundi diri na hiya mabalik. Ngan nagsiring liwat hiya, “Sugad hin tuyaw magpadalagan han iya karuwahe an puno han hugpo, sugad gud kan Jehu!”

²¹“Andama an akon karuwahe,” nagsugo hi Joram. Sinmakay hiya ngan hi Hadi Ahasias, ha ira kalugaringon nga mga karuwahe, ngan gintapo nira hi Jehu. Ginkatapo hiya nira ha uma nga gintag-iya anay ni Nabot.

²²“Kalinaw ba an imo tuyo hin pagkanhi?” nagpakiana ha iya hi Joram. “Uunanhon hin pagkamay-ada kalinaw,” binmaton hi Jehu, “nga may-ada pa mga pagdiwata ngan pagsingba hin mga diyosdiyos nga gintikangan ni Jezebel nga iroy mo?”

²³“Paglingo ini, Ahasias!” Ginmoliat hi Joram, pinatalikod niya an iya karuwahe ngan pinmalagiw.

²⁴Hinulbot ni Jehu an iya pana ngan ginpana niya hi Joram ha bug-os niya nga kusog. Naigo ha bungkog hi Joram ngan tinmahos han iya kasingkasing an pana. Natumba nga patay hi Joram ha iya karuwahe,

²⁵ngan nagsiring hi Jehu kan Badecer nga iya kabulig, “Kuhaa an iya lawas ngan ilabog ngadto han uma nga gintag-iya anay ni Nabot. Panumdom nga han nagsasakay kita ha luyo ni Acab nga amay ni Hadi Joram, nagyakan hini nga mga pulong kontra kan Acab an GINOO:

²⁶‘Hinkit-an ko kakulop an pagpatay kan Nabot ngan han iya mga anak nga kalalaken-an. Ngan nagsasaad ako nga kakastigohon ko ikaw dinhe hini ngahaw nga uma.’ Sanglit kuhaa an lawas ni Joram,” ginsugo ni Jehu an iya kabulig, “ngan ilabog ngadto han uma nga gintag-iya anay ni Nabot, sumala han iginsiring han GINOO.”

²⁷Hinkit-an ni Hadi Ahasias an nahinabo, sanglit pinmalagiw hiya ha iya karuwahe tipakadto ha bungto han Betagan, ngan ginlanat hiya ni Jehu. “Pataya liwat hiya!” nagsugo hi Jehu han iya mga tawo, ngan ginsamad hiya nira[10] samtang nasakay hiya han iya karuwahe tipasagka ngadto ha Gub, hirani han bungto han Jeblaam. Kundi nakahimo pa hiya hin pagpadayon tubtob nga nakaabot hiya ha syudad han Megido, diin namatay hiya.

²⁸Iginbalik han iya mga opisyal an iya lawas ngadto ha Jerusalem sakay han iya karuwahe, ngan iginlubong hiya didto han hadianon nga mga lubnganan ha Syudad ni David.

²⁹Nahimo nga hadi han Juda hi Ahasias dida han ika-11 ka tuig han pagkahadi han Israel ni Joram nga anak ni Acab.

³⁰Han pag-abot ha Jezrael ni Jehu, hinbatian na ni Jezebel an nahinabo. Nagpahusay hiya han iya mga mata ngan nag-ayad han iya buhok ngan tinmamod ha bintana han palasyo.

³¹Han nasulod han ganghaan hi Jehu, ginmoliat hi Jezebel, “Ikaw nga Simbri![11] Ikaw nga parapamatay! Kay ano nga aanhi ka?”

³²Hinmangad hi Jehu ngan ginmoliat, “Hin-o an naugop ha akon?” Tinamuran hiya ha bintana hin duha o tulo nga mga yunuko,

³³ngan ginsiring hira ni Jehu, “Ilabog ha ubos hi Jezebel!” Iginlabog hiya ha ubos, ngan nagtabsik an iya dugo ngada han pader ngan han mga kabayo. Ginpataraan ni Jehu an iya lawas han iya mga kabayo ug karuwahe,

³⁴sinmulod hi Jehu han palasyo, ngan kinmaon. Dida na hiya sumiring, “Kuhaa ito nga maraot nga babaye ngan ilubong hiya kay anak man hiya hin hadi.”

³⁵Kundi an mga tawo nga kinmadto hin paglubong unta ha iya waray makaagi han lawas labot han tul-an han iya ulo, ngan an mga tul-an han iya mga kamot ngan mga tiil.

³⁶Pagsumati nira hini kan Jehu, nagsiring hiya, “Amo ini an iginsiring han GINOO nga mahinanabo dida han paghimangraw niya kan Elias nga iya surugoon: ‘Kakaonon hin kaayaman an lawas ni Jezebel didto ha katunaan han Jezrael.

³⁷Magsasarang didto sugad hin tai an iya patay nga lawas, ngan waray na gud makilala ha iya.’”