Read Waray Samarenyo Meaning Based 1 Cronicas 17 Bible Online

1 Cronicas 17 - Waray Samarenyo Meaning Based bible

1 Cronicas 17

¹Didto na naukoy hi Hadi David han iya palasyo. Usa ka adlaw ginpasugoan niya hi Natan, an manaragna, ngan iya ginsiring, “Nag-uokoy ako yana dida hin balay nga hinimo hin mga kahoy nga sidro, kundi aada la hin tulda an Kahon han Ginsaaran han Dyos.”

²Nagsiring hi Natan, “Buhata an imo ginhuhunahunaan, kay aada ha imo an GINOO.”

³Kundi hito nga gab-i, an Dyos nagsiring kan Natan,

⁴“Kadtoa ngan sumati hi David, an akon surugoon, nga nasiring ako ha iya, ‘Diri ikaw an magtitindog hin templo nga akon uokyan.

⁵Tikang han pagkuhaa ko han mga tawo han Israel ha Ehipto ngada yana, waray pa gud ako mag-ukoy hin templo; dayuday nag-ukoy ako dida hin mga tulda ngan nagbarobalhin ako didto ha kamingawan.

⁶Ha ngatanan nga akon paglakaton upod han mga tawo han Israel, waray ako pakiana han mga pangulo nga akon gintudlok kay ano nga waray ako nira ighimo hin templo nga sidro.’

⁷“Sanglit sumati hi David, an akon surugoon, nga nasiring ha iya hi ako, an GINOO nga Labi Kamakagarahum, ‘Ginkuha ko ikaw tikang hin ka paramangno hin mga karnero didto han kaumhan ngan ginhimo ko ikaw nga pangulo han akon nga tawo nga Israel.

⁸Dayuday kaupod ako nimo bisan diin ka kadto, ngan ginpirde ko an ngatanan nga imo kaaway samtang nasulong ka ha ira. Hihimoon ko ikaw nga sugad hin ka bantogan han labi kagamhanan nga mga pangulo dinhe ha kalibutan.

⁹Nagpili ako hin dapit para han akon mga tawo, an Israel, ngan akon hira iginpahimutang didto, diin mag-uokoy hira hin waray na magtatalumpigos ha ira. Tikang han pagsulod nira hini nga tuna, ginsulong hira hin mag-isog nga mga tawo, kundi diri na ini mahinanabo ha ira. Nagsasaad ako hin pagpirde han ngatanan mo nga kaaway ngan paghatag ha imo hin mga tulin.

¹¹Kon mamatay ka na ngan iglubong tampo han imo mga ginikanan, hihimoon ko nga hadi in usa han imo mga anak ngan padidig-onon ko an iya ginhadian.

¹²Hiya amo an magtitindog hin templo para ha akon ngan tatalingohaon ko nga maghadi an iya katulinan ha kadayonan.

¹³Ako an iya amay ug hiya an akon anak. Diri ko kukuhaon ha iya an akon tambulig, sugad han akon ginbuhat kan Saul nga akon ginkuha basi mahimo ka nga hadi.

¹⁴Ibubutang ko hiya nga tinaporan han akon mga tawo ug han akon ginhadian ha kadayonan. Waray kataposan an iya katulinan.’”

¹⁵Iginsumat ni Natan kan David an ngatanan nga iginpadayag ha iya han Dyos.

¹⁶Niyan sinmulod hi David han Tulda han GINOO, linmingkod, ngan nag-ampo hiya, “Diri ako takos, bisan ngani an akon panimalay, han imo na ginbuhat ha akon, O GINOO nga akon Dyos.

¹⁷Kundi yana, darudamo pa an imo ginbubuhat para ha akon; nagsaad ka mahitungod han akon katulinan ha tiarabot nga mga katuigan, ngan ikaw, O Dyos, nagdudumara ha akon sugad nga dako ako nga pagkatawo.[46]

¹⁸Ano pa in akon igsisiring ha imo! Nakilala ka ha akon kundi ginpapasidunggan mo ako, an imo surugoon.

¹⁹Imo ini kaburot-on ngan paglarang nga buhaton mo ini para ha akon ngan pagpakita ha akon han tiarabot nga akon pagkagamhanan.

²⁰GINOO, waray gud masugad ha imo; dayuday maaram kami nga ikaw la an Dyos.

²¹Waray iba nga nasod ha tuna sugad han Israel nga imo gintalwas hin pagkaoripon basi mahimo hira nga imo kalugaringon nga mga tawo. Nakabantog ha imo ha bug-os nga kalibutan an dagko nga urosahon nga mga butang nga imo ginbuhat para ha ira. Gintalwas mo tikang ha Ehipto an imo mga tawo ngan gintabog mo in iba nga mga nasod samtang nasulong an imo mga tawo.

²²Ginhimo mo nga imo kalugaringon nga mga tawo an Israel ha kadayonan ngan ikaw, O GINOO, nahimo nga ira Dyos.

²³“Ngan yana, O GINOO nga Dyos, tumana ha ngatanan nga panahon an iginsaad mo mahitungod ha akon ngan han akon katulinan, ngan tumana an imo ginsiring nga imo bubuhaton.

²⁴Mababantogan ka hin duro ngan masiring ha kadayonan an mga tawo, ‘An GINOO nga Labi Kamakagarahum amo an Dyos han Israel!’ Ngan imo ipadadayon ha ngatanan nga panahon an akon katulinan.

²⁵Nakakadasig ini ha akon hin pag-ampo ha imo kay iginpadayag mo ini ngatanan ha akon, an imo surugoon, ngan iginsumat mo ha akon nga imo hihimoon nga kahadian an akon katulinan.

²⁶GINOO, ikaw an Dyos ngan imo ini ginhimo ha akon ini nga makaaramdok nga saad.

²⁷Nahangyo ako ha imo nga bendisyonan mo an akon mga tulin basi magpadayon hira hin pagpahimulos han imo kamaloloy-on ngan kamaupay. Ikaw, GINOO, an nagbendisyon ha ira ngan an imo bendisyon magpapabilin dida ha ira ha kadayonan.”