Read Waray Samarenyo Meaning Based 1 Cronicas 23 Bible Online

1 Cronicas 23 - Waray Samarenyo Meaning Based bible

1 Cronicas 23

¹Han lagas na hi David, gintudlok niya hi Solomon, an iya anak, nga hadi han Israel.

²Gintirok ni Hadi David an ngatanan nga mga pangulo han Israel ngan an ngatanan nga kapadian ug mga Levita.

³Ginpaihap an ngatanan nga mga lalake nga Levita nga 30 ug labaw na an panuigon. Inmabot hin 38,000 ngatanan.

⁴Nagtudlok an hadi hin 24,000 ka tawo para han pagdumara han buruhaton ha templo; 6,000 ka tawo nga mga sekretaryo ngan maghurukom;

⁵an mga magbarantay han mga portahan 4,000; ngan 4,000 nga paratokar hin pagdayaw han GINOO pinaagi hin mga turonggon nga ginhatag han hadi.

⁶Gintulo ka hugpo ni David an mga Levita pinaagi han mga banay nira: Gerson, Cohat, ug Merari.

⁷Duha an anak ni Gerson: hira Leedan ug Simei.

⁸Tulo an anak ni Leedan: hira Jahiel, Zetan, ug Joel,

⁹mga pangulo ini hira han mga banay ni Leedan. (Tulo an anak ni Simei: hira Salomit, Hosiel, ug Aran.)[50]

¹⁰Upat an anak ni Simei: hira Lehet, Zira, Jaus, ug Baria. Hi Lehet an timagurangi. Diri damo an tulin nira Jaus ug Baria, sanglit gin-usa la hira nga banay.

¹²Upat an anak ni Cohat: hira Amram, Isaar, Hebron, ug Uziel.

¹³An iya timagurangi nga anak, hi Amram, amo an amay nira Aaron ug Moises. (Hi Aaron ug an iya mga tulin amo an tinaporan hin panimangno han mga baraan nga garamiton, hin pagsunog han insyenso dida ha pagsingba han GINOO, hin pag-alagad ha iya ngan pagbendisyon han mga tawo ha ngaran han GINOO.

¹⁴Kundi an mga anak ni Moises, an tawo han Dyos, nahiupod dida han banay han mga Levita.)

¹⁵Duha an anak ni Moises: hira Gerson ug Eliezer.

¹⁶Hi Gerson may-ada anak nga pangulo, hi Sebuel.

¹⁷Usa la an anak ni Eliezer, hi Rohobias, kundi damo an mga tulin ni Rohobias.

¹⁸An ikaduha nga anak ni Cohat, hi Isaar may-ada anak, hi Salomit nga pangulo hin banay.

¹⁹An ikatulo nga anak ni Cohat, hi Hebron, may-ada upat nga anak: hira Jerias, Amarias, Jahasiel, ug Jecmaam.

²⁰An ikaupat nga anak ni Cohat, hi Usiel, may-ada duha nga anak: hira Mica ug Jesia.

²¹Duha an anak ni Merari: hira Moholi ug Musi. May-ada duha nga anak hi Moholi: hira Eleasar ug Kis,

²²kundi namatay hi Eleasar nga waray anak nga lalake, ubos la babaye. Ini nga mga anak nga kababayen-an ni Eleasar pinangasawa han ira mga patod, an mga anak ni Kis.

²³An ikaduha nga anak ni Merari, hi Musi, may-ada tulo nga anak: hira Moholi, Eder, ug Jeremot.

²⁴Amo ini an mga tulin ni Levi nga ginsurat pinaagi hin mga banay ug panimalay. An ngatanan nga iya mga tulin nga 20 ug labaw an panuigon, may-ada bahin han mga buruhaton dida han Templo han GINOO.

²⁵Nagsiring hi David, “An GINOO nga Dyos han Israel naghatag hin kalinaw han iya mga tawo ngan hiya ngahaw mag-uokoy ha kadayonan didto ha Jerusalem.

²⁶Sanglit diri na kinahanglan nga pagdaradaraon an Tulda han GINOO ug an ngatanan nga baraan nga mga garamiton.”

²⁷Pinasikad dida han kataposan nga mga sugo ni David, an ngatanan nga mga Levita nga nakaabot na hin 20 an panuigon ginlista para han buruhaton nga

²⁸amo ini: pagbulig han kapadian nga tulin ni Aaron dida han pag-andam para hin pagsingba ha Templo; panimangno han mga bungsaran ug mga kwarto han Templo; pagbantay nga diri kahugawan an mga baraan nga butang;

²⁹pag-andam han tinapay nga ginhalad ngadto han Dyos, han arina nga ginagamit hin paghalad, han tinapay nga waray patubo, han pagkaon nga halad, han arina nga inahogan hin lana hin olibo; pagtimbang ug pagtakus han mga halad,

³⁰ngan pag-awit ha pagdayaw han GINOO kada aga ug gab-i

³¹ngan kon may-ada ginsusunog nga mga halad ha Adlaw nga Iparahuway, pyesta han Bag-o nga Subang han Bulan, ug iba pa nga mga siringbahon nga pyesta. Ihinatag ha mga Levita an mga buruhaton bahin han pagsingba han GINOO ha ngatanan nga takna.

³²Ira liwat katungdanan an panimangno han Tulda han GINOO ug han Templo ngan pagbulig han ira kauropdan, an kapadian nga tulin ni Aaron, dida han pagsingba ha Templo.