Read Waray Samarenyo Meaning Based 1 Cronicas 16 Bible Online

1 Cronicas 16 - Waray Samarenyo Meaning Based bible

1 Cronicas 16

¹Gindara nira an Kahon han Ginsaaran ngadto ha sakob han tulda nga gin-andam ni David. Nagdara hira hin mga halad nga tutuboron ug mga halad hin pagkaurosa ngadto han Dyos.

²Kahuman ni David pagtubod han mga halad, ginbendisyonan niya an mga tawo ha ngaran han GINOO

³ngan gintagan han pagkaon an ngatanan. Gintagan an kada usa hin usa ka bug-os nga tinapay, usa nga sinugba nga karne[44] ug hin mga pasas.

⁴Nagtudlok hi David hin mga Levita nga magpapangulo han mga tawo ha ira pagsingba han GINOO, an Dyos han Israel, ha atubangan han Kahon han Ginsaaran, pinaagi hin pagkanta ha pagdayaw ha iya.

⁵Hi Asaf amo an pinakalabaw nira ug an iya mga kabulig amo hira Zacarias, Jahiel, Matatias, Eliab, Barnaias, Obed Edom ug Jehiel. Amo ini hira an nakapot han mga arpa. Hi Asaf amo an nakapot han gimbal ug an

⁶duha nga mga padi, hira Banaias ug Jaziel amo an nagpapatunog han mga trompeta ha atubangan han Kahon han Ginsaaran.

⁷Amo ini nga higayon nga ihinatag ni David kanda Asaf ug han iya mga kausa nga Levita an katungdanan hin pagkanta han mga pagdayaw ngadto han GINOO.

⁸Pagpasalamat ngadto han GINOO, igsangyaw an iya kagamhanan, sumati an mga nasod han iya ginbuhat.

⁹Pagdaywa an GINOO; igsumat an mga makaaramdok nga butang nga iya ginbuhat.

¹⁰Paglipay tungod nga sakop kita niya, maglipay an ngatanan nga nagsisingba ha iya!

¹¹Pakadto ha GINOO hin pakibulig, dayuday singbaha hiya.

¹²Kamo, an mga tulin ni Jacob, an mga surugoon han Dyos, an mga tulin ni Israel, an pinili nga nasod han Dyos, panumdum han mga milagro nga ginbuhat han GINOO ug an mga paghukom nga iya ihinatag.

¹⁴An GINOO amo an aton Dyos; an iya mga sugo para han ngatanan.

¹⁵Ayaw hingalimti an ginsaaran han GINOO nga ginhimo niya nga magpadayon,

¹⁶an ginsabotan nga ginhimo niya kan Abraham, an iya iginsaad ha kan Isaac.

¹⁷Naghimo an GINOO hin ginsaaran kan Jacob, nga magpapadayon tubtob ha kataposan.

¹⁸“Ihahatag ko ha imo an tuna han Canaan”, nasiring hiya, “Magigin iyo ini malon.”

¹⁹Diri anay damo an mga tawo han Dyos, mga lumalangyaw didto ha tuna han Canaan.

²⁰Nagsudoysudoy hira ha mga katunaan, ha ngatanan nga mga kanasoran.

²¹Kundi waray itugot han GINOO nga pagraogdaogon hira, hin pagpanalipod ha ira, nagpahimatngon hiya han mga hadi,

²²“Ayaw paglabti an akon pinili nga mga surugoon; sugad man an akon mga manaragna.”

²³Pag-awit ngadto han GINOO, an bug-os nga kalibutan! Ipasangyaw kada adlaw an maupay nga sumat nga gintalwas kita niya.

²⁴Ipasangyaw an iya himaya ngadto han kanasoran, an iya pagkamakagarahum ngadto han mga tawo.

²⁵Gamhanan an GINOO ngan angay hiya pagdayawon, angay hiya pagpasidunggan labaw han iba nga kadiyosan.

²⁶An kadiyosan han iba nga kanasoran mga hinimo la nga dyos, kundi an GINOO amo an naghimo han kalangitan.

²⁷Lukop hiya han himaya ug kaharangdon, an gahom ug kalipay nakakaluob han Templo.

²⁸Dayawa an GINOO, mga tawo ha tuna, dayawa an iya gahom ug himaya.

²⁹Dayawa an mahimayaon nga ngaran han GINOO, pagdara hin halad ngan pakadto han iya templo. Yukbo ha atubangan han GINOO kon hiya magpakita ha iya pagkabaraan;[45]

³⁰pangurog hin kahadlok ha iya atubangan, kamo nga aanhi ha tuna! Madig-on an katindog han tuna ngan diri gud ini mawawaring.

³¹Paglipay, tuna ug langit! Sumati an mga nasod nga hadi an GINOO.

³²Rayhak, dagat, ug an mga binuhat dida ha imo, paglipay, mga kaumhan ug an mga tanom dida ha imo!

³³An mga kahoy ha kagurangan magoliat hin kalipay, kon makanhi an GINOO hin paghadi han tuna.

³⁴Pagpasalamat han GINOO, kay maupay hiya; an iya gugma waray kataposan.

³⁵Sidnga hiya, “Talwasa kami, O Dyos nga amon Manunubos; tiroka kami ngatanan; tubsa kami ha mga kanasoran, basi kami magpasalamat ngan magdayaw han imo ngaran.”

³⁶Dayawa an GINOO, an Dyos han Israel! Dayawa hiya yana ug ha kadayonan! Niyan an ngatanan nga mga tawo nagbaton, “Amen,” ngan nagdayaw hira han GINOO.

³⁷Iginbuot ni Hadi David nga diri pagliwanliwanan hin katinaporan han mga buruhaton hin pagsingba hira Asaf ug an iya igkasi mga Levita didto han dapit nga ginbutangan han Kahon han Ginsaaran. Kinahanglan magtuman hira kada adlaw han ira katungdanan didto.

³⁸Mabulig ha ira hira Obed Edom, an anak ni Iditon, ngan in 68 nga mga sakop han iya banay. Hira Hosa ug an usa liwat nga Obed Edom amo an mga gwardya han mga aragian han Templo.

³⁹Hira Sadoc, an padi, ug an iya igkasi kapadian amo an tinaporan han mga buruhaton hin pagsingba han GINOO didto han siringbahan nga dapit ha Gabaon.

⁴⁰Kada aga ug gab-i magtutubod hira hin bug-os nga mga hayop didto han altar sumala han iginsurat dida han Balaod nga iginhatag han GINOO ha mga Israelita.

⁴¹Upod ha ira amo hira Heman ug Iditon ug an iba pa nga napili hin pagpasalamat han GINOO kay an iya gugma waray pagkatapos.

⁴²Hira Heman ug Iditon amo an mga tinaporan han mga trompeta, mga gimbal, ug an iba nga mga turunggon nga ginpapatokar kon nagkakanta han mga awit hin pagdayaw. An mga sakop han banay ni Iditon amo an tinaporan hin paggwardya han mga aragian.

⁴³Niyan nangoli an ngatanan ngan inmoli liwat hi David basi igkaurosa hiya anay han iya panimalay.