Read Waray Samarenyo Meaning Based 1 Cronicas 26 Bible Online

1 Cronicas 26 - Waray Samarenyo Meaning Based bible

1 Cronicas 26

¹Amo ini an mga buruhaton nga iginhatag han mga Levita nga mga gwardya han Templo. Tikang han banay ni Cora, may-ada usa nga Levita, hi Meselemias, an anak ni Core, han panimalay ni Asaf.

²Amo ini an iya pito nga mga anak tikang han timagurangi: hira Zacarias, Jadihel, Sabadias, Jatanael,

³Elam, Jobanan, ug Elioenai.

⁴May-ada liwat usa nga Levita, hi Obed Edom nga may-ada walo nga mga anak nga tikang han timagurangi amo hira Semeias, Josabad, Joaha, Sacar, Natanael,

⁵Amiel, Isacar, ug Polati.

⁶An timagurangi nga anak ni Obed Edom, hi Semeias may-ada unom nga mga anak: hira Otni, Rafael, Obed, Elsabad, Elihu, ug Samaquias. Mga tinahod ini nga tawo dida han ira banay tungod han ira pagkatakos hin pagbuhat; mga baltok hira Elihu ug Samaquias.

⁸An tulin ni Obed Edom nakahatag hin 62 nga mga takos nga tawo han buruhaton nga ihinatag ha ira.

⁹An tulin ni Meselemias nakahatag hin 18 nga sugad liwat ka takos nga mga tawo.

¹⁰Tikang han banay ni Merari, may-ada usa nga Levita, hi Hosa nga may-ada upat nga anak: hira Simri (ginhimo hiya nga pangulo bisan kon diri hiya an timagurangi),

¹¹Helkias, Tabelias, ug Zacarias. May-ada 13 nga mga sakop han panimalay ni Hosa nga natuklok hin ka mga gwardya han Templo.

¹²Ginhurohugpo an mga gwardya han Templo sumala han ira banay ngan tinagan hira hin mga buruhaton ha Templo, sugad han iba nga mga Levita.

¹³An tagsa nga panimalay, bisan ano an iya kadako, nagripa basi hisabotan kon hain nga portahan an ira pagbabantayan.

¹⁴Ihinatag kan Selemias an paggwardya han portahan ha sinirangan ug an iya anak, hi Zacarias, an tawo nga maupay maghatag hin sagdon, nakadara han portahan ha amihanan han Templo.

¹⁵Ihinatag kan Obed Edom an timogan nga portahan ug an iya mga anak, an paggwardya han mga hirimosan han mga garamiton.

¹⁶Ihinatag kanda Sefim ug Hosa an katundan nga portahan ngan an Aragian Salekit ha iraya nga dapit ligid han dalan. May-ada mga turno han pagkasunodsunod han paggwardya.

¹⁷Didto ha sinirangan nga portahan, unom an gwardya kada adlaw; ha amihanan nga portahan, upat; ug ha timogan nga portahan, upat. Kada adlaw upat an gwardya han mga hirimosan hin mga garamiton.

¹⁸Harani han katundan nga buhatan, uupat an mga gwardya ligid ha dalan ug an duha, didto ha sakob han buhatan.

¹⁹Amo ini an ihinatag nga mga turumanon han mga gwardya han banay ni Cora ug Merari.

²⁰An iba han ira igkasi mga Levita[51] ginhimo nga mga tinaporan han hirimosan han bahandi han Templo ug han mga kwarto nga hirimosan han mga halad nga sagrado.

²¹Hi Leedan, usa han mga anak ni Gerson, amo an ginikanan hin mga hugpo hin panimalay, upod ini an panimalay ni Jehieli, an iya anak.

²²An duha nga mga anak ni Leedan, hira Zatan ug Joel, amo an tinaporan han hirimosan han bahandi han Templo ug han mga hirimosan nga kwarto.

²³Tinagan liwat hin turumanon an mga tulin ni Amram, Isaar, Hebron, ug Oziel.

²⁴Hi Sobael, anak ni Gerson han banay ni Moises, amo an labaw nga tinubyanan han hirimosan han bahandi han Templo.

²⁵Hi Eliezer nga bugto ni Gerson sakop han banay ni Salomit. Hi Eliezer amo an amay ni Rahabias nga amay ni Isaias nga amay ni Joram nga amay ni Zecri nga amay ni Salomit.

²⁶Hi Salomit ug an mga sakop han iya panimalay amo an mga tinaporan han ngatanan nga hatag nga iginhalad ni Hadi David ngadto han Dyos, han mga puno han panimalay, han mga pangulo han mga hugpo hin mga banay, ug han mga opisyal han kasondalohan.

²⁷Gindara nira an ira naagaw ha pag-awayan nga ira ginhalad ini hira basi magamit han mga buruhaton ha Templo.

²⁸Hi Salomit ug an iya panimalay amo an tinaporan han ngatanan nga iginhalad basi magamit ha Templo, upod an mga regalo nga gindara ni Samuel, an manaragna, ni Hadi Saul, ni Abner nga anak ni Ner, ug ni Joab nga anak ni Seruia.

²⁹Dida han mga tulin ni Isaar, hi Conenias ug an iya mga anak gintagan hin katungdanan gawas han templo. Ginhimo hira nga mga opisyal ug mga maghurukom. An iba ha ira mga sekretaryo.

³⁰Dida han mga tulin ni Hebron, hi Hasabias ug an iya mga kauropdan, kapin hin 1,700 ngatanan, nga may-ada pagkatakos han buruhaton nga ihinatag ha ira, ginhimo hira nga mga tinaporan han mga buruhaton bahin han Dyos ug han hadi didto ha Israel, ha katundan nga dapit han Salog Jordan.

³¹Hi Jerias amo an pangulo han mga tulin ni Hebron. Dida han ika-40 ka tuig han pagkahadi ni David, gin-usisa an mga tulin ni Hebron, ngan hinsabotan nga may-ada mga bantogan nga mga sondalo nga sakop hini nga tulin nga naukoy didto ha Jaser didto han katunaan han Galaad.

³²Nagpili hi David hin 2,700 nga mga bantogan nga mga puno hin panimalay tikang han mga kauropdan ni Jerias ngan ginhimo hira nga mga tinaporan han mga buruhaton bahin han Dyos ug han hadi didto ha Israel ha sinirangan nga dapit han Salog Jordan: an mga katunaan nira Ruben, Gad, ug Manases ha sinirangan.