Read Waray Samarenyo Meaning Based 1 Cronicas 18 Bible Online

1 Cronicas 18 - Waray Samarenyo Meaning Based bible

1 Cronicas 18

¹Waray kaiha ginsulong na liwat ni David an mga Filisteohanon ngan ginpirde hira ni David. Naagaw ni David an syudad han Gat ug an mga higrani nga baryo.

²Ginpirde liwat niya an mga Moabitanhon nga nasakop niya ngan nagbayad ini hira ha iya hin mga buhis.

³Kahuman, ginsulong ni David hi Hadadeser nga hadi han Soba, harani han katunaan han Hamat, kay karuyag ni Hadadeser hin pag-agaw han katunaan didto ha iraya han Salog Eufrates.

⁴Naagaw ni David in harani 1,000 nga mga karuwahe, 7,000 nga mga dikabayo nga sondalo, ug 20,000 nga mga baktas nga sondalo. Ginpili niya in mga kabayo nga igo hin usa ka gatos nga mga karuwahe ngan an iba nga kabayo iya pinamiangan.

⁵Nagpadara hin kasondalohan an mga Siriahanon han Damasco hin pagbulig kan Hadi Hadadeser; pinakiawayan hira ni David ngan pinamatay in 22,000 ka tawo.

⁶Katapos nagtindog hi David hin mga kampo hin kasondalohan didto han ira katunaan, nasakop hira ni David ngan nagbayad ha iya hin mga buhis. Ginpadaog han GINOO hi David ha ngatanan nga dapit.

⁷Gin-agaw ni David an bulawan nga mga taming nga dara han mga opisyal ni Hadadeser ngadto ha Jerusalem.

⁸Ginkuha liwat niya in kadam-an nga mga bronse tikang ha Tebat ug Cun, mga syudad ha ginhadian ni Hadadeser. (Ginamit ni Solomon ini nga bronse hin paghimo han tangke, han mga harigi, ug han mga bronse nga garamiton para han Templo.)

⁹Hinbatian ni Hadi Toi han Hamat nga ginpirde ni David an ngatanan nga kasondalohan ni Hadadeser.

¹⁰Sanglit ginsugo niya hi Joram nga iya anak hin pagpahalipay kan Hadi David ngan pagpasidungog ha iya kay ginpirde man niya hi Hadadeser nga nakadamo na pakiawayi ni Toi. Gindad-an ni Joram hi David hin mga regalo nga hinimo hin bulawan, salapi, ug bronse.

¹¹Iginhalad ini ni Hadi David nga mga garamiton hin pagsingba, upod an salapi ug bulawan nga iya nakuha didto han mga nasod nga iya napirde—an Edumea, Moab, Amon, Filistia, ug Amalec.

¹²Hi Abisai, an anak ni Seruia, nakapirde han mga Edomitanhon didto han Kahamub-an Asin ngan pinamatay niya in 18,000 nga mga tawo.

¹³Nagtindog hiya hin mga kampo hin kasondalohan ha bug-os nga katunaan han Edumea ngan nasakop niya an mga tawo didto. Ginpadaog han GINOO hi David ha ngatanan nga dapit.

¹⁴Naghadi hi David han bug-os nga Israel ngan gintalinguha niya nga dayuday ug maupay an iya pagdumara ngan waray pinalabi nga iya mga tawo.

¹⁵Hi Joab, nga bugto ni Abisai amo an pangulo han kasondalohan; hi Josafat nga anak ni Ahilud amo an tinaporan han mga sinurat;

¹⁶hira Sadoc nga anak ni Ahitob ngan hi Ahimelec, nga anak ni Abiatar, amo an kapadian; hi Saraias[47] amo an sekretaryo han korte;

¹⁷hi Benaias, an anak ni Joyada amo an tinaporan han mga gwardya ni David; ngan an mga anak ni David amo an nagkapot han higtaas nga mga katundanan.