Read Waray Samarenyo Meaning Based 1 Cronicas 25 Bible Online

1 Cronicas 25 - Waray Samarenyo Meaning Based bible

1 Cronicas 25

¹Ginpili ni Hadi David ngan han mga pangulo han mga Levita inin masunod nga mga banay ni Levi para hin pagdumara han mga buruhaton ha Templo: hira Asaf, Heman, ug Jediton. Hira an magsasaysay han mensahe han Dyos dinuyogan han tokar hin mga arpa ug mga gimbal. Amo ini an lista han mga napili nga tawo nga magdudumara han pagsingba ha Templo upod an buruhaton han kada hugpo.

²An upat nga anak ni Asaf: hira Zacur, Jose, Natanias, ug Asarela. Pinangungulohan hira ni Asaf nga amo an nagpasangyaw han mensahe han Dyos kon nasugo an hadi.

³An unom nga anak ni Jediton: hira Godolias, Sori, Jeseias, Semeias, Jasabias, ug Matatias. Ha ubos han pagdumara han ira away ginpasangyaw nira an mensahe han Dyos dinuyogan han tokar han mga arpa ngan nagkanta hira hin pagdayaw ug pagpasalamat han GINOO.

⁴An 14 nga anak ni Heman: Bocias, Matanias, Uziel, Sobuel, Jerimot, Hananias, Hanani, Eliata, Gedelti, Romantieser, Jesbacasa, Meloti, Otir, ug Mahasiot.

⁵Ginhatag han Dyos kan Heman, an manaragna han hadi, ini nga 14 nga anak nga lalake ngan hin tulo nga anak nga babaye, sugad han iya saad, basi makahatag hin dungog kan Heman.

⁶An ngatanan nga iya anak nga lalake maaram magtokar han gimbal ug arpa ha ubos han pagdumara ni ira tatay, para hin pagduyog han pagsingba ha Templo. Ubos han mando han hadi hira Asaf, Jediton, ug Heman.

⁷Mga hag-id ini nga mga 24 ka tawo hin pagtokar hin mga turonggon; ngan an ira igkasi mga Levita gintutdoan hin maupay hin pagkanta. Iini hira ngatanan 288.

⁸Basi hisabotan an ira buruhaton, nagripa hira—bisan kon bata o lagas hiya, hiara na hiya han buruhaton o magtirikang pa la.

⁹Ini nga 288 ka tawo ginbahinbahin sumala han ira panimalay ngada hin 24 ka hugpo hin tagdose ngan may-ada tinaporan an kada hugpo. Amo ini an pagkasunodsunod han ira pagturno han ira buruhaton: 1) hi Jose nga tulin ni Asaf; 2) Godolias; 3) Zacur; 4) Isaari; 5) Natanias; 6) Bocias; 7) Iraela; 8) Jesaias; 9) Matanias; 10) Semeias; 11) Asarel; 12) Jasabias; 13) Subael; 14) Matatias; 15) Jeremot; 16) Hananias; 17) Jesbacasa; 18) Hanani; 19) Meloti; 20) Eliata; 21) Otir; 22) Gidetti; 23) Mahasiot; 24) Romantieser.