Read Waray Samarenyo Meaning Based 1 Cronicas 19 Bible Online

1 Cronicas 19 - Waray Samarenyo Meaning Based bible

1 Cronicas 19

¹Waray kaiha namatay hi Hadi Nahas han Amon ngan hi Hanun, an iya anak, an naghadi.

²Nagsiring hi David, “Kinahanglan ipakita ko kan Hanun an maunongon nga pakigsangkay sugad han ginbuhat ha akon ni Nahas nga iya amay.” Sanglit nagsugo hi David ngadto kan Hadi Hanun hin pagpasabot han iya kabidoan tungod han kamatay ni Hadi Nahas. Han pag-abot han ginsugo ngadto ha Amon, ngan nakigkita hira kan Hadi Hanun,

³nagsiring ha hadi an mga pangulo nga Amonitanhon, “Naghunahuna ka ba nga kadungganan ini ni imo tatay nga ginpadara ni David ini nga mga tawo hin pagpakita han iya kabidoan ha imo? Bangin diri! Iya ginsugo hira nganhi sugad nga mga mag-irinaw hin pag-usisa han syudad basi bihagon kita niya.”

⁴Gindakop ni Hanun an mga sinugo ni David, gintosaran an ira mga bungot, gintabasan ha may hawak an ira mga panapton, ngan ginpalakat hira.

⁵Naawod hira hin duro hin pag-uli. Paghibaro ni David han nahinabo, nagpatugon hiya ha ira nga magpabilin la anay hira didto ha Jerico ngan diri umoli ngada han pagtubo na liwat han ira mga bungot.

⁶Nakasabot hi Hanun ug an mga Amonitanhon nga hi David ira na kaaway, sanglit nagbayad hira hin kapin hin 40 ka tonelada nga salapi para pagsuhol hin mga karuwahe ug mga magmamaneho han mga karuwahe tikang ha iraya han Mesopotamia ngan tikang han mga katunaan han Maaca ug Soba.

⁷Inmabot an 32,000 nga mga karuwahe nga ira ginsuholan ug an kasondalohan han Hadi han Maaca ngan nagkampo hira hirani han Medaba. Ginmawas liwat ha ira mga syudad an mga Amonitanhon ngan nag-andam hin pakiaway.

⁸Han pakabati ni David han nahinanabo, ginpasugoan niya hi Joab ug an ngatanan niya nga kasondalohan.

⁹Nagkagawas an mga Amonitanhon ngan nag-andam hin pakiaway dida han aragian ngadto ha Raba, an kapital han ira syudad, ug an mga kahadian nga inmabot hin pagbulig nag-andam hin pakiaway didto ha kapatagan.

¹⁰Hinsabotan ni Joab nga susulongon hiya han mga kaaway ha atubangan ngan ha talikoran, sanglit ginpili niya an gimamag-upayi nga mga sondalo han Israel ngan ginpaatubang hira han mga Siriahanon.

¹¹Iginbutang niya an iba han iya kasondalohan ha ubos han pagdumara ni Abisai nga iya bugto, nga ginpaatubang ini hira han mga Amonitanhon.

¹²Nagsiring ha iya hi Joab, “Kon hikit-an mo nga pinipirde na kami han mga Siriahanon, pakadi ngan buligi ako, ngan kon hikit-an ko nga ginpipirde kamo han mga Amonitanhon, makada ako ngan bubuligan ta ikaw.

¹³Pagmakusog ngan pagmaisog! Pakig-away kita hin maupay tungod han aton mga tawo ngan tungod han mga syudad han aton Dyos. Ngan matuman unta an kaburot-on han GINOO.”

¹⁴Sinmulong hin pakiaway hi Joab ngan an iya mga tawo ug nangalagiw an mga Siriahanon.

¹⁵Han pakakita han mga Amonitanhon nga nangangalagiw na an mga Siriahanon, pinmalagiw liwat hira tikang kan Abisai ngan inmisol ngadto han syudad. Niyan binmalik hi Joab ngadto ha Jerusalem.

¹⁶Nakasabot an mga Siriahanon nga ginpirde na hira han mga Israelita, sanglit nagdara hira hin kasondalohan tikang han mga katunaan han Siria ha sinirangan nga dapit han Salog Eufrates ngan ibinutang ini hira ha ubos han pagdumara ni Sobac, an pangulo han kasondalohan ni Hadi Hadadeser han Soba.

¹⁷Han pakabati hini ni David, iya gintirok an kasondalohan nga Israelita tinmabok hiya han Salog Jordan ngan inmabot hira ngadto ha Helam diin nag-andam hira hin pakig-atubang han mga Siriahanon. Nagtikang an araway

¹⁸ngan gintabog han mga Israelita an kasondalohan nga Siriahanon. Pinamatay ni David ngan han iya mga tawo in 7,000 nga mga nagmamaneho han mga karuwahe ngan hin 40,000 nga mga sondalo. Ginpatay liwat nira hi Sobac, an pangulo han mga sondalo nga Siriahanon.

¹⁹Han pakasabot la han mga hadi nga sakop ni Hadadeser nga ginpirde na hira han mga Israelita, nakigsabot hira hin kalinaw han Israel ngan nasakop hira han mga Israelita.

²⁰Sanglit nahadlok na an mga Siriahanon hin pagbulig han mga Amonitanhon.