Read Waray Samarenyo Meaning Based 1 Cronicas 21 Bible Online

1 Cronicas 21 - Waray Samarenyo Meaning Based bible

1 Cronicas 21

¹Karuyag magsamok hi Satanas han mga tawo han Israel ug gin-aghat niya hi David hin pagpaihap han mga tawo.

²Nagsugo hi David kan Joab ug han iba nga mga opisyal, “Pakadto kamo ha bug-os nga Israel ngan ihapa niya an mga tawo. Karuyag ko hibaroan kon pipira an mga tawo ngatanan.”

³Binmaton hi Joab, “Himoon unta han GINOO nga imo Dyos nga an kadamo han mga tawo han Israel kadugangan pa unta hin usa ka gatos ka pilo! Harangdon nga Hadi, imo ini ngatanan mga surugoon. Kay ano nga karuyag man nimo buhaton ini ngan kahuman pagsalaon mo an bug-os nga nasod?”

⁴Kundi ginpatuman gud han hadi kan Joab an iya sugo. Linmakat hi Joab, nagsudoy han bug-os nga katunaan han Israel ngan binmalik ngadto ha Jerusalem.

⁵Naghatag hiya hin kasayoran kan Hadi David mahitungod han kadamo han kalalaken-an nga angay magsondalo: 1,100,000 didto ha Israel ug 470,000 didto ha Juda.

⁶Tungod kay waray man umabuyon hi Joab han sugo han hadi, waray niya pag-ihapa an mga tribo nira Levi ug Benjamin.

⁷Nabido an Dyos tungod han ginbuhat, sanglit ginkastigo niya an mga Israelita.

⁸Nagsiring hi David ha Dyos, “Nakasala ako nga gayud han akon pagbuhat hini! Pasayloa ako. Linurong an akon ginbuhat.”

⁹Nagsiring an GINOO kan Gad, an manaragna ni David,

¹⁰“Kadtoa ngan sumati hi David nga pinapagpili ko hiya hinin tutulo. Tutumanon ko an bisan hain hini nga iya pagpilion.”

¹¹Napakadto hi Gad kan David, ginsumatan niya han siring ha iya han GINOO, ngan pinmakiana hiya kan David, “Hain man hini nga tutulo?

¹²Tulo ka tuig nga kagutom? Tulo ba ka bulan nga pagkinalagiw mo ha imo mga kaaway? O tulo ka adlaw nga susulongon kamo han GINOO ngan ipapadara niya in peste ngan pamamatayon kamo ngatanan hin anghel? Ano ba an akon igbabaton han GINOO?”

¹³Binmaton hi David kan Gad, “Kamakahurulop hini nga akon kahimtang! Kundi diri ko karuyag nga kastigohon ako hin mga tawo. An GINOO la an angay magkastigo ha akon, kay maloloy-on hiya.”

¹⁴Sanglit nagpadara an GINOO hin peste ha bug-os nga Israel ngan 70,000 nga mga tawo an namatay.

¹⁵Niyan nagpadara hiya hin anghel basi bungkagon an Jerusalem kundi nagbalhin hiya han iya hunahuna ngan ginsiring an anghel, “Ukoy na! Igo na ito!” Natukdaw an anghel didto ha ligid han giriokan ni Arauna, an Jebuseohanon.

¹⁶Kinmita hi David han anghel nga natukdaw didto han dampog, nakakadara hin espada ngan andam na hin pagbungkag han Jerusalem. Niyan hi David ug an mga pangulo han mga tawo—ngatanan nakakasul-ot hin sako—hinmapa ha tuna.

¹⁷Nag-ampo hi David, “O Dyos, ako an nakasala. Ako an nagsugo hin pagpaihap han mga tawo. Ano an nabuhat hini nga mga makalolooy nga tawo? GINOO, an akon Dyos, kastigoha ako ug an akon panimalay ngan ayaw paglabti an imo mga tawo.”

¹⁸An anghel han GINOO nagsiring kan Gad nga sugoon hi David hin pagtindog hin altar para han GINOO didto han giriokan ni Arauna.

¹⁹Sinmugot hi David han sugo han GINOO ngan kinmadto hiya sumala han ginsiring ha iya ni Gad.

²⁰Didto ha giriokan, naggigiok hin trigo hira Arauna ug an iya upat nga mga anak, ngan han pakakita nira han anghel, dinmalagan ngan tinmago an mga anak ni Arauna.

²¹Pakakita ni Arauna nga tipakada ha iya hi David, binayaan niya an giriokan ngan hinmapa hiya ha tuna.

²²Nagsiring hi David ha iya, “Ibaligya ha akon an imo giriokan basi ako makatindog hin altar para han GINOO nga pag-aampoan ta basi umukoy na an peste. Babaydan ta ikaw han ngatanan.”

²³“Dad-a ini, Harangdon nga Hadi”, nagsiring hi Arauna, “ngan buhata an imo karuyag. Iini in mga baka nga imo tutuboron hin paghalad ha altar ug iini an mga tabla han giriokan ngan isungo ini, ngan iini in trigo nga ighahalad liwat nimo. Hinahatag ko ini ngatanan ha imo.”

²⁴Kundi binmaton an hadi, “Ayaw! Babaydan ta ikaw han ngatanan. Diri ako maghahalad ha GINOO hin butang nga imo ug diri akon, hin butang nga waray ko kabaydi.”

²⁵Ginbaydan niya hi Arauna hin 6,000 nga bulawan para han iya giriokan.

²⁶Nagtindog hiya hin altar para han GINOO didto ngan nagdara hiya hin mga susunogon nga halad ug mga halad hin pakig-urosa. Nag-ampo hiya ngan pinamatian hiya han GINOO pinaagi hin pagpadara hin kalayo tikang ha langit nga nagtubod han mga halad dida han altar.

²⁷Ginsiring han GINOO an anghel nga diri na gamiton niya an espada. Sinmugot an anghel.

²⁸Nakasabot hi David nga pinamatian han GINOO an iya mga pag-ampo, sanglit naghalad hiya hin mga hayop nga tutuboron didto han altar ha giriokan nga dapit ni Arauna.

²⁹Hini nga panahon nakadto pa ha Gabaon an Tulda han GINOO nga gintindog ni Moises didto ha kamingawan, ug an altar nga ginsusunogan ug gintutuboran han mga halad;

³⁰kundi hi David waray makahimo hin pagkadto hin pagsingba han Dyos kay nahadlok hiya han espada han anghel han GINOO.