Read Waray Samarenyo Meaning Based 1 Cronicas 13 Bible Online

1 Cronicas 13 - Waray Samarenyo Meaning Based bible

1 Cronicas 13

¹Nakighimangraw hi David han mga opisyal nga nagmamando hin tinagyukot ug tinaggatos nga mga sondalo.

²Niyan ginpasangyaw niya ha ngatanan nga mga tawo han Israel, “Kon umabuyon kamo ha akon ngan kon kaburot-on han GINOO nga Dyos, magpapadara kita hin mga surugoon ngadto han aton mga tawo, han mga kapadian ug Levita didto han ira mga bungto hin pagsumat ha ira basi makanhi hira.

³Ngan mag-uorusa kita hin paglakat basi makuha naton an Kahon han Ginsaaran nga waray pagdiparaa ni Saul han hadi pa hiya.”

⁴Inmuyon an mga tawo ngan nagkasarabot hira.

⁵Sanglit gintirok ni David an mga tawo tikang ha ngatanan nga dapit han Israel, tikang ha pag-ultan han Ehipto didto ha timogan ngadto han Aragian Hamat ha amihanan nga dapit basi madara han Kahon han Ginsaaran tikang ha Kiriat Jearim ngadto ha Jerusalem.

⁶Kinmadto hi David ug an mga tawo ha syudad han Baala, ha aton pa, Kiriat Jearim, didto ha Juda hin pagkuha han Kahon han Ginsaaran nga nagdara han ngaran han GINOO nga nalingkod ha bawbaw han mga kerubin.

⁷Didto nira kuhaa an Kahon han Ginsaaran ha balay ni Abinadab ngan iginbutang nira ha bag-o nga karomata. Hira Uza ug Ahio amo an napapalakat han karomata,

⁸samtang hi David ug an mga tawo nagsasarayaw ha bug-os nira nga kusog ha pagpasidungog han Dyos. Nagkanta ngan nagtokar hira hin mga arpa, lira, bumbo, gimbal, ug trompeta.

⁹Han pag-abot nira han giriokan nga dapit ni Quidon, natumba an mga baka nga nagguguyod han karomata ngan kinaptan dayon ni Uza an Kahon han Ginsaaran.

¹⁰Nasina dayon kan Uza an GINOO nga Dyos ngan ginpatay hiya tungod kay kinaptan niya an Kahon han Ginsaaran. Didto namatay hi Uza ha atubangan han Dyos,

¹¹sanglit tikang hadto ginngaranan nga Perez Uza[40] ito nga dapit. Napungot hi David kay ginkastigo han GINOO, ha iya kasina, hi Uza.

¹²Niyan nahadlok han GINOO hi David ngan nagsiring hiya, “Uunanhon ko yana hin pakadara han Kahon han Ginsaaran?”

¹³Sanglit naglarang hiya nga diri na la pagdad-on an Kahon han Ginsaaran ngadto ha Jerusalem; lugod iginbilin ini niya didto han balay ni Obed Edom nga taga syudad han Gat

¹⁴hin tulo ka bulan, ngan ginbendisyonan han GINOO an panimalay ni Obed Edom ug an ngatanan nga iya hiagi.